1 Tɔʋ pǝnɛntɛ ɑpilɑ mɛ, mɩɩ nɩɩ. Ɩ́ wii nɑ ɩ́ mɔlǝɣɩ kpɑkpɑɑ. Pǝ tɑɣɑ pʋlʋ tɔɔ, ɑsɑlɑʋ kɑ́ mɑɣɑnɑ-mɛ. 2 Mǝ wɛnɑʋ pʋɣʋtɑ yem, pǝ mʋʋ mǝ tɔɔ wontu. 3 Kɑkɔtɑɣɑ sɛɛsɑ mǝ wʋlɑnɑɑ nɑ mǝ liɣitee. Kɑkɔtɑɣɑ ŋkɛ kɑɑ kulinɑ mǝ wɑɑlɩ nɑ kɑ́ nyɑɣɑ mǝ tɔnǝŋ ɩsɩɩ kɔkɔ. Ɩ́ kɑɑ wɛnɑʋ kɛ yem kɛ́ kʋyɛɛŋ kɑntǝkɑɣɑ nyǝŋ ɩnɛ ɩ tɑɑ. 4 Ɩ́ kisɑ mǝ tǝmlɛ nyǝ́mɑ mpɑ pɑ hɑlɑ mǝ tɑwɑ tɔɣɔ fɛlʋɣʋ, ɩ́ nɩɩ pɛlɛ pɑ tɔŋnɑ wulɑ tɔ. Mpɑ pɑ tɑɣɑnǝɣɩ mǝ tɑwɑ kʋlʋlʋm tɔ pɑ kɑkiisɑsɩ tɑlɑ Pǝ tǝnɑ pǝ tʋ Tɑcɑɑ Ɩsɔ ŋkpɑŋŋ tɑɑ. 5 Ɩ́ tɔɣɑ leleŋ nɑ ɩ́ lɑ́ ɩsǝnɑ ɩ́ sɔɔlɑɑ tɔɣɔ ɑtɛ cǝnɛ. Ɩ́ pɑɣɑlɑɑ ɩsɩɩ pɑ́ kʋ-mɛ nɑ pɑ́ tɔɣɔ. 6 Ɩ́ tʋ tɑsǝkǝlɛ kɛ wei ɩ fɛɩnɑ tɑɑlɩ tɔ, nɑ ɩ́ yele nɑ pɑ́ kʋ-ɩ nɑ ɩ́lɛ́ ɩ tɩɩ sumɑ mpʋ.

7 Mɑ tɑɑpɑlɑɑ ɩ́ cɑɣɑnɑ suulu nɑ hɑlǝnɑ Tɑcɑɑ kɔntɛ tɑlɑ. Ɩ́ nyǝnnɑ ɩsǝnɑ hɑtʋ kɑntǝlǝɣɩ nɑ ɩ́ cɑɣɑnɑ suulu nɑ hɑlǝnɑ ɩ hɑlǝm kʋtɔɣɔʋ kʋpɑŋkʋ pɩɩ tɔ. Ɩ tɑŋǝɣǝnɑ suulu kɛ toomɑɣɑ tɛʋ nɑ sɑlɑŋ nyǝŋkʋ. 8 Mɛ tɔtɔ mɩɩ cɑɣɑnɑ suulu kɛ mpʋ. Ɩ́ nyɑɣɑ ɑpɑlʋtʋ kɛ sɔsɔm, Tɑcɑɑ kɔntɛ wʋsɑɑ.

9 Mɑ tɑɑpɑlɑɑ, nɔɣɔlʋ ɩ́ tɑɑ pooli ɩ tɔɣɔntǝlɛ, pǝ́ tɑɑ kɔɔ nɑ Ɩsɔ hʋʋnɑ-mɛ. Tɔm hʋʋlʋ wʋsɑɑ ɩnɩ ɩ cɑɑnɑ ntɛɣɛ sʋʋʋ. 10 Mɑ tɑɑpɑlɑɑ mɛ ɩ́ nyǝnnɑ Ɩsɔ kʋyɔɣɔtʋtʋ tɛlǝsǝlɑɑ mpɑ pɑ yɔɣɔtɑ Tɑcɑɑ tɔm tɔ nɑ ɩ́ tǝŋ pɑ ɑkpɑɑ nɑ ɩ́ kɑntǝlɩ wɑɑtʋ wei wɑhɑlɑ mɑkǝnɑ-mɛ tɔ. 11 Pɑ kɑntǝlʋɣʋ tɔɔ kɛ́ tǝ tɔŋnɑ-wɛɣɛ yɑɑʋ sɩ leleŋ nɩɩlɑɑ. Ɩ nɩɩwɑ Soopu tɔm kɛ ɩsǝnɑ ɩ kɑntǝlǝnɑ suulu tɔ. Nɑ ɩ́ nyǝmɑ́ pǝ kɔmɑ nɑ pǝ́ tɛ́ nɑ Tɑcɑɑ hɑ-ɩ mpi tɔ. Tɑcɑɑ wɛnɑ yʋlʋ pǝtɔɔtǝlɛ kɛ sɔsɔm kɛ́, nɑ ɩ kʋpɑntʋ fɛɩ kɛɛsʋɣʋ.

12 Mɑ tɑɑpɑlɑɑ mɛ ɩ́ tɑɑ tuunɑ pʋlʋpʋɣʋ pɑɑ pǝcɔ. Ɩ́ tɑɑ tuunɑ ɩsɔtɔnʋɣʋ, pǝyele ɩ́ tɑɑ tuunɑ ɑtɛ tɔtɔ, ɩ́ tɑɑ tɩɩ tuunɑ pʋlʋpʋ te. Ye pǝ kɛ́ n kɑ́ tisi, ɩlɛ n tisi sɩ: Nn. Nɑ ye pǝ fɛɩ n kɑ tisi, ɩlɛ n tɔ́ sɩ: Aɑɩ. Tɔfɔ ɩ́ kɔŋ nɑ ɩ́ cɑŋ ɩ́ sʋʋ Ɩsɔ hʋʋnɑʋ tɑɑ.

13 Ye wɑhɑlɑ mɑɣɑnɑ mǝ tɑɑ wei, pʋntʋ ɩ́ sǝlǝmɩ Ɩsɔ. Nɑ ye wei ɩ nɩɩkɩ leleŋ, pʋntʋ nɑ́ɑ́ yoo sɑm yontu. 14 Ye pǝ wɩɩkɩ mǝ tɑɑ wei, pʋntʋ ɩ́ yɑɑ Yesu sɛɛlɑɑ kpekǝle nyʋɣʋ nyǝ́mɑ nɑ pɛlɛ pɑ́ sǝlǝmǝnɑ-ɩ Ɩsɔ, nɑ pɑ́ yɑɑ Tɑcɑɑ hǝtɛ nɑ pɑ́ pǝlɩ nim kɛ ɩ tɔɔ. 15 Sǝlǝmʋɣʋ ŋku pɑ sǝlǝmɑ mpʋ nɑ pɑ́ tɛmɑ Tɑcɑɑ nɑ pɑ tɑɑ tɔ kɩɩ wɑɑsɩ kʋtɔntʋ. Tɑcɑɑ kɑ́ hɑ-ɩ ɑlɑɑfǝyɑ nɑ pɑ́ hɩɩsɩ ɩsɑɣɑtʋnɑɑ mpɑ ɩ kɑ lɑpɑ tɔ. 16 Ye ɩ́ wɑkǝlǝnɑ tǝmɑ, ɩ́ hǝntɩ tǝmɑɣɑ ɑtɛ. Ɩ́ sǝlǝmǝɣǝnɑ mǝ tǝmɑɣɑ Ɩsɔ nɑ ɩ́ kɑ́ hiki ɑlɑɑfǝyɑ. Ye yʋlʋpɑŋ ɩ́ sǝlǝmɑ Ɩsɔ nɑ ɩsǝlɛ kʋsɛɛmlɛ pǝ lɑkɩ tǝmlɛ kɛ sɔsɔm kɛ́. 17 Ilii kɑ kɛ́ yʋlʋ ɩsɩɩ tɑ́ tɔtɔɣɔ. Ɩ sǝlǝmɑ Ɩsɔ nɑ ɩsǝlɛ kʋsɛɛmlɛ sɩ tɛʋ ɩ́ tɑɑ nɩɩ, nɑ tɛʋ tɑ tosi ɑtɛɣɛ hɑlɩ pɩɩsɩ tooso nɑ hɔɣɔlʋɣʋ. 18 Ḿpʋ́ɣʋ́ ɩ kɔmɑ nɑ ɩ́ tɑsɑ Ɩsɔ kɛ́ sǝlǝmʋɣʋ, ɩlɛnɑ tɛʋ lɩɩnɑ ɩsɔtɑɑ nɑ kʋ nɩɩ nɑ kʋtɔɣɔʋ lɑ́.

19 Mɑ tɑɑpɑlɑɑ, ye mǝ tɑɑ nɔɣɔlʋ hɑ tɑmpɑnɑ kɛ siɣile nɑ ɩ tɔɣɔntǝlɛ kpɑ-ɩ nɑ ɩ́ mǝŋnɑ, 20 mɩɩ nyɩ sɩ wei ɩnɩ ɩ kpɑ-ɩ ḿpʋ́ɣʋ́ ɩ tǝtoolle nɑ ɩ́ mǝŋnɑ tɔ, pʋntʋ yɑpɑ ɩ lǝsɑɣɑ kɛ sǝm nɔɣɔ tɑɑ kɛ́, nɑ ɩ lɑpʋ mpʋ tɔ pǝ hɩɩsɑ ɩsɑɣɑtʋ tuutuumɑ kɛ́.