37
Ɩsekiyɑsɩ yɔɣɔtǝɣǝnɑ Ɩsɔ kʋyɔɣɔtʋtʋ tɛlǝsʋlʋ Ɩsɑyii
(Awulɑɑ II 19:1-7)
1 Wɑɑtʋ wei wulɑʋ Ɩsekiyɑsɩ nɩɩwɑ pɑ tɔm ntɩ ɩlɛnɑ ɩ́ cǝlɩ ɩ wontu nɑ lɑŋwɑkǝllɛ, nɑ ɩ́ suu lǝyɑɣɑ wontu ɩsɩɩ fɔlǝtɔnɑɑ tɑkɑ nɑ ɩ́ polo Tɑcɑɑ tǝyɑɣɑ tɑɑ. 2 Tǝnɑɣɑ ɩ tilɑ kɑwulɑɣɑ tǝyɑɣɑ nyʋɣʋ tʋ Ɩliyɑkim, nɑ tɑkǝlɑsɩ ŋmɑɑlʋ Sepǝnɑ, nɑ kɔtǝlɑɑ tɑɑ sɔsɔ. Pɑɑ suuwɑ lǝyɑɣɑ wontu kɛ́ ɩsɩɩ fɔlǝtɔnɑɑ tɑkɑ. Ɩlɛnɑ pɑ́ polo Amɔtɩ pǝyɑlʋ Ɩsɑyii, Ɩsɔ kʋyɔɣɔtʋtʋ tɛlǝsʋlʋ kiŋ, 3 nɑ pɑ́ heeli-ɩ sɩ: Lɑŋwɑkǝllɛ nɑ ŋkpɑŋʋɣʋ hɔm nɑ fɛɛlɛ kʋyɑkʋ kɛ sɑŋɑ kɛ́. Tǝ wɛɛ kɛ́ ɩsɩɩ ɑlɑɑ mpɑ pɑ cɑɑkɩ lʋlʋɣʋ, ɩlɛ tomɑ fɛɩ sɩ pɑ́ lʋlɩ tɔ. 4 Ɩsǝntɔ ntɑnyɩ nyɑ́ Ɩsɔ Tɑcɑɑ tɑ lɑŋ nɩɩʋ kɛ kʋtʋɣʋ ŋku, Asilii wulɑʋ tilinɑ ɩ pǝyɑlʋ Lɑpǝsɑkee nɑ ɩ́ tʋʋ Ɩsɔ weesuɣu tʋ tɔ. Ntɑnyɩ Tɑcɑɑ nyɑ́ Ɩsɔ kɑ́ hɔ ɩ ŋkpɑŋʋɣʋ kɛ ɩ kʋyɔɣɔtʋtʋ tɔɔ. Mpʋ tɔ, sǝlǝmǝnɑ yǝlɑɑ mpɑ pɑ kɑɑsɑɑ tɔ pɑ tɔɔ.
5 Ḿpʋ́ɣʋ́ wulɑʋ Ɩsekiyɑsɩ tillɑɑ mpɛ pɑ polɑ Ɩsɑyii kiŋ. 6 Ntɛnɑ Ɩsɑyii cɔ-wɛ sɩ:
Ɩ́ polo ɩ́ heeli mǝ cɑɑ wulɑʋ sɩ, Tɑcɑɑ tɔmɑ sɩ tɑɑ nyɑnɑ kʋtʋɣʋ ŋku Asilii wulɑʋ tilɑ ɩ yoolɑɑ nyʋɣʋ nyǝ́mɑ nɑ pɑ́ kɔɔ pɑ́ tʋʋ-m tɔ. 7 Tɑcɑɑ sɩ: Mɑɑ yele nɑ Asilii wulɑʋ nɩɩ tɔm nɑtǝlɩ. Pɩɩ tʋ ɩ tɑɑ nɑ ɩ́ mǝlɩ ɩ tɛtʋ tɑɑ, ɩlɛnɑ pɑ́ kʋ-ɩ tǝnɑ.
Asilii wulɑʋ nyɑɑsʋɣʋ kʋfɑm
(Awulɑɑ II 19:8-13)
8 Ḿpʋ́ɣʋ́ Asilii yoolɑɑ nyʋɣʋ tʋ Lɑpǝsɑkee nɩɩwɑ sɩ, wulɑʋ kʋlɑ Lɑkisi nɑ ɩ́ tii Lipinɑ tɔɔ. Ɩlɛnɑ ɩ́ polo tǝnɑ nɑ ɩ́ mɑɣɑnɑ-ɩ. 9 Ḿpʋ́ɣʋ́ pɑ heelɑ Asilii wulɑʋ kɛ tɔm sɩ: Ɩtiyopii wulɑʋ Tilɑkɑ polɑɑ sɩ ɩ yookinɑ-ɩ. Asilii wulɑʋ nɩɩ mpʋ, ɩlɛnɑ ɩ́ tili sɩ pɑ́ heeli Yutɑ wulɑʋ Ɩsekiyɑsɩ sɩ: 10 Ɩsɩɩ n tʋɣʋ Ɩsɔ kɛ́ nɑɑni sɩ, mɑ kɑɑ lɛɛkɩ Yosɑlɛm ɩcɑtɛ tɔ, n tʋsɑ nyɑ́ tǝɣɩ. 11 Nyɑ́ mɑɣɑmɑɣɑ n nɩɩwɑ ɩsǝnɑ Asilii ɑwulɑɑ lɑpǝnɑ tɛtʋnɑɑ tǝnɑ nɑ pɑ́ wɑkǝlɩ-tɩ tǝkpɑtɑɑ tɔ. Ɩlɛnɑ nyɑɑ tɛɛlǝɣɩ sɩ nyɑ́ tike n kɑ fitinɑ nɑ? 12 Mɑ cɔsɔnɑɑ wɑkǝlɑ Kosɑŋ nɑ Hɑlɑŋ nɑ Lesɛfɩ pǝ ɑcɑlɛɛ nɑ Ɩteni nyǝ́mɑ ɩcɑtɛ nte tǝ wɛ Telɑsɑɑ tɛtʋ tɑɑ tɔ. Piitimnɑɑ mpɛ pɑ tɩɩŋ tɑ pǝsɩ nɑ ɩ́ kenti pɑ ɑcɑlɛɛ tɔɔ se. 13 Hɑmɑtɩ, nɑ Alǝpɑtɩ, nɑ Lɑyii, nɑ Sefɑfɑyim, nɑ Henɑ, nɑ Afɑ pǝ ɑcɑlɛɛ ɑwulɑɑ wɛ le?
Ɩsekiyɑsɩ sǝlǝmǝɣɩ Ɩsɔ
(Awulɑɑ II 19:14-19)
14 Ḿpʋ́ɣʋ́ Ɩsekiyɑsɩ mʋ tɑkǝlɑɣɑ ŋkɑ Asilii tillɑɑ kɔnɑɑ tɔ nɑ ɩ́ kɑlɑ. Ɩlɛnɑ ɩ́ kpɑ Tɑcɑɑ tǝyɑɣɑ tɑɑ, nɑ ɩ́ hʋlɩ-tǝɣɩ Tɑcɑɑ. 15 Pǝ wɑɑlɩ kɛ́ ɩ sǝlǝmɑɑ sɩ:
16 Hɑɩ Pǝ tǝnɑ pǝ tʋ Tɑcɑɑ, Ɩsɛɣɛlɩ Ɩsɔ, nyɑ́ wei n cɑɣɑ ɩsɔtɑɑ tɑŋlɑɑ tɔɔ tɔ, nyɑ́ tike n kɛnɑ tɛtʋ kɑwulɑsɩ tǝnɑ Ɩsɔ. Nyɑ́ lɑpǝnɑ ɩsɔtɔnʋɣʋ nɑ tɛtʋ. 17 Hɑɩ, Tɑcɑɑ ke ŋkpɑŋŋ nɑ ń nɩɩ. Tɑcɑɑ kuli nyɑ́ ɩsɛ nɑ ń nɑ. Nɩɩ kʋtʋɣʋ ŋku Senɑkelipi tillɑɑ tʋʋkɩ Ɩsɔ weesuɣu tʋ nyɑ́ tɔ. 18 Tɑcɑɑ, tɑmpɑnɑ yɑɑ, Asilii ɑwulɑɑ kpiisɑ piitimnɑɑ lɛlɑɑ, nɑ pɑ́ wɑkǝlɩ pɑ tɛtʋ. 19 Hɑlǝnɑ pɑ́ wɔ pɛlɛ pɑ tɩɩŋ kʋlɑlɑɑŋ kɛ kɔkɔ, nɑ pɑ́ wɑkǝlɩ-ɩ. Mpi tɔ, ɩ kɛ́ tɑɑsɩ nɑ pɛɛ nnɑ yǝlɑɑ niŋ sɑɑkɑɑ tɔɣɔ. 20 Hɑɩ, Tɑcɑɑ Ɩsɔ, yɑ-tʋɣʋ Senɑkelipi niŋ tɑɑ. Tɛtʋ tǝnɑ kɑwulɑsɩ ɩ́ nyɩ sɩ nyɑ́ tike ntɛ́ Tɑcɑɑ.
Ɩsɑyii tɛlǝsǝɣɩ Tɑcɑɑ kʋcɔcɔtʋ kɛ Ɩsekiyɑsɩ
(Awulɑɑ II 19:20-34)
21 Mpʋɣʋlɛ Amɔtɩ pǝyɑlʋ Ɩsɑyii tilɑɑ, nɑ pɑ́ heeli wulɑʋ Ɩsekiyɑsɩ sɩ, Ɩsɛɣɛlɩ Ɩsɔ Tɑcɑɑ yɔɣɔtɑɑ sɩ: Mɑ nɩɩwɑ sǝlǝmʋɣʋ ŋku n sǝlǝmɑ-m Asilii wulɑʋ Senɑkelipi tɔm tɔ. 22 Hɑlɩ Tɑcɑɑ yɔɣɔtɑ Senɑkelipi sɩ:
Yosɑlɛm ɩcɑtɛ kʋpɑntɛ ńtɛ́ tǝ footiɣi-ŋ kɛ́ nɑ tǝ́ woŋiɣi-ŋ
nɑ tǝ́ sɔɔlǝɣɩ-ŋ kɑsɔɔlɑsɩ.
23 Hɑlɩ Ɩsɛɣɛlɩ nɑŋŋ tʋ kɛ n kulinɑ nɔɣɔ
nɑ ń tʋʋ nɑ ń sɑɣɑtɩ?
Nɑ ń nyǝnǝɣɩ-m nɑ kɑlɑmpɑɑnɩ?
24 Nyɑ́ tǝmlɛ nyǝ́mɑ nɔɣɔ kɛ n tʋʋnɑ-m.
Hɑlǝnɑ ń tɔ sɩ yoou kɛɛkɛnɑɑ kɑtɑtǝlɑɣɑ tɔɔ kɛ́
n pǝsɑɑ nɑ ń kpɑ pɔɔŋ nyɔɔŋ tɑɑ.
Nɑ ń tɑlɑ Lipɑŋ ɩcɑtɛ heele tɑɑ.
Nɑ ń sɛtɩ ɩ tɩɩŋ kʋpɑmpɑŋ sɔsɔɔŋ,
nɑ ń kpɑ nɑ ń tɑlɑ comcom nɔɣɔ tɑɑ,
kɛ hɔtʋ sɔsɔɔntʋ tɛɛ.
25 Sɩ nyɑ́ hulɑ lɔkɔnɑɑ nɑ ń nyɔɔ pɑ lʋm.
Pǝyele n kɑ́ fɛlɩ nɔɔhǝlɛ kɛ
Icipiti pusi tǝnɑ tɔɔ nɑ sɩ́ nyɔɔ.
26 Senɑkelipi n tɑ nɩɩ tɑɑ sɩ mɑ́ tɑɣɑnǝnɑ
nɑ mɑ́ sɩɩ ḿpʋ́ɣʋ́ hɑtoo lɔŋtɑɑ?
Nɔɔnɔɔ kɛlɛ mɑ yelɑɑ sɩ pǝ yoosi
Ɩlɛnɑ Senɑkelipi nɑ́ɑ́ pǝsǝɣɩ koloosi ɑcɑlɛɛ kɛ ncɑɑ.
27 A tɑɑ yǝlɑɑ kɛ́ ɑcɑmɑɑ kɛ́,
sɔɣɔntʋ kpɑ-wɛ nɑ pǝ́ liɣiti-wɛ.
Pɑ wɛ kɛ́ ɩsɩɩ tɑɑlɛ nyɩɩtʋ kʋlɛkǝlɛkǝtʋ.
Yɑɑ nti pɑ tuuwɑ kutuluŋ tɔɔ nɑ wʋlɑɣɑ kʋ-tɩ,
nɑ tǝ tɑ pɩɩtɑ tɔ.
28 Mɑ nyǝmɑ-ŋ kɛ́,
pɑɑ n cɑɣɑɑ, yɑɑ n sʋʋkɩ yɑɑ n lɩɩkɩ.
Pǝyele mɑ nyǝmɑ́ sɑɑ wei nyɑ́ tɑɑ kpɑɑkǝnɑ-m tɔ.
29 Nyɑ́ tɑɑ kpɑɑkǝnɑ-m,
mɑ nɩɩwɑ nyɑ́ kɑlɑmpɑɑnɩ tɔm.
Pǝ tɔɔ kɛ́ mɑɑ tʋ-ŋ mɩɩnɑ kukuule.
Mɑɑ tʋ-ŋ mɑ kpɑɣɑnʋkpɑsɩ kɛ nyɑ́ nɔɣɔ tɑɑ.
Ɩlɛnɑ mɑ́ mǝlǝnɑ-ŋ nɑ mpɑɑʋ ŋku n kɔmnɑɑ tɔ.
30 Ye pǝ kɑɑsɑ Ɩsekiyɑsɩ nyɑ́, tǝnɛ ɩnɩ tǝ́ lɑ-ŋ ɩsɩɩ kʋhʋlʋm. Pǝntɔ nɑ pǝnte ɑlɛɛlɑ kɛ ɩ́ kɑ́ tɔɣɔ. Ɩlɛnɑ pǝnɑɣɑ tooso nyǝŋkɑ ɩ́ hɑlɑ nɑ ɩ́ kʋ nɑ ɩ́ sɔ tɩɩŋ wei pɑ yɑɑ sɩ lɛsɛŋnɑɑ tɔ nɑ ɩ́ tɔɣɔ pǝ kʋlʋlʋm. 31 Mpɑ pɩɩ kɑɑsɩ Yutɑ kpekǝle tɑɑ tɔ, pɑɑ wɛɛ kɛ́ ɩsɩɩ tʋɣʋ kɑŋʋɣʋ lilɑ kɛ teu nɑ kʋ́ lʋlɩ pee tɔ. 32 Mpi tɔ, yǝlɑɑ kɑkɑɑsɑɣɑ kɑ́ lɩɩnɑ Yosɑlɛm. Mpɑ pǝ sɔɔwɑ tɔ pɑɑ lɩɩnɑ Siyɔŋ pʋɣʋ tɑɑ.
Ɩsǝnɑ Pǝ tǝnɑ pǝ tʋ Tɑcɑɑ kɑ́ lɑ ɩ sɔɔlʋɣʋ sɔsɔɔŋkʋ tɑɑ tɔɣɔlɛ. 33 Pǝ tɔɔ kɛ́ Tɑcɑɑ yɔɣɔtǝɣɩ Asilii wulɑʋ sɩ: N kɑɑ pǝsɩ nɑ ń sʋʋ ɩcɑtɛ ntɛ tǝ tɑɑ. Nyɑ́ tɔtɔlɑɑ tɑɑ nɔɣɔlʋ kɑɑ tɔ nyǝmlɛ kɛ tǝ tɑɑ. Yɑɑ ɩ́ kenti ɩ tɔɔ kɛ́ kpɑ́lʋ́ɣʋ́ nɑ ɩ́ kpǝtǝnɑ-tɛ. Pǝyele ɩ kɑɑ lo hɑpǝlɛ tɑkɑ kɛ́ ɩcɑtɛ ntɛ tǝ kiŋ. 34 Ɩ mpɑɑʋ kʋkɔmʋɣʋ kɛ ɩ kɑ́ tǝŋ nɑ ɩ́ mǝlǝnɑ ɩ wɑɑlɩ. Ɩ kɑɑ tɑsɑ ɩcɑtɛ tɑɑ kɛ́ sʋʋʋ. Tɑcɑɑ mɑ́ mɑ yɔɣɔtǝnɑ mpʋ. 35 Tɑcɑɑ sɩ: Mɑɑ kenti ɩcɑtɛ tǝnɛ tǝ tɔɔ kɛ́. Mɑɑ wɑɑsɩ-tɛɣɛ mɑ nɑ mɑ tǝmlɛ tʋ Tɑfiiti pɑ tɔɔ.
Asilii nyǝ́mɑ tɛɛʋ nɑ Senɑkelipi sǝm
(Awulɑɑ II 19:35-37)
36 Ḿpʋ́ɣʋ́ Tɑcɑɑ ɩsɔtɑɑ tillu tiiwɑ Asilii yoolɑɑ tǝsikile kɛ ɑhoo ɑnɩ. Ɩlɛnɑ ɩ́ kʋ yoolɑɑ iyisi nɩɩnʋwɑ nɑ nɩɩnɑɑsɑ nɑ kɑkpɑsɩ (185000). Tɛʋ femɑ nɑ mpɑ pǝ kɑɑsɑɑ tɔ pɑ́ kʋlɩ, ɩlɛnɑ pɑ́ mɑɣɑnɑ sɩ sǝtɑɑ suwɑ tǝsikile. 37 Tǝnɑɣɑlɛ Asilii wulɑʋ Senɑkelipi kpɛsɑ ɩ tǝsikile nɑ Ɩ́ mǝlɩ Ninifi ɩcɑtɛ tɑɑ nɑ ɩ́ cɑɣɑ tǝnɑ. 38 Ḿpʋ́ɣʋ́ kʋyɑkʋ nɑkʋlɩ ɩ sʋʋ ɩ tʋɣʋ Nisǝlɔkɩ kutuluɣu tɑɑ nɑ ɩ́ tɔŋɑ-kʋɣʋ luŋuɣu. Ɩlɛnɑ ɩ pǝyɑlɑɑ Atǝlɑmelɛkɩ nɑ Sɑlɛsɛɛ pɑ kʋ-ɩ nɑ lɑɣɑtɛ nɑ pɑ́ se nɑ pɑ́ polo Alɑlɑɑ tɛtʋ tɑɑ. Ntɛnɑ ɩ pǝyɑlʋ lɛlʋ Asɑhɑtɔŋ nɑ́ɑ́ lɛɛtɩ ɩ lonte tɑɑ.