2 Mɑ tuukinɑ weesuɣu tʋ Ɩsɔ Tomɑ tǝnɑ tʋ.

Wei ɩ pɛŋɩ-m tɑmpɑnɑ, nɑ ɩ́ wɑkǝlǝɣɩ mɑ lɑŋlɛ tɔ.

3 Ye mɑ weesuɣu kɑɑsɑɑ,

nɑ Ɩsɔ feesiŋ wɛ mɑ mɩɩnɑ tɛɛ.

4 Mɑ ntompee kɑɑ yɔɣɔtɩ ɩsɑɣɑtʋ.

Pǝyele mɑ nsǝmlɛ kɑɑ lǝsɩ pɔpɔtʋ tɔm nɑtǝlɩ.

5 Mpusi ɩ́ polo pooluŋ, nɑ mpi mɑɑ hɑ-mɛɣɛ tɑmpɑnɑ tɔ.

Hɑlǝnɑ mɑ sǝm, mɑ kɑɑ kisi hʋlʋɣʋ sɩ mɑ fɛɩnɑ tɑɑlɩ.

6 Mɑ tɔkɑ mɑ tɑmpɑnɑ kɛ́, mɑ kɑɑ yele.

Pǝyele mɑ kʋyɛɛŋ tɔm fɛɩ-m fɛɛlɛ kɛ mɑ tɑɑ.

7 Pǝ́ pǝsɩ mɑ kolontu kɛ ɩsɑɣɑʋ,

nɑ pǝ́ pǝsɩ mɑ tɔɔ kʋllʋ kɛ wei ɩ fɛɩnɑ tɑmpɑnɑ tɔ.

8 Ye Ɩsɔ tɑmɑ ɩsɑɣɑʋ tomle

nɑ ɩ́ lǝsɩ ɩ weesuɣu,

pepeɣe ɩ tɑsǝɣɩ tɛɛlʋɣʋ?

9 Ye lɑŋwɑkǝllɛ mɑɣɑnɑ-ɩ Ɩsɔ kɑɑ nɩɩ ɩ wulɑ.

10 Pɩɩ wɛɛ sɩ Tomɑ tǝnɑ tʋ kɛ

ɩ lɑŋlɛ ɩ́ hɛɛnɑ nɑ ɩ́ sǝlǝmǝɣɩ-ɩ tɑm.

11 Mɑɑ sɛɣɛsɩ-mɛɣɛ Ɩsɔ mpɑɑŋ tɔm

mɑ kɑɑ ŋmɛsɩ-mɛɣɛ mpi pǝ pǝlɛ Tomɑ tǝnɑ tʋ tʋwɑ tɔ.

12 Amɑ pɑ tǝnɑ pɑ nyǝmɑ́ nti tǝ wɛɛ tɔ.

Ɩlɛ pepe tɔɔ kɛ́ pɑ yɔɣɔtǝɣɩ tɔm kpɛtɛ nyǝntʋ?

13 Mpi Ɩsɔ Tomɑ tǝnɑ tʋ sɩɩwɑ sɩ yʋlʋ ɩsɑɣɑʋ tete,

nɑ mʋsʋntʋ kpɑncoou tɔɣɔlɛ sɩ:

14 Ye ɩ piyɑ hukɑɑ, yoou kɑ́ kʋnɑ-wɛ.

Pǝyele tɔɣɔnɑɣɑ kɑɑ tɑlɑ pɑ piyɑ piyɑ.

15 Yʋlʋkʋsǝkʋ kɑ́ kʋnɑ mpɑ pɩɩ sɔɔ tɔ,

pɑ leelɑɑ kɑɑ wii-wɛ.

16 Ye ɩ kɑɑwɑ liɣitee ɩsɩɩ kɑnyǝŋɑ,

nɑ wontu ɩsɩɩ ɑfǝlɑ.

17 Siɣisilu kɑ suunɑ-tɩ,

nɑ yʋlʋ kʋpɑŋ nɑ́ɑ́ tɔɣɔ ɩ liɣitee.

18 Ɩ tǝyɑɣɑ wɛ kɛ́ ɩsɩɩ huu huukuɣu tɔ,

yɑɑ ɩsɩɩ tɑŋlʋ sikuɣu cokǝle tɔ.

19 Ɩ hǝntʋɣʋ wɑɑtʋ, ɩ kɛ́ liɣitee tʋ.

Amɑ ɩ kɑ́ feŋ tɔ, ɑ́ mʋkɑ yem.

20 Lɑŋwɑkǝllɛ tutiɣi-ɩ kɛ́ ɩsɩɩ lʋm,

nɑ kɑcuculɑɣɑ nɑ́ɑ́ kpɑɣɑ-ɩ ɑhoo tɑɑ.

21 Ilim tǝlɩɩlɛ heelim lǝsǝɣǝnɑ-ɩ

ɩ tǝcɑɣɑlɛ nɑ toŋ, nɑ pǝ́ kɛlɩ nɑ pǝ́ tɛɛnɑ.

22 Pɑ tɔɔkɩ-ɩ nyǝmɑ́ kɛ́ nɑ pǝtɔɔtǝlɛ fɛɩ,

nɑ ɩ́ kɑɑsǝɣɩ ɩ tɩ sɩ ɩ́ se.

23 Ɩlɛnɑ ɩ nɑlɑɑ kpɑsǝɣɩ ɑmʋkʋŋ kɛ ɩ tɔm,

nɑ pɑ́ hʋlǝɣɩ kɑcʋɣʋlɑsɩ.