1 Soopu sɩ: Weesuɣu lɩɩ-m sɔŋ kɛ́.

Mɑɑ wii mɑ tɩ tɔm.

Mɑ lɑŋlɛ kǝlɑ wɑkǝlʋɣʋ, mɑ kɑɑ tɑsɑ sum.

2 Ɩsɔ, mɑɑ heeli-ŋ sɩ, tɑɑ kʋ mɑ tɔm.

Amɑ heeli-m mpi pǝ tɔɔ n yookinɑ-m tɔ.

3 Pǝ wɛ-ŋ teu sɩ ń ŋmɑkǝlɩ

mɑ́ wei n ŋmɑwɑ tɔ,

nɑ ń yele nɑ pǝ́ lɑnɑ ɑsɑɣɑɑ nɑ?

4 Anɩ n nɑɑkɩ nɑ pǝ́ kǝlɩ yǝlɑɑ,

nɑ ń mɑɣɑsǝɣɩ nɑ pǝ́ kǝlǝɣɩ-wɛ.

5 Ɩsɔ nyɑ́ weesuɣu topilɑ ɩsɩɩ yʋlʋ nyǝŋkʋ kɛ?

Yɑɑ nyɑ́ pɩɩsɩ tɛɛkɩ ɩsɩɩ yʋlʋ pǝyɑɣɑ nyǝnsɩ?

6 Pepe tɔɔ kɛ́ n pɛɛkǝɣɩ mɑ tɑsǝkǝlɛ

nɑ ń feŋiɣi sɩ ń kuli mɑ ɩsɑɣɑtʋ tɔɔ?

7 Anɩ n nyǝmɑ́ sɩ mɑ tɑ wɑkǝlɩ,

pǝ́cɔ́ nɔɣɔlʋ kɑɑ yɑ-m nyɑ́ niŋ tɑɑ.

8 Nyɑ́ niŋ ŋmɑnɑ mɑ tǝnɑ,

nɑ ń cɑɑ sɩ n wɑkǝlǝɣɩ-m.

9 Ɩsɔ tɔɔsɩ sɩ, nyɑ́ ŋmɑnɑ-m, ɩsɩɩ cʋɣʋ.

Ɩlɛ n kɑ́ tɑɣɑnɩ-m yɔkʋɣʋ nɑ mɑ́ pǝsɩ mʋsʋɣʋ nɑ?

10 Nyɑ́ ŋmɑɣɑnɑ-m mɑ too tɑɑ,

ɩsɩɩ nɑɑlǝm kiikuɣu fulɑɣɑ tɑɑ tɔ.

11 Nyɑ́ lɑpǝnɑ-m mʋwɑ nɑ holɑ,

nɑ ń wɑɑsɩ pǝ tɔɔ kɛ́ nɑntʋ, nɑ ń suu-m tɔnʋɣʋ.

12 Ɩlɛnɑ ń lɑ-m pɛɛlɛɛ,

nɑ ń hɑ-m weesuɣu nɑ ń feŋiɣi kʋ tɔɔ.

13 Amɑ mɑ nyǝmɑ́ nyɑ́ lǝmɑɣɑsɛɛ wenɑ

n kɑ ŋmɛsɑ nyɑ́ lotu tɑɑ tɔ.

14 N feŋiɣi kɛ́ sɩ, ye n nɑwɑ mɑ wɑkǝlɑɑ

ɩlɛ n kisi-m suulu hʋ́lʋ́ɣʋ́.

15 Ye mɑ wɑkǝlǝnɑ-ŋ mɑ lepɑɣɑ,

pɑɑ mɑ tɔm tewɑ, nyʋɣʋ kɑmɑ ḿpʋ́ɣʋ́.

Nɑ wɑhɑlɑ nɩɩ-m nɑ fɛɛlɛ kʋɣʋ-m.

16 Ye mɑ kʋsɑ nyʋɣʋ ɩlɛ n tʋ mɑ wɑɑlɩ,

ɩsɩɩ tɔɣɔlɑɣɑ, nɑ ń kʋlǝɣɩ mɑ tɔɔ nɑ piti tǝmɑ.

17 Nɑ ń kɔŋnɑ-m ɑseetɑ nyǝ́mɑ

mpɑ pɑɑ cɑɑkɩ-m tɔ, nɑ nyɑ́ pɑ́ɑ́nɑ́ sɔɔsǝɣɩ mɑ tɔɔ.

Nɑ ń kpɛtǝlǝɣɩ-m nɑ wɑhɑlɑnɑɑ.

18 Pepe tɔɔ kɛ́ Ɩsɔ lǝsɑ-m mɑ too lotu tɑɑ?

Ɩsǝntɔ mɑɑ sǝpɑ nɔɣɔlʋ tɑ nɑ-m.

19 Pɑɑ tɛɛnɑ pǝlɑɑʋ tɑɑ kɛ́ kpɑkpɑɑ,

nɑ pǝ́ wɛɛ ɩsɩɩ pɑ tɑ lʋlɩ-m.

20 Mɑ weesuɣu kʋyɛɛŋ kɑɑsɑ-m pǝ́cɔ́ tike ntɔ.

Ɩlɛ Ɩsɔ, yele-m mpʋ nɑ mɑ́

yɔɔlǝnɑ wɛɛ pǝ́cɔ́ wei ɩ kɑɑsɑ-m tɔ.

21 Ɩlɛnɑ pǝ́cɔ́ mɑ́ polo ɑtɛtǝlɛ tɑɑ.

Mɑ kɑɑ tɑsɑ mǝlʋɣʋ kɛ cǝnɛ.

Tɛtʋ ntɩ tǝ tɑɑ kɛ́ sǝkpɛtʋɣʋ ɑnɑɑm wɛɛ.

22 Sǝkpɛtʋɣʋ tɛtʋ wɛɛ kɛ́ ɩsɩɩ ɑhoo.

Ɩsotom sɔsɔɔm kɛ́, pʋlʋ tɑ tǝŋ.

Ɩlɛnɑ nyɑɑlǝm nɑ́ɑ́ wɛɛ ɩsɩɩ pǝ yukuɣu tɔ.