Ɩ́ puɣusi mɑ yǝlɑɑ ɩ́ puɣusi mɑ yǝlɑɑ.

2 Ɩ́ yɔɣɔtǝnɑ Yosɑlɛm.

Ɩ́ mɑkɩ kɑpusi sɩ nyɑ́ wɑhɑlɑ tǝmɑ tɛmɑ.

Pǝ́cɔ́ pɑ hɩɩsɑ nyɑ́ ɩsɑɣɑtʋ.

Tɑcɑɑ fɛlɑ-ŋ nyɑ́ ɩsɑɣɑtʋ fɔɔtɔ kɛ tɔm nɑɑlɛ.

3 Nɔɣɔlʋ kiisiɣinɑ sɩ:

Ɩ́ tɑɣɑnɩ Tɑcɑɑ kɛ mpɑɑʋ.

Ɩ́ teti tɑ́ Ɩsɔ kɛ́ mpɑɑʋ kɛ wʋlɑɣɑ tɛtʋ tɑɑ.

Ɩ́ tʋ́ tɑ́ Ɩsɔ kɛ́ hɑpǝlɛ.

4 Ɩ́ yɔkɩ pɔɔŋ nɑ pulɑsɩ tǝnɑ.

Ɩ́ suuli tɛtɛkɑ tǝnɑ.

Tontoŋɑ nɑ kʋtɑɑlomiŋ ɩ́ pǝsɩ tɛtʋ kʋhǝntǝtʋ.

Timpi pǝ kʋlɑɑ tɔ pǝ pǝsɩ tɛtɛkɑ sɔsɔɔnɑ.

5 Ɩlɛ pɩɩ kɛɛlɩ Tɑcɑɑ teeli tɔɔ.

Yǝlɑɑ tǝnɑ kɑ́ nɑ-ɩ.

Mpi tɔ, Tɑcɑɑ nɔɣɔ yɔɣɔtǝnɑ.

6 Ḿpʋ́ɣʋ́ nɔɣɔ kɑlɩ kɑ yɔɣɔtɑɑ sɩ:

Kiisi.

Ntɛnɑ nɔɣɔ lɛŋkɑ cɔ sɩ:

Mɑ kiisi suwe?

Kiisi sɩ:

Yǝlɑɑ tǝnɑ wɛɛ kɛ́ ɩsɩɩ nyɩɩtʋ.

Nɑ pɑ teu ɩsɩɩ tɑɑlɛ tɑɑ hɛtʋ.

7 Tɑcɑɑ heelim ɩ́ mɑpɑ,

nyɩɩtʋ wʋlǝɣɩ kɛ́, nɑ hɛtʋ tɔ́.

Tɑmpɑnɑ tɔɔ, yǝlɑɑ wɛɛ kɛ́ ɩsɩɩ nyɩɩtʋ.

8 Nyɩɩlʋɣʋ wʋlǝɣɩ, hɛtʋɣʋ lontiliɣi.

Amɑ tɑ Ɩsɔ kʋyɔɣɔtʋtʋ nɑ́ wɛ tɑm tɔɔ kɛ́.

9 Yosɑlɛm yǝlɑɑ mpɑ mɛ

ɩ́ kpɑɑlǝɣɩ tɔm kʋpɑntʋ tɔ.

Ɩ́ kpɑ pʋɣʋ kʋkʋlʋɣʋ tɔɔ.

Siyɔŋ nyǝ́mɑ ɩ́ kiisinɑ tomɑ.

Tɔm kʋpɑntʋ kpɑɑllɑɑ mɛ,

Ɩ́ kiisi ɩ tɑɑ nyɑ́.

Ɩ́ kpɑɑlɩ Yutɑ ɑcɑlɛɛ sɩ:

Ɩ́ nyǝnɩ, mǝ Ɩsɔ kɔŋnɑ ntɛ́.

10 Ɩ́ nyǝnɩ Tɑcɑɑ Ɩsɔ kɔŋnɑ ntɛ́ nɑ tomɑ,

Tɑcɑɑ toŋ tʋ-ɩ sɔsɔɔntʋ.

Tɑcɑɑ nɑ ɩ kɑsɛɛsɩ kɛ́.

Nɑ ɩ tǝmlɛ kʋlʋlʋm wɛ ɩ nɔɣɔ tɔɔ.

11 Tɑcɑɑ wɛɛ kɛ́ ɩsɩɩ tiikilu,

ɩ kɑ́ tiiki ɩ kɑlǝkǝŋ.

Ɩ kɑ́ kpeɣeli ɩwɛɛsɩ kɛ ɩ niŋ tɑɑ,

nɑ ɩ́ kpɛkɩ-sǝɣɩ ɩ tɔɔ.

