2 Pʋwɛ! Amɑ ɩ́ wɛnɑ yʋlʋ lǝmɑɣɑsɛɛ yoo!

Mǝ sǝm wɑɑlɩ, ɑ kɑɑ tɑsɑ wɛɛʋ.

3 Mɑ́ mɑɣɑmɑɣɑ mɑ wɛnɑ nyǝmtʋ kɛ

ḿpʋ́ɣʋ́ ɩsɩɩ mɛ, ɩ́ tɑ́ tɛɛ-m.

Pɑɑ ɑwe nɑ́ pǝsǝɣɩ nɑ ɩ́ yɔɣɔtɩ ɩsɩɩ mɛ.

4 Mɑ pǝsɑ yʋlʋ wei ɩ tɑɑpɑlɑɑ pɑɑkǝnɑ tɔɣɔ.

Pǝyele mɑ yɑɑkǝnɑ Ɩsɔ sɩ ɩ́ cɔ-m.

Mɑ siɣisɑɑ kɛ́ mɑ fɛɩ kɑwɑlɑɣɑ.

5 Mɛ mpɑ pǝ cɑɣɑnɑɑ tɔ, mǝ footiɣi wɑhɑlɑ tʋ kɛ́.

Ḿpʋ́ɣʋ́ pɑ́ tusiɣi wei ɩ cɛŋlǝɣɩ tɔ.

6 Nmɩɩlɑɑ nɑ Ɩsɔ pɑ́ɑ́nɑ́ kpɑɑsǝlɑɑ,

cɑɣɑnɑ pɑ tǝɣɩ pɑ tɛɛsɩ tɑɑ kɛ́.

Mpɛ pɑ toŋ ntɛ́ pɑ Ɩsɔ.

7-8 Pɔɔsɩ sumɑsɩ nɑ tɔlɑ nɑ

tiinɑ ɑ kɑ́ sɛɣɛsɩ-ŋ,

nɑ tɛtʋ hʋlɩ-ŋ tɔtɔ.

9 Kʋŋmɑŋmɑm mpi pǝ tɑ nyǝnɑ sɩ,

Tɑcɑɑ niŋ lɑpǝnɑ pǝ tǝnɑ?

10 Ɩnɩ ɩ tɔkǝnɑ ɩ kʋlɑpǝm tǝnɑ weesuɣu,

nɑ yǝlɑɑ tǝnɑ feesiŋ kɛ ɩ niŋ tɑɑ.

11 Ɩsɩɩ ŋkpɑŋʋɣʋ nɩɩkʋɣʋ tɔm kʋyɔɣɔtʋtʋ tɔ,

ḿpʋ́ɣʋ́ nɔɣɔ nɑ́ nɩɩkɩ tɔɣɔnɑɣɑ leleŋ.

12 Akpɑtǝlɑɑ nɑ mpɑ pɑ pɩɩsɩ tɔɔwɑ tɔ,

pɑ wɛnɑ lǝmɑɣɑsɛɛ nɑ nyǝm kɛ́.

13 Amɑ Tɑcɑɑ kɛlɛ lǝmɑɣɑsɛɛ nɑ nyǝm mɑɣɑmɑɣɑ tʋ,

nɑ lɑɣɑtʋ tɑsʋlʋ nɑ toŋ tʋ.

14 Ye ɩ yɔkɑ mpi, nɔɣɔlʋ kɑɑ ŋmɑ́,

ye ɩ tǝkɑ wei, nɔɣɔlʋ kɑɑ tʋlɩ-ɩ.

15 Ye ɩ kpɑ tɛʋ, ɩlɛ wʋlɑɣɑ wʋlɩ.

Ɩ́ tʋlɑ-kʋ, ɩlɛ lʋm wɑkǝlɩ tɛtʋ.

16 Ɩ wɛnɑ tomɑ kɛ́ nɑ ɩ́ nyǝmɑ́ ɑ lɑpǝnɑʋ,

nɑ ɩ́ tɔkɑ letɑɑ nɑ mpɑ pɑ tolisiɣi lɛlɑɑ tɔ.

17 Ɩ yeki nɑ pɑ́ kuuki tɛtʋ nyʋɣʋ nyǝ́mɑ, nɑ pɑ́ tɛɛkǝnɑ.

Ɩ wɑkǝlǝɣɩ hʋʋlɑɑ lǝmɑɣɑsɛɛ.

18 Nɑ ɩ́ cɛkɩ kʋhɔkʋm mpi ɑwulɑɑ kɑ

hɔkɑ yǝlɑɑ tɔ, nɑ ɩ́ hɔkǝɣɩ pɑ mɑɣɑmɑɣɑ.

19 Ɩ yeki nɑ pɑ́ kuuki kɔtǝlɑɑ,

nɑ ɩ́ pǝsǝɣɩ toŋtʋnɑɑ mpɑ pǝ cɑɣɑnɑ

teu tɔɣɔ kpɛntǝlɑsɩ.

20 Ɩ tǝkǝɣɩ nɔɔleleŋ nyǝ́mɑ nɔɔsɩ,

nɑ ɩ́ kʋɣɩ ɑkpɑtǝlɑɑ lǝmɑɣɑsɛɛ.

21 Ɩ yeki nɑ pɑ́ footiɣi sɔsɑɑ,

nɑ ɩ́ yɔkǝɣɩ ŋmɑkǝllɑɑ toŋ.

22 Ɩ cɛkɩ pɑ sǝkpɛtʋɣʋ ɑnɑɑm kɛ́,

nɑ ɩ́ kɔnɑ nyɑɑlǝm kɛ ɑtɛtǝlɛ sǝkpɛtʋɣʋ tɑɑ.

23 Ɩ yeki kɛ́ nɑ piitimnɑɑ huki,

ɩlɛnɑ ɩ́ wɑkǝlɩ-wɛ nɑ ɩ́ yɑsɩ-wɛɣɛ pooluŋ,

ɩlɛnɑ ɩ́ kpiisi-wɛ.

24 Ɩ kʋɣɩ pɑ nyʋɣʋ nyǝ́mɑ lɑɣɑtʋ,

nɑ pɑ́ cɔɔkɩ yem kɛ́ nyɩɩtʋ tɑɑ,

pɑ fɛɩnɑ tǝpote.

25 Pɑ hɑkǝɣɩ yem kɛ́ sǝkpɛtʋɣʋ tɛɛ,

nyɑɑlǝm fɛɩ, nɑ pɑ́ cɛŋlǝɣɩ yem ɩsɩɩ

mpɑ sʋlʋm kʋwɑ tɔ.