1 Mɑ tɑɑpɑlɑɑ mɛ, ɩ́ tɑɑ tǝŋǝɣɩ Tɑcɑɑ teeli tʋ Yesu Kilisiti mpɑɑ nɑ ɩ́ tɑsǝɣɩ yǝlɑɑ kɛ fɑɣɑsʋɣʋ. 2 Ye ɩsɩɩ ɩ́ kotɑɑ nɑ ɩ́ cɑɣɑɑ kɛlɛ, nɑ nɔɣɔlʋ sʋʋ nɑ ɩ́ lɛɛ wʋlɑ kukuule nɑ ɩ́ suu wontu kʋpɑntʋ, nɑ kʋnyɔntʋ nɔɣɔlʋ nɑ́ɑ́ sʋʋ tɔtɔ, nɑ ɩ́lɛ́ ɩ wontu cǝlɑ cǝlǝɣɩ cǝlǝɣɩ. 3 Ɩlɛnɑ ɩ́ fɑɣɑsɩ wei ɩ suu wontu kʋpɑntʋ kɛ mpʋ tɔ nɑ ɩ́ se ɩ́lɛ́, nɑ ɩ́ tɔmɩ-ɩ sɩ: Kɔɔ nɑ ń cɑɣɑ tǝcɑɣɑlɛ kʋpɑntɛ tǝnɛ tǝ tɑɑ. Ɩlɛnɑ ɩ́ tɔ kʋnyɔntʋ sɩ: Nyɑɑ sǝŋ mpʋ, yɑɑ kɔɔ nɑ ń sopi mɑ nɔɔhɛɛ tɛɛ cǝnɛɣɛ ɑtɛ. 4 Ɩ́ lɑkɩ mpʋ tɔ pǝ tɑɣɑ ɩ́ fɑɣɑsǝɣɩ mǝ tǝmɑɣɑlɛ? Nɑ ɩsǝnɑ ɩ́ mɑɣɑsǝɣɩ mpʋ tɔ pǝ fɛɩ teu.

5 Mɑ tɑɑpɑlɑɑ kʋpɑmɑ mɛ, ɩ́ nɩɩ mɑ tɔm tǝnɛ sɩ, Ɩsɔ nyǝnɑ ɑntulinyɑ ɩnɛ ɩ tɑɑ kɛ́ nɑ ɩ́ lǝsɩ kʋnyɔntʋnɑɑ sɩ pɑ́ pǝsɩ ɑpilɑ kɛ ɩ mpɑɑʋ tɑɑ, nɑ pɑ́ hiki kɑwulɑɣɑ ŋkɑ ɩ tɔmɑ sɩ ɩ kɑ́ cɛlɑ mpɑ pɑ sɔɔlɑ-ɩ tɔ. 6 Ɩlɛnɑ mɛ mɩɩ mǝlɩ nɑ ɩ́ nyǝnǝɣɩ kʋnyɔntʋnɑɑ mpɛɣɛ yem suwe? Pǝ tɑɣɑ ɑpilɑ ɑnɩ ɑɑ cɑɑkǝnɑ mǝ tɔm nɑ ɑ́ hɔŋ-mɛ nɑ ɑ́ pukinɑ tɔm tǝhʋʋlɛ tɑɑ? 7 Pǝ tɑɣɑ kʋlʋmɑɑ mpɛ pɑ footiɣinɑ hǝtɛ kʋpɑntɛ nte Ɩsɔ hɑ-mɛ tɔ?

8 Ye ɩ́ tǝŋǝɣɩ Ɩsɔ Kɑwulɑɣɑ kʋsǝsɩɩtʋ nti pɑ ŋmɑɑwɑ Ɩsɔ Tɔm tɑɑ sɩ: Sɔɔlɩ nyɑ́ tɔɣɔntǝlɛ ɩsɩɩ n kɑ sɔɔlɩ nyɑ́ tɩ tɔ, pǝ wɛ teu. 9 Amɑ ye ɩ́ fɑɣɑsǝɣɩ yǝlɑɑ, ɩ́ lɑkɩ ɩsɑɣɑtʋ kɛ́. Nɑ ye pɑ kɛɛsǝnɑ nti pɑ sɩɩwɑ tɔ mǝ tɔm sǝpɑɣɑ, mpi tɔ ɩɩ tǝŋǝɣɩ kʋsǝsɩɩtʋ. 10 Nɑ ɩsǝnɑ pǝ wɛɛ tɔɣɔlɛ sɩ ye nɔɣɔlʋ tǝŋɑ kʋsǝsɩɩtʋ kʋheelitu tǝnɑ nɑ ɩ́ kɔɔ ɩ́ kpisi tǝ tɑɑ kʋlʋmtʋ kɛ tǝŋʋɣʋ, pǝ tǝnɑɣɑ ɩ kpisɑɑ. 11 Pǝ tɑɣɑ pʋlʋ tɔɔ, wei ɩnɩ ɩ tɔmɑ sɩ: Tɑɑ lɑ wɑsɑŋkɑlǝtʋ tɔ, ɩnɩ ɩ tɔmnɑ tɔtɔ sɩ: Tɑɑ kʋ yʋlʋ. Mpʋ tɔ, ye n tɑ lɑ wɑsɑŋkɑlǝtʋ nɑ ń kʋ yʋlʋ, n kpisɑ kʋsǝsɩɩtʋ tǝŋʋɣʋ kɛ́. 12 Ɩ́ yɔɣɔtǝɣɩ nɑ ɩ́ lɑkɩ ɩsɩɩ yǝlɑɑ mpɑ pɑɑ kɛɛsǝnɑ Ɩsɔ Tɔm nti tǝ hɛtǝɣɩ-tʋɣʋ tɑ yomle tɑɑ nɑ pɑ́ hʋʋnɑ tɔ. 13 Ɩsɔ kɑɑ nyǝnɩ wei ɩ tɑ nyǝnɩ ɩ tɔɣɔntǝlɛ pǝtɔɔtǝlɛ tɔ ɩ pǝtɔɔtǝlɛ kɛ hʋʋlɛ wule. Pɑɑ nɑ mpʋ tɔ, ye wei ɩ nyǝnɑ lɛlɑɑ pǝtɔɔtǝlɛ, pʋntʋ tɔm kɑ́ sǝŋnɑ hʋʋlɛ tɑɑ.

14 Mɑ tɑɑpɑlɑɑ mɛ, ye yʋlʋ yɔɣɔtɑɑ sɩ ɩ tɛmɑ Ɩsɔ nɑ ɩ tɑɑ pǝyele pɩɩ hʋlǝɣɩ ḿpʋ́ɣʋ́ ɩ tǝmɑ tɑɑ, pǝ tɑɣɑ yem kɛlɛ? Ɩ Ɩsɔ tɑɑ tɛmnɑʋ mpɩ pɩɩ yɑpɩ-ɩ? 15 Ye ɩsɩɩ nyɑ́ tɔɣɔntǝlɛ ɑpɑlʋ yɑɑ ɑlʋ lɑŋnɑ ntɛɣɛ kʋtɑkʋɣʋ, nɑ tɔɣɔnɑɣɑ mɑɣɑmɑɣɑ tɑ tɑlɑ-ɩ. 16 Ɩlɛnɑ ń tɔmɩ-ɩ sɩ: Tɔʋ, pǝ lɑpɑ tɑsɑ, Ɩsɔ ɩ́ hɑ-ŋ ɑlɑɑfǝyɑ, kʋ nyɑ́ wɑtʋ, tɔɣɔ kʋtɔɣɔʋ kɛ teu. Pǝyele n tɑ cɛlɛ-ɩ mpi ɩ lɑŋɑɑ tɔ, ɩlɛ pepeɣe pɩɩ wɑɑsɩ-ɩ? 17 Ḿpʋ́ɣʋ́ pǝ wɛɛ, ye yʋlʋ tɛmɑ ɩ tɑɑ nɑ Ɩsɔ nɑ ɩɩ lɑkɩ pǝ tǝmɑ, ɩ tɑɑ tɛm mǝlɑ yem kɛ́.

18 Ntɑnyɩ nɔɣɔlʋ kɑ́ tɔ sɩ: Tɑɑ tɛm nɑ Ɩsɔ tike kɛ lɛlʋ lɑkɩ, nɑ lɛlʋ nɑ́ɑ́ lɑkɩ tǝmɑ tike. Ɩlɛ mɑ cɔɔ pʋntʋ sɩ: Hʋlɩ-m ɩsǝnɑ yʋlʋ kɑ tɛ ɩ tɑɑ nɑ Ɩsɔ nɑ ɩɩ lɑkɩ pǝ tǝmɑ tɔ, nɑ mɑɑ hʋlɩ-ŋ́ lɛlʋ tɑɑ tɛm nɑ ɩ tǝmɑ tɑɑ. 19 N tɛmɑ nyɑ́ tɑɑ sɩ Ɩsɔ kʋlʋm tike wɛnnɑ, tɑmpɑnɑ kɛ́. Alɔɣɑɑ mɑɣɑmɑɣɑ nɑ́ tɛmɑ pɑ tɑɑ kɛ́ mpʋ, hɑlǝnɑ pɑ́ seliɣinɑ sɔɣɔntʋ. 20 Yʋlʋ kʋmɛlɛŋ nyɑ́, n cɑɑ ń cɛkǝnɑ sɩ tɑɑ tɛmnɑʋ nɑ Ɩsɔ kɛ́ yem nɑ tǝmɑ fɛɩ, ɩɩ wɑɑsǝɣɩ pʋlʋ? 21 Tɔʋ, ɩsǝnɑɣɑ pǝ lɑpɑ nɑ Ɩsɔ nyǝnɩ tɑ cɑɑnɑɑ cɑɑ sɔsɔ Apǝlɑhɑm kɛ yʋlʋpɑŋ ye? Ɩ kʋlɑpʋtʋ kiŋ kɛ wɑɑtʋ wei ɩ lɑɑkɑɣɑ ɩ pǝyɑlʋ Ɩsɑɑkɑ kɛ kɔtɑɣɑ tǝlɑtɛ tɔɔ tɔɣɔ. 22 N tɑ nɑ mpʋ tɑɑ? Ɩ tɛmɑ Ɩsɔ nɑ ɩ tɑɑ pǝyele tǝmɑ nɑ wɛ pǝ tɑɑ tɔtɔ. Nɑ pǝ tǝnɑ pǝ kpɛntɑ mpʋ tɔɣɔ ɩ tɑɑ tɛmnɑʋ kɛ Ɩsɔ tewɑ tǝkpɑtɑɑ. 23 Ɩlɛnɑ pǝ́ lɑ́ teitei ɩsɩɩ pɑ ŋmɑɑ Ɩsɔ Tɔm tɔ sɩ: Apǝlɑhɑm tɛmɑ Ɩsɔ nɑ ɩ tɑɑ, nɑ ɩ tɑɑ tɛm mpǝɣɩ Ɩsɔ nɑ́ nɑwɑ nɑ ɩ́ yɑɑ-ɩ yʋlʋpɑŋ nɑ ɩ́ mʋ-ɩ. Nɑ Ɩsɔ yɑɑ-ɩ ɩ ceu. 24 Pǝnɛntɛ mǝ mɑɣɑmɑɣɑ ɩ́ nɑwɑɣɑlɛ sɩ yʋlʋ tǝmɑ kɛ Ɩsɔ nyǝnǝɣǝnɑ-ɩ yʋlʋpɑŋ, pǝ tɑɣɑ ɩ tɑɑ tɛm nɑ Ɩsɔ pǝ tɔɔ tike.

25 Mpʋ tɔtɔɣɔ pǝ lɑpɑ ɑpɑlɑɑ tǝnɑ ɑlʋ Lɑhɑpɩ kiŋ, Ɩsɔ nyǝnɑ-ɩ yʋlʋpɑŋ kɛ ɩ tǝmlɛ tɔɔ kɛ́ wɑɑtʋ wei ɩ mʋ tillɑɑ kɛ ɩ tɛ́ nɑ ɩ́ cɔɔlǝnɑ-wɛɣɛ mpɑɑʋ tɔ. 26 Ye ɩsɩɩ pʋlʋpʋ hǝntɑɑ nɑ pɩɩ feesiɣi pǝ sǝpɑɣɑ. Mpʋ tɔtɔɣɔ Ɩsɔ tɑɑ tɛmnɑʋ kɛ yem nɑ́ kɛ́ kʋsǝpǝm.