2 Ɩsɔ ɩɩ tɛɛlǝɣɩ yʋlʋ sɩ ɩ́ wɑɑsɩ-ɩ.

Amɑ ye yʋlʋ wɛnɑ nyʋɣʋ tɑɑ mɑɣɑsǝm, ɩ tǝɣɩ ɩ wɛɛkɩ teu.

3 Nɑ yʋlʋ ɩ́ siɣisɑɑ yɑɑ ɩ tewɑ tǝkpɑtɑɑ,

weɣe pǝ wɑɑsǝɣɩ Tomɑ tǝnɑ tʋ?

4 Pǝ tɑɣɑ nyɑ́ ɩsɔsɛɛlɛ teu tɔɔ kɛ́

ɩ hɔŋ nyɑ́ ŋkpɑŋʋɣʋ nɑ ɩ́ hʋʋkǝnɑ-ŋ.

5 Nyɑ́ kɑwɑlɑɣɑ kɑtɑtǝlɑɣɑ nɑ nyɑ́ ɩsɑɣɑtʋ

tɑm nyǝntʋ tɔɔ kɛ́ Ɩsɔ hɔŋ nyɑ́ ŋkpɑŋŋ.

6 Mpi tɔ, n mʋkɑɣɑ nyɑ́ tɛɛtʋnɑɑ wontu

kɛ tɔlʋmɑ kɛ mʋsʋŋ, nɑ pǝ́ yeki-wɛɣɛ kpɛtɛ.

7 N pɛmɑ lʋm nɑ tɔɣɔnɑɣɑ

kɛ wei lʋkɔtʋ nɑ nyɔɣɔsɩ kɑ pɩɩwɑ tɔ.

8 Yʋlʋ toŋ tʋ nɑ kɑlɑmpɑɑnɩ tʋ

kɑ tǝnnɑ tɛtʋ, nɑ ɩ́ cɑɣɑ tǝ tɑɑ.

9 N tɔɣɔnɑ leelu kɛ niŋ kɑkpɑsɩ, n pɛlɑ sulɑʋ niŋ.

10 Pǝ tɔɔ kɛ́ kɑtɔsɩ tɑmɑ-ŋ

nɑ sɔɣɔntʋ ɑnɑɑm nɑ́ɑ́ tuti-ŋ.

11 Sǝkpɛtʋɣʋ nyɑlɑ nyɑ́ tɔɔ,

nn nɑɑnɑ tiili, lʋm sɔsɔɔm lipɑ-ŋ.

12 Ɩsɔ wɛ hɑtoo ɩsɔtɑɑ kɛ́ nɑ ɩ́ tɛɛ

ɩsɔtʋlʋŋɑsɩ tɔɔ, nɑ ɩ́ nyǝnǝɣǝnɑ sɩ nyɔɔŋ tɑɑ.

13 Ɩlɛnɑ nyɑɑ mɑɣɑsǝɣɩ sɩ Ɩsɔ tɑ́ nyɩ pʋlʋ.

Ɩ kɑɑ pǝsɩ nɑ ɩ́ tɛɛ ɩsɔŋmʋntʋ tɔɔ

nɑ ɩ́ hʋʋnɑ-tʋɣʋ ɑtɛ.

14 Ɩsɔ tɔŋ ɩsɔtɔnʋɣʋ ntompee tɔɔ,

nɑ ŋmʋntʋ tɑkɑ ɩ tɔɔ, ɩɩ nɑɑnɑ tiili.

15 N cɑɑ sɩ ń tǝŋ

ɑsɑɣɑɑ mpɑɑʋ kʋpǝnʋɣʋ kɛ?

16 Pǝ tɛmɑ-wɛɣɛ kpiisuɣu kɛ́, nɑ pǝ wɑɑtʋ tɑ tɑtɑ,

ɩsɩɩ lʋm kuukuɣu koluŋɑ tɔ.

17 Hɑlǝnɑ yǝlɑɑ mpɛ pɑ́ tɔŋ

Ɩsɔ Tomɑ tǝnɑ tʋ sɩ: Yele-tʋ tǝpɑmm.

Weɣe n pǝsǝɣɩ nɑ ń lɑ-tʋ?

18 Pǝyele ɩnɩ ɩ kɑ hɑɣɑsǝnɑ pɑ tɛɛsɩ nyǝ́mɑ kɛ toŋ.

Ɩsɔ ɩ́ ponɑ ɑsɑɣɑɑ lǝmɑɣɑsɛɛ ɑnǝɣɩ pooluŋ.

19 Yǝlɑɑ kʋpɑmɑ nɑ mpɑ pɑ fɛɩ tɔm tɔ,

pɑɑ nɑ́ pɑ wɑkǝlʋɣʋ nɑ pɑ́ woŋ-wɛ.

20 Pǝ wɑkǝlɑ pɑ kolontunɑɑ

nɑ kɔkɔ nyɑɣɑ pɑ wɛnɑʋ.

21 Tɔʋ, nyɑ́ nɑ Ɩsɔ ɩ́ ciiki nɑ pǝ́ hɛtɩ-ŋ.

Wɑɑtʋ ɩnǝɣɩ n kɑ́ nɩɩ leleŋ.

22 Mʋ mɑ kʋsɛɣɛsǝtʋ nɑ

ń tɔkɩ mɑ tɔm kɛ nyɑ́ lotu tɑɑ.

23 Lǝsɩ mpi pǝ tɑ siɣisi tɔɣɔ nyɑ́ tɛ,

nɑ ń mǝlɩ Tomɑ tǝnɑ tʋ tɛɛ nɑ ɩ́ tɑɣɑnɩ-ŋ.

24 Lɔ nyɑ́ wʋlɑ kʋpɑmpɑŋ kɛ

ɑtɛɣɛ lɔɔʋ pɛɛ hɛkʋ tɑɑ.

25 Ɩlɛnɑ Tomɑ tǝnɑ tʋ pǝsɩ nyɑ́ wʋlɑ,

nɑ nyɑ́ liɣitee hɔwɑ.

26 Wɑɑtʋ ɩnǝɣɩ ɩ kɑ́ pǝsɩ nyɑ́ leleŋ kʋpɑŋ

tǝlɩɩlɛ nɑ ń tɛkǝɣɩ-ɩ niŋ.

27 N kɑ́ sǝlǝmǝɣɩ-ɩ nɑ ɩ́ nɩɩkɩ,

nɑ ń yoosiɣi nti n kɑ yɔɣɔtɑɑ nɑ ń sɩɩ tɔ.

28 Pɑɑ ntiɣi n sɩɩwɑ, n wɑɑkɩ kɛ́,

nɑ nyɑ́ mpɑɑʋ hʋlʋmɩ.

29 Mpi tɔ, Ɩsɔ tisiɣi kɑlɑmpɑɑnɩ nyǝ́mɑ kɛ́.

Ɩlɛnɑ ɩ́ wɑɑsǝɣɩ wei ɩ pɑsǝɣɩ ɩ tɩ tɔ.

30 Ɩsɔ kɑ́ wɑɑsɩ wei ɩ tɑ kɛ ɩsɑɣɑʋ

tɔɣɔ ɩ tǝnɑŋŋ wɛɛtʋ tɔɔ.

Pɑɑ tɑsǝkǝlɛ tʋ ɩ wɑɑsǝɣɩ-ɩ kɛ́.

Sɩ ɩ́ tɔ tǝnɑŋŋ tɑɑ,

ɩlɛnɑ pǝ́ yɑ ɩ nyʋɣʋ.