Tɑcɑɑ kɑ́ tiiki heeŋ totonɑɑ

mpɑ pɑ wɛnɑ piyɑ tɔ tǝpɑmm.

12 Awe mɑɣɑsǝnɑ teŋku lʋm kɛ ɩ ntɑntɑkʋ tɑɑ?

Awe mɑɣɑsɑ ɩsɔtɔnʋɣʋ wɑŋ nɑ ɩ ntɑŋtɑkʋ?

Awe mɑɣɑsɑ ɑtɛ tɛtʋ kɛ ɩŋmɛsɑʋ nɑ ɩ́ ŋmɑɣɑ?

Awe mɑɣɑsɑ pɔɔŋ nɑ pulɑsɩ kɛ sɑnǝyɑ tɔɔ?

13 Awe mɑɣɑsɑ Tɑcɑɑ Feesuɣu?

Awe tɑsǝnɑ-ɩ lɑɣɑtʋ?

Yɑɑ ɑwe sɛɣɛsǝnɑ-ɩ?

14 Tɑcɑɑ nɑ ɑwe pɑ cɑɣɑnɑ nɑ pʋntʋ sɛɣɛsɩ-ɩ?

Yɑɑ ɑwe hʋlǝnɑ-ɩ tɑmpɑnɑ mpɑɑʋ?

Awe tʋ Ɩsɔ kɛ lǝmɑɣɑsɛɛ,

nɑ ɩ́ hʋlɩ-ɩ nyǝm mpɑɑʋ?

15 Nyǝnɩ, piitimnɑɑ wɛ Tɑcɑɑ kɛ́ ɩsɩɩ lʋm lɩɩkʋɣʋ

kpekiti tɑɑ nɑ pǝ́ tosi tɔ.

Yɑɑ ɩsɩɩ kɑnyǝŋɑ pile kɛ sɑnǝyɑ tɔɔ.

Tɛtʋnɑɑ mpɑ lʋm cɔɔnɑɑ tɔ,

pɛlɛ pɑ wɛ kɛ́ ɩsɩɩ mʋsʋɣʋ kʋlʋɣʋ tɔ.

16 Lipɑŋ hɔtʋɣʋ tɑɑ tɑɑsɩ ɩɩ tɑkɩ

kɔtɑɣɑ tǝlɑtɛ tɔɔ kɔkɔ tɑɣɑnʋɣʋ.

Kʋ tɑɑ tɑɑlɛ wontu pɑɣɑlɛ tɑ tɑlɑ sɩ

pɑ lɑnɑ-tǝɣɩ kɔtɑɣɑ ŋkɑ kɔkɔ lusɑ kɑ tǝnɑ tɔ.

17 Piitimnɑɑ tǝnɑ kɛ́ kpɛtɛ kɛ Tɑcɑɑ ɩsɛntɑɑ kɛ́.

Pǝ tɑ kɛ-ɩ pʋlʋpʋ nɔɣɔlʋ.

18 Aweɣe ɩ́ cɑɑ ɩ́ kɛɛsǝnɑ Ɩsɔ?

Yɑɑ pepe lɛɛsʋɣʋ kɛ ɩ́ kɑ́ lu ɩ lonte?

19 Koolu lukinɑ tʋɣʋ,

ɩlɛnɑ wʋlɑnɑɑ lɑtʋ nɑ́ɑ́ wɑɑsɩ-kʋɣʋ wʋlɑ.

Ɩlɛnɑ ɩ tʋ-kʋɣʋ liɣitee nyǝɣǝtʋ ɑlukpɑlisi sɩ pǝ lɑ kɑcɔkɑ.

20 Kʋnyɔntʋ wei ɩ kɑɑ pǝsɩ nɑ ɩ́ hiki mpʋ tɔ,

tɑɑkukulɑɣɑ ŋkɑ pukɑsɩ ɩɩ pǝsǝɣɩ tɔɣɔ ɩ cɑɑkɩ.

Ɩlɛnɑ ɩ́ nɑ́ sɑɑkʋlʋ kʋpɑŋ nɑ ɩ́ sɑɑkɩ-ɩ

lɛɛsʋɣʋ ŋku kɩɩ ciɣitiɣi tɔ.

21 Mɛ ɩ́ tɑɑ nyɩ-tɩ tɑɑ, yɑɑ ɩ́ tɑɑ nɩɩ-tɩ?

Pɑ tɑɑ hʋlɩ-mɛɣɛ-tǝɣɩ hɑtoo kɑncɑɑlɑɣɑ?

Ɩ́ tɑɑ cɛkǝnɑ tɛtʋ kite tɔm?

22 Ɩsɔ cɑɣɑ hɑtoo tɛtʋ nyʋɣʋ tɑɑ,

nɑ tǝ tɑɑ yǝlɑɑ nɑ́ɑ́ wɛ ɩsɩɩ cǝlǝŋ.

Ɩ pɔwɑ ɩsɔtɔnʋɣʋ kɛ́ ɩsɩɩ pʋʋɣʋ fɛlɛfɛlɛ.

Ɩ hɛtɑ-kʋɣʋ ɩsɩɩ ɩ cokǝle sɩ ɩ lɑkɩ ɩ tǝcɑɣɑlɛ.

23 Ɩnɩ ɩ pǝsǝɣǝnɑ ɑtɛ ɑwulumpiyɑ kɛ yem.

Ɩsɔ pǝsǝɣɩ ɑntulinyɑ hʋʋlɑɑ kɛ kpɛtɛ.

24 Mpi sɩ pɑɑ sɔɔkɩ-wɛ nɑ pɑ́ tuu-wɛ tɔ.

Mpi sɩ pɑɑ nyɔɔkɩ nɑ pɑ́ kɑŋ lilɑ kɛ tɛtʋ tɑɑ tɔ

Tɑcɑɑ tɛmɑ pɑ tɔɔ kɛ́ heelim wosuɣu nɑ pɑ́ wʋlɩ.

Nɑ pǝ kuu-wɛ ɩsɩɩ kɑcuculɑɣɑ kpɑkʋɣʋʋ nyɩɩliyɑ tɔ.

25 Ḿpʋ́ɣʋ́ Ɩsɔ Nɑŋŋtʋ yɔɣɔtɑɑ sɩ:

Aweɣe ɩ́ kɛɛsǝɣǝnɑ-m,

nɑ mɑ́ nɑ-ɩ tǝ́ nǝɣǝsɩ?

26 Ɩ́ kpɑɑsɩ ɩsɛ nɑ ɩ́ nyǝnɩ ɩsɔtʋlʋŋɑsɩ.

Awe lɑpǝnɑ-sɩ?

Wei ɩ lɑkɩ nɑ sɩ kpekǝle tǝnɑ tɔŋ teitei tɔɣɔ.

Ɩ yɑɑkɩ pɑɑ ŋkɑɣɑ kɑ hǝtɛ,

nɑ ɩ toŋ sɔsɔɔŋ nɑ ɩ tomɑ sɔsɔɔnɑ,

nɑkǝlɩ kɑɑ lɑŋǝɣɩ.

27 Ee, Yɑkɔpʋ, pepe tɔɔ kɛ́ n yɔɣɔtǝɣɩ mpʋ?

Ɩsɛɣɛlɩ pepe tɔɔ kɛ́ n tɔŋ sɩ:

Tɑcɑɑ tɑ nyɩ mpi pɩɩ mɑɣɑnɑ-m tɔ?

Aɑɩyee sɩ:

Mɑ Ɩsɔ ɩɩ lɑkɩ pʋlʋ sɩ ɩ́ sɛɛnɑ mɑ tɔɔ.

28 N tɑ cɛkǝnɑ tɑɑ?

N tɑ nɩɩ-tɩ sɩ Tɑcɑɑ Ɩsɔ kɛlɛ tɑm tɔɔ tʋ?

Ɩsɔ lɑpǝnɑ tɛtʋ tǝnɑsɩ tǝnɑ.

Pɩɩ cɑɑmǝɣɩ Ɩsɔ, pǝ́cɔ́ ɩɩ kɑɑkɩ.

Pǝyele Ɩsɔ nyǝm fɛɩ cɛkǝnɑʋ.

29 Ɩsɔ hɑɑkɩ toŋ kɛ mpɑ pɑ kɑwɑ tɔ.

Tɑcɑɑ sɔɔsǝɣɩ ɑpɑlʋtʋ kɛ mpɑ pǝ nɩɩwɑ tɔ.

30 Ɩfepiyɑ kɑɑkɩ nɑ pɑ tomɑ tɛŋ.

Mpɑ pɑ kiiwɑ teu tɔ pɑ hotiɣi.

31 Amɑ mpɑ pɑ hɑ pɑ tǝɣɩ Tɑcɑɑ tɔ,

pɑ tomɑ sɔɔsǝɣɩ kɛ́.

Pɑ kʋlǝɣɩ kɛ́ ɩsɩɩ hɛkǝlɛnɑɑ.

Pɑ kpɑkǝɣɩ ɑsewɑ pɑɑ kɑɑkɩ.

Pɑ tɔŋ kɛ́ pɩɩ nɩɩkɩ-wɛ.