1 Piitimnɑɑ mɛ, ɩ́ kpǝtǝnɑ nɑ ɩ́ nɩɩ.

Yǝlɑɑ mɛ, ɩ́ ke ŋkpɑŋŋ.

Tɛtʋ nɑ tǝ tɑɑ nyǝm ɩ́ nɩɩ.

Antulinyɑ nɑ ɩ kʋlʋlʋm tǝnɑ ɩ́ lɑ ɑseetɑ nyǝ́mɑ.

2 Mpi tɔ, Tɑcɑɑ kɑ́ mʋ pɑ́ɑ́nɑ́ sɔsɔɔnɑ

nɑ piitimnɑɑ tǝnɑ.

Ɩ tɑɑ kpɑnɑ pɑ yoolɑɑ tǝnɑ.

Tɑcɑɑ tʋ ɩ tɑɑ sɩ ɩ kɑ́ kpiisi-wɛ.

Ɩ cɑɑ ɩ wɑkǝlɩ-wɛ.

3 Pɑ lɔwɑ pɑ tɑɑ mpɑ pǝ kʋwɑ tɔ.

Pɑ sǝtɑɑ sɔŋɑɑ.

Pɑ cɑlǝm kpeŋ pɔɔŋ tɔɔ.

4 Ɩsɔtʋlʋŋɑsɩ tǝnɑ kpɛsǝɣɩ.

Ɩsɔtɔnʋɣʋ kɑ́ kpili ɩsɩɩ nyɑɑlʋɣʋ.

Ɩsɔtʋlʋŋɑsɩ tǝnɑ hotiɣi ɩsɩɩ lɛsɛŋ hɑtʋ kʋwʋlʋtʋ.

Yɑɑ fiki hɑtʋ kʋwʋlʋtʋ.

5 Mɑ lɑɣɑtɛ mʋ pɑ́ɑ́nɑ́ kɛ ɩsɔtɑɑ.

Tɩɩ tii Ɩtɔm nyǝ́mɑ tɔɔ.

Ɩtɔm nyǝ́mɑ mɛɣɛ mɑ sɩɩwɑ sɩ mɑɑ kpiisi.

6 Cɑlǝm wɑɑsɑ Tɑcɑɑ lɑɣɑtɛ tɔɔ kɛ́.

Nim mɑtǝnɑ-tɛ.

Pǝ cɑɣɑ ɩsɩɩ ɩwɛɛsɩ nɑ pǝŋtʋlʋŋ pǝ cɑlǝm.

Nɑ ɩwɑɑŋ timpee nɑ pǝ nim.

Mpi tɔ, pɑ lɑpɑ Tɑcɑɑ kɛ kɔtɑɣɑ kɛ Posǝlɑ ɩcɑtɛ tɑɑ.

Pɑ kʋwɑ tuutuumɑ kɛ Ɩtɔm tɛtʋ tɑɑ.

7 Pɑ nɑ tɑɑlɛ nɑɑŋ pɑ hotinɑ.

Tǝyɑɣɑ nyǝŋ nɑ lɑtǝcɛnɑɑ pɑ hotɑɑ.

Ɩtɔm tɛtʋ nyɔɔwɑ cɑlǝm.

Nim hɑɣɑ mǝ kɑteŋɑ.

8 Tɑcɑɑ lɛɛtʋɣʋ kʋyɑkʋ kɛ́.

Pǝnɑɣɑ ŋkɑ ɩ lɛɛtǝɣǝnɑ Siyɔŋ

nyǝ́mɑ nɔɣɔ tɔɣɔlɛ.

9 Ɩtɔm lɔɔŋ lʋm kɑ́ pǝsɩ kɑɑloo.

Ɩtɔm tɛtʋ mʋsʋɣʋ kɑ́ pǝsɩ kɔkɔ mɑmɑcǝɣǝlɑsɩ.

Mǝ tɛtʋ kɑ́ pǝsɩ ɩsɩɩ kɔkɔ mʋkʋɣʋ kɑɑloo tɔ.

10 Kɑ kɑɑ te pɑɑ ɑhoo pɑɑ ilim.

Kɑ́ nyɔɔsɩ kɑ́ kʋlǝɣɩ ḿpʋ́ɣʋ́ tɑm tɔɔ kɛ́.

Tɛtʋ kɑ́ wɑkǝlɩ ḿpʋ́ɣʋ́ pɩɩsɩ tǝnɑɣɑ.

Nɔɣɔlʋ kɑɑ tǝŋnɑ tǝnɑɣɑ pɑɑ wulee.

11 Kpiisuɣu nɑ ɩluɣucɑntɛ pɑɑ cɑɣɑnɑ.

Kpiisiwulɑɣɑ nɑ kɑtǝkɑtʋɣʋ pɑɑ cɑɣɑ tǝnɑ.

Tɑcɑɑ kɑ́ yɔkɩ tǝ tǝnɑ nɑ tǝ́ sɑɑlɩ yem.

12 Sɔsɔ nɔɣɔlʋ ɩ kɑɑ wɛɛ sɩ pɑ́ kpɑ-ɩ wulɑʋ.

Pɩɩ kpiisi tǝ ɑwulumpiyɑ tǝnɑ.

13 Sɔsɔʋnɑɑ kɑ nyɔ pɑ kɑwulɑɣɑ tɛɛsɩ tɑɑ.

Kɔlɔŋ nɑ sɔwɑ kɛ pɑ koloosi ɑcɑlɛɛ tɑɑ.

Pɑ ɑcɑlɛɛ kɑ́ pǝsɩ tɑɑlɛ hɑsɩ tǝsʋʋlɛ,

nɑ tɑɑtɑɑnɑɑ lonte.

14 Wʋlɑɣɑ tɛtʋ tɑɑ nyǝ́mɑ kɑ́ suliɣi tɑɑlɛ wontu.

Pǝŋtʋlʋŋ kɑ́ yɑɑkɩ tǝmɑ.

Ahoo nyɑɑsǝlɑɑ kɑ́ pǝsɩ pɑ lonte kɛ tǝnɑ.

Tǝnɑɣɑ pɑɑ lɑ pɑ lonte kʋhɛɛsǝlɛ.

15 Tǝnɑɣɑ tʋm kɑ́ hɛɛ lonte, nɑ ɩ́ tʋ ɩ yɑlɑ.

Tʋm kɑ́ pɑpɩ-yɛɣɛ tǝnɑ,

nɑ ɩ́ kpeɣeli ɩ piyɑ kɛ ɩ kɔŋkɔŋ tɑɑ.

Tǝnɑɣɑ yepelekunɑɑ tǝnɑ kɑ koti nɑɑlɛ nɑɑlɛ.

16 Ɩ wiili Tɑcɑɑ tɑkǝlɑɣɑ tɑɑ nɑ ɩ́ kɑlɑ.

Wontu ntɩ tǝ tɑɑ nɑkʋlɩ kɑɑ lɑŋ.

Pɑɑ tǝ tɑɑ ŋku kʋ kɑɑ lɑŋ.

Mpi tɔ, Tɑcɑɑ mɑ́ mɑ yɔɣɔtǝnɑ nɑ mɑ nɔɣɔ.

Mɑ Feesuɣu kɑ́ kpeɣelinɑ wontu ntɩ.

17 Tɛtɛ kɛ mɑ tɔwɑ nɑ mɑ́ fɑɣɑ pɑ tɛtʋ nɑ mɑ niŋ.

Nɑ mɑ́ tɑlɑ-wɛɣɛ-tɩ nɑ ŋmǝnɑɣɑ.

Tɩɩ pǝsɩ pɑ nyǝntʋ kɛ pɑɑ pǝlee nɑ pɑ́ cɑɣɑ tǝ tɑɑ kɛ́

tɑm tɔɔ.