1 Ḿpʋ́ɣʋ́ kʋyɑkʋ nɑkʋlɩ ɩsɔtɑɑ yǝlɑɑ polɑ Tɑcɑɑ kiŋ tɔtɔ, nɑ Sɑtɑnɩ wɛ pɑ hɛkʋ. 2 Ntɛnɑ Tɑcɑɑ pɔɔsɩ-ɩ sɩ: N lɩɩnɑ le?

Ɩlɛnɑ Sɑtɑnɩ cɔ-ɩ sɩ: Mɑ lɩɩwɑɣɑ sɩ mɑ cɔɔkɩ tɛtʋ. 3 Kɛlɛnɑ Tɑcɑɑ sɩ: Ɩsǝntɔ n tɑ lɑŋ mɑ tǝmlɛ tʋ Soopu kɛ nɑʋ. Ɩ fɛɩnɑ sɑɑlɑ kɛ́ ɑtɛ. Ɩ fɛɩnɑ kɑwɑliyɑ, ɩ tǝŋǝɣɩ tɑmpɑnɑ, ɩ nyɑŋnɑ-m, nɑ ɩ́ cɔlǝɣɩ ɩsɑɣɑtʋ. Ɩlɛnɑ Ɩsɔ tɑsɑ sɩ: Sɑtɑnɩ nyɑ́ yelinɑ nɑ mɑ́ tʋ́ Soopu kɛ wɑhɑlɑ kɛ yem. Amɑ ɩ́lɛ́ ɩ kisɑ kʋwɑkǝlǝm kɛ́ tǝsɑɣɑsɑɣɑ. 4 Tǝnɑɣɑlɛ Sɑtɑnɩ nɔɣɔ tǝkpɑʋ sɩ pɑ tukɑ ɩtuule sɩ: Pɑ hɑɑ pʋ́ʋ́ɣʋ́ kɛ́ nɑ kʋlɛ kʋ́ hɑ. Yʋlʋ wɛnɑ mpi tɔɣɔ ɩ kʋɣɩ nɑ ɩ́ yɑnɑ ɩ weesuɣu. 5 Tɔʋ, Ɩsɔ tʋ́ niŋ kɛ Soopu tɔnʋɣʋ nɑ ɩ mʋwɑ tɔɔ nɑ ń nɑ. Ye ɩ tɑ tʋʋ-ŋ, ɩlɛ mɑ yele nɔɣɔ.

6 Ntɛnɑ Tɑcɑɑ heeli Sɑtɑnɩ sɩ: Tɔʋ, mɑ tʋ Soopu kɛ nyɑ́ niŋ tɑɑ. Amɑ tɑɑ tokinɑ ɩ weesuɣu kɛ́.

7 Ḿpʋ́ɣʋ́ Sɑtɑnɩ yelɑ Tɑcɑɑ nɑ ɩ́ tɛɛ. Ɩlɛnɑ ɩ́ tʋ́ Soopu kɛ hiŋ ɩsɑɣɑŋ kɛ pǝ kpɑɣɑʋ ɩ nyʋɣʋ nɑ pǝ́ tii ɩ nɔntɑɑlǝŋ tɔ. 8 Ɩlɛnɑ Soopu cɑɣɑ tɔlʋmɑ tɑɑ, nɑ ɩ́ hiki tɑtɑɣɑ nɑ ɩ́ kɑɑlǝɣǝnɑ ɩ tɩ.

9 Ḿpʋ́ɣʋ́ Soopu ɑlʋ tɔmɑ-ɩ sɩ: N sɛɛsɑ ɩsǝlɛ sɩ ń tɑɑ wɑkǝlǝnɑ Ɩsɔ suwe? Tʋʋ-ɩ, nɑ ń sɩ nɑ ń hɛɛsɩ. 10 Ntɛnɑ Soopu cɔ-ɩ sɩ: Alʋ nyɑ́, n yɔɣɔtǝɣɩ mpʋ ɩsɩɩ kpɑŋtʋ suwe? Ye Ɩsɔ kɑ lɑkɑɣɑ-tʋɣʋ kʋpɑntʋ nɑ tɑ́ lɑŋɑ hɛɛwɑ. Ɩ́ kɔmɑ nɑ ɩ́ lɑkɩ-tʋɣʋ ɩsɑɣɑtʋ tǝ kisi?

Pɑɑ nɑ Soopu wɑhɑlɑ ɩnǝɣɩ mpʋ tɔ, ɩ tɑ pǝntǝnɑ Ɩsɔ kɛ́ nɑtǝlǝɣɩ ɩ yɔɣɔtɑɣɑ tɑɑ.

11 Soopu kɑ wɛnɑ tɑɑpɑlɑɑ tooso kɛ́. Mpɛɣɛlɛ Temɑŋ tʋ Ɩlifɑsɩ, nɑ Suhɑ tʋ Pilitɑtɩ, nɑ Nɑɑmɑ tʋ Sofɑɑ. Pɑ nɩɩwɑ Soopu wʋsɑsɩ tɔm, ɩlɛnɑ pɑ́ polo sɩ pɑ wiiliɣɩ-ɩ nɑ pɑ́ cɑɣɑ ɩ kiŋ nɑ pɑ́ hɛɛsɩ ɩ lɑŋlɛ. 12 Pɑ loosɑ Soopu kɛ pooluŋ nɑ pɑ́ wɩɩ-ɩ nyǝm. Pɑ kpǝtǝnɑ-ɩ nɑ pɑ́ cɛkǝnɑ-ɩ, ɩlɛnɑ pɑ́ tʋlɩ nɔɔsɩ, nɑ pɑ́ cǝlɩ pɑ tokonɑɑ, nɑ pɑ́ ŋmɩɩsɩ pɑ nyɔɔŋ tɑɑ kɛ́ tɛtʋ. 13 Ɩlɛnɑ pɑ́ cɑɣɑ ɑtɛɣɛ ilim nɑ ɑhoo kɛ kʋyɛɛŋ nɑɑtosompɔɣɔlɑɣɑ. Pɑ tɑ yɔɣɔtǝnɑ-ɩ nɑtǝlɩ kɛ ɩ wʋsɑsɩ nsɩ sɩ kɑtɑtǝlɑɣɑ tɔɔ.