1 Ɩsɛɣɛlɩ nyǝ́mɑ tǝnɑ tɛmɑ Yɑɑtɑnɩ kɛ tɛsʋɣʋ kɛ mpʋ, ɩlɛnɑ Tɑcɑɑ tɔ Yosuwee sɩ: 2 Lǝsɩ pɑ kpekɑ loosi tɑɑ kɛ́ yʋlʋ yʋlʋ. 3 Ɩlɛnɑ ń heeli-wɛ sɩ: Ɩ́ kuli pǝlɛ pǝlɛ kɛ timpi ɩnɩ kɔtǝlɑɑ sǝŋɑ ɩsǝntɔ tǝcɑ tɔ. Nɑ ɩ́ kpɛŋnɑ timpi ɩ́ kɑ sʋʋ sɑŋɑ ɑhoo ɑnɛ tɔ.

4 Mpʋɣʋlɛ Yosuwee yɑɑwɑ yǝlɑɑ nɑɑnʋwɑ nɑ nɑɑlɛ ɩnɩ. 5 Ɩlɛnɑ ɩ́ tɔ-wɛ sɩ: Ɩ́ polo Ɩsɔ Tɑcɑɑ ɑtɑkɑɑ nɔɣɔ tɔɔ kɛ́ pɔɣɔ tɑɑ, nɑ ɩ́ kuli pǝlɛ pǝlɛ kɛ mǝ nyɔɔŋ tɔɔ. 6 Pɛɛ ɑnɩ ɑ kɑ́ tɔɔsǝɣǝnɑ-mɛɣɛ mpi Ɩsɔ lɑpɑ-mɛɣɛ ɩsǝntɔ tɔ. Ye pǝ kɔmɑ nɑ mǝ piyɑ pɔɔsɩ-mɛ sɩ pɛɛ ɑnɛ ɑ lɑkɩ we? 7 Ɩ́ kɑ́ cɔ-wɛ sɩ wɑɑtʋ nɔɣɔlʋ kɔtǝlɑɑ tɛsɑɣɑnɑ Ɩsɔ ɑtɑkɑɑ kɛ́ Yɑɑtɑnɩ nɑ Tɑcɑɑ yele nɑ lʋm cɛ nɑ pɑ́ tɛsɩ. Ɩlɛ pɛɛ ɑnɛ ɑ kɑ tɔɔsǝɣǝnɑ-mɛɣɛ pǝ tɔm kɛ tɑm tɔɔ.

8 Mpʋɣʋlɛ ɑpɑlɑɑ nɑɑnʋwɑ nɑ nɑɑlɛ ɩnɩ ɩ lɑpɑ teitei ɩsɩɩ Yosuwee kɑ kɛɛsʋɣʋ-wɛ tɔ. Pɑ kulɑ pǝlɛ pǝlɛ kɛ pɑ kