1 Ḿpʋ́ɣʋ́ Soopu tɑsɑɑ sɩ:

Mɑ feesiŋ liki. Mɑ kʋyɛɛŋ tɛŋ nɑ pǝlɑɑʋ tɑŋɑ-m.

2 Woŋlɑɑ tɑmɑ-m kɛ́ nɑ pɑ́ tʋʋkɩ-m,

nɑ mɑ kpisiɣi tom kɛ ɑhoo.

3 Hɑɩ, Ɩsɔ sǝŋ nyɑ́ mɑɣɑmɑɣɑ kɛ

mɑ nɔɣɔ tɔɔ kɛ́ hʋʋlɛ tɑɑ.

Ye pǝ tɑɣɑ nyɑ́, mɑ fɛɩnɑ nɔɣɔlʋ.

4 N kentɑ pɑ lǝmɑɣɑsɛɛ tɔɔ kɛ́,

n kɑɑ yele sɩ pɑ́ kǝlɩ.

5 Pɑ wɛɛ kɛ́ ɩsɩɩ pɑ tukuɣu ɩtuule sɩ:

Yʋlʋ yɑɑ ɩ tɑɑpɑlɑɑ nɑ pɑ́ tɑlɑ ɩ tɔɣɔnɑɣɑ,

nɑ ɩ piyɑ nɑ́ɑ́ tɑŋ nɑ sɩ niŋ wʋlɩ.

6 Mɑɣɑ yǝlɑɑ yookinɑ yontu,

nɑ pɑ́ tɔɔkɩ mɑ ɩsɛntɑɑ kɛ́ ntɑɣɑmɑ.

7 Wɑhɑlɑ wɑkǝlɑ mɑ ɩsɛntɑɑ,

nɑ mɑ́ pǝsɩ ɩsɩɩ ɩlɛɛmʋɣʋ.

8 Kʋsiɣisim tǝŋlɑɑ nɑɑkɩ mɑ wʋsɑsɩ,

pɑ nɔɣɔ tɑɑ fɛɩ kete.

Kʋpɑmɑ kʋlǝɣɩ ɑsɑɣɑɑ tɔɔ.

9 Tɑmpɑnɑ tǝŋlʋ nɑ́ kɑmɑ nyʋɣʋ kɛ ɩ mpɑɑʋ tɑɑ kɛ́.

Nɑ wei ɩ fɛɩnɑ kɑwɑlɑɣɑ tɔ, ɩ toŋ sɔɔsǝɣɩ.

10 Mɑ tɑɑpɑlɑɑ, ɩ́ kɔɔ mǝ tǝnɑ.

Mɑɑ nɑɑkɩ mǝ tɑɑ kɛ́ lǝmɑɣɑsɛɛ tʋ.

11 Mɑ kʋyɛɛŋ tɛɛwɑ, nɑ pǝ́ kpɛŋnɑ

tǝmɑ nnɑ ɑ pǝlɛ mɑ tʋwɑ tɔ.

Mpi mɑ nyɩɩlǝɣɩ sɔsɔm kɛ hɑtoo mɑ tɑɑ tɔ pǝ wɑkǝlɑɑ.

12 Mpɛ pɑ yɑɑkɩ ɑhoo kɛ ilim kɛ́,

nɑ sǝkpɛtʋɣʋ ɩ nyɑlɑɑ ɩlɛ,

pɑ tɔŋ sɩ pǝ cɑɑ nyɑɑlʋɣʋ.

13 Atɛtǝlɛ kɛ mɑ tɑŋɑɑ sɩ

mɑ́ sʋʋ mɑ́ hǝntɩ tǝ sǝkpɛtʋɣʋ tɑɑ.

14 Pǝlɑɑʋ nyɑɣɑlɛ mɑ cɑɑ,

sonsompee mɛɣɛlɛ mɑ too nɑ mɑ kɔɣɔ.

15 Mɑ fɛɩnɑ tǝtɛɛllɛ tɔtɔ,

nɑ pǝ́ tɩɩ nii ɩsǝlɛ.

16 Mɑɑ kpɛŋnɑ-tɛɣɛ nɑ mɑ́ tiinɑ sǝtɑɑ tɛ,

nɑ mɑ́ hǝntǝnɑ mʋsʋɣʋ tɑɑ.