24
Tɛtʋ tǝnɑ wɑkǝlɑɑ
1 Ɩ́ nyǝnɩ, Tɑcɑɑ kɑ́ wɑkǝlɩ tɛtʋ.
Ɩ kɑ́ pǝsɩ-tǝɣɩ wʋlɑɣɑ nyǝntʋ.
Ɩ kɑ́ pǝsɩ-tǝɣɩ kpɛntǝlɑsɩ nɑ ɩ́ wɑkǝlɩ tǝ yǝlɑɑ.
2 Wɑhɑlɑ kʋlʋm kɑ́ mɑɣɑnnɑ kɔtʋlʋ nɑ yǝlɑɑ.
Nɑ cɑɑ nɑ ɩ yom, nɑ toto nɑ ɩ yom.
Nɑ pɛɛtǝlʋ nɑ wei ɩ yɑkɩ tɔ.
Nɑ kǝntǝlʋ nɑ wei pɑ kǝntǝɣɩ tɔ.
Nɑ kǝmlɛ tʋ nɑ wei pɑ fɛlǝɣɩ tɔ.
3 Pɩɩ kpiisi tɛtʋ kɛ́ tǝkpɑtɑɑ,
nɑ pǝ́ kuu tǝ wontu tǝnɑ tǝkpǝlǝkpǝlɩ.
Mpi Tɑcɑɑ sɩɩwɑ tɔɣɔlɛ.
4 Tɛtʋ wɛ lǝyɑɣɑ tɑɑ, nɑ tǝ́ pǝsɩ ncɑɑlɛ.
Antulinyɑ nɑ́ hotɑɑ, nɑ ɩ́ pǝsɩ ncɑɑlɛ.
Ɩsɔtɔnʋɣʋ nɑ tɛtʋ pǝ wɑkǝlɑɑ.
5 Yǝlɑɑ mpɑ pɑ wɛ tɛtʋ tɑɑ tɔ pɑ wɑkǝlɑ-tɩ.
Mpi tɔ, pɑ yɔkɑ kiiŋ, pɑ wɑkǝlɑ kʋsǝsɩɩtʋ.
Pɑ yɔkɑ tɑm tɔɔ nɔɣɔ pɛɛlʋɣʋ.
6 Pǝ tɔɔ kɛ́ Ɩsɔ tǝŋsɑ tɛtʋ kɛ mpusi
nɑ pǝ́ tɔɣɔ-tɩ.
Tǝ yǝlɑɑ ɩsɑɣɑtʋ mǝlǝɣɩ pɑ nyɔɔŋ tɑɑ.
Pǝ kpiisɑ-wɛ nɑ pǝ́ kɑɑsɩ-wɛɣɛ pǝ́cɔ́ tike.
7 Sʋlʋm kʋpɑm kɑ́ cɑɣɑ lǝyɑɣɑ.
Lɛsɛŋ tʋɣʋ kɑ́ lontili.
Lɑŋhʋlʋmlɛ nyǝ́mɑ tǝnɑ sʋʋ nǝɣǝsɛɛ tɑɑ.
8 Akilimɑnɑɑ wulɑ kʋpɑnɑ sumɑ.
Acimɑ tɑɑ woŋɑ nɑ kpɑlǝsʋɣʋ sɑɑlɑɑ.
Cǝmǝŋ wulɑ lɑŋhʋlʋmlɛ nyǝnɑ sǝpɑ.
9 Pɑɑ tɑsǝɣɩ sʋlʋnyɔɔlɛ nɑ yontu.
Pǝyele sʋlʋm toŋ nyǝm nɑ́ kpɑ nyɑŋ kɛ pǝ nyɔɔlɑɑ.
10 Ɩcɑtɛ kpɛtɛ nyǝntɛ ńtɛ́ tǝ yɔkɑɑ.
Tɛɛsɩ tǝnɑ tǝkɑɑ nɔɣɔlʋ ɩɩ sʋʋkɩ.
11 Pɑ mɑkɩ kɑpusi kɛ hɑpɛɛ tɔɔ.
Mpi tɔ, sʋlʋm fɛɩ.
Lɑŋhʋlʋmlɛ fɛɩ tǝkpɑtɑkpɑtɑ.
Aŋmɑɑlɑ fɛɩ tɛtʋ tǝnɑ tɑɑ.
12 Wɑkǝlʋɣʋ tike wɛnnɑ ɩcɑtɛ tɑɑ.
Ɩcɑtɛ nɔnɔɣɔ kɑmpʋ pɛlɑ yem yem.
Pǝ yelɑ-kɛɣɛ ncɑɑlɛ.
13 Pǝ kɑɑ kɑɑsɩ yǝlɑɑ kɛ sɔsɔm kɛ tɛtʋ tɑɑ.
Ɩsɩɩ pɑ kooluɣu olifinɑɑ pee
nɑ pukɑɣɑ yɑɑ pɑ sɛtʋɣʋʋ
lɛsɛŋnɑɑ tukuŋ nɑ pǝ́ kɑɑsɩ ɑcɑlǝsɑ tɔ.
Lɑŋhʋlʋmlɛ kʋtɑtǝpɩɩʋ
14 Yǝlɑɑ kɑkɑɑsɑɣɑ kɑ́ kuli pɑ nɔɔsɩ.
Pɑɑ wiliti nɑ pɑ́ sɑ Tɑcɑɑ sɔsɔɔntʋ.
Pɑɑ yoo yontu nɑ lɑŋhʋlʋmlɛ kɛ ilim tǝtʋlɛ.
15 Pɑɑ sɑ Tɑcɑɑ teeli kɛ ilim tǝlɩɩlɛ.
Tɑcɑɑ Ɩsɛɣɛlɩ Ɩsɔ hǝtɛ kɑ́ yɑɑ hɑlǝnɑ pǝ
tɑlɑ lʋm tɑɑ tɛtʋ nɑ teŋku nɔɣɔ hɔɣɔlǝŋ tɑɑ.
16 Tǝ nɩɩkɩ pǝ yooki yontu kɛ hɑtoo ɑntulinyɑ tǝnɑɣɑ tɔɔ sɩ:
Tɑmpɑnɑ tǝŋlʋ Ɩsɔ kɛlɛ teeli tʋ.
Ɩlɛnɑ mɑɑ tɔŋ sɩ: Mɑ tɑlɑ mɑ tǝnɑɣɑ,
mɑ tɑlɑ mɑ tǝnɑɣɑ. Mɑ lepɑɣɑ.
Wɑɑlɩ lɩɩlɑɑ lɩɩkɩ wɑɑlɩ,
wɑɑlɩ lɩɩlɑɑ lɩɩkɩ wɑɑlɩ.
17 Sɔɣɔntʋ sɔsɔɔntʋ nɑ pʋ́ʋ́ɣʋ́
nɑ puluɣu pǝ tɑŋɑ ɑtɛ yǝlɑɑ mɛ.
18 Ye wei ɩ́ nɩɩwɑ sɔɣɔntʋ
sɔsɔɔntʋ kɑkiisɑɣɑ nɑ ɩ́ seeki
ɩlɛ ɩ hoti pʋ́ʋ́ɣʋ́ tɑɑ.
Ye wei ɩ pǝsɑɑ nɑ ɩ́ lʋ nɑ ɩ lɩɩ,
ɩlɛ puluɣu nɑ́ɑ́ puu-ɩ.
Tɛʋ ɑnɑɑm tʋlɑɑ. Antulinyɑ selɑ ɩ kite tɛɛ.
19 Tɛtʋ cǝlǝɣɩ, tǝ yɑ pɔɣɔlɛɛ.
Tɛtʋ leŋliɣi.
20 Tɛtʋ tɑŋtǝɣɩ, ɩsɩɩ sʋlʋnyɔɔlʋ.
Tǝ seliɣi ɩsɩɩ cokǝle.
Tǝ ɩsɑɣɑtʋ pɛtɑ-tɩ, tǝ kɑɑ tɑsɑ kʋlʋɣʋ.
Kɑwulɑsɩ sɔsɔɔnsɩ tomle, Ɩsɔ kɑwulɑɣɑ cɑɑlʋɣʋ
21 Kʋyɑkʋ ŋkʋɣʋ Tɑcɑɑ kɑ́ kʋlɩ ɩsɔtɑɑ toŋtunɑɑ tɔɔ. Ɩ kɑ́ kʋlɩ ɑtɛ ɑwulɑɑ sɔsɑɑ tɔɔ, nɑ ɩ́ nɑɑsɩ-wɛ. 22 Pɑɑ kpeɣeli-wɛɣɛ tǝntǝmlɛ kɛ pʋ́ʋ́ɣʋ́ nɑkʋlɩ tɑɑ. Pɑɑ tǝkɩ pɑ tɔɔ kɛ́ sɑlǝkɑ nɔɣɔlʋ tɑɑ. Kʋyɛɛŋ pɑɣɑlɛ sikiɣi, ɩlɛnɑ pɑ́ nɑɑsɩ-wɛ.
23 Pɩɩ liɣiti ɩsɔtʋ.
Fɛɛlɛ kɑ pɩɩ ilim.
Mpi tɔ, Pǝ tǝnɑ pǝ tʋ Tɑcɑɑ kɑ́ tɔɣɔ kɑwulɑɣɑ kɛ Siyɔŋ
pʋɣʋ tɔɔ nɑ Yosɑlɛm.
Ɩ teeli kɑ́ nɑɑkɩ ɩ yǝlɑɑ nyʋɣʋ nyǝ́mɑ ɩsɛntɑɑ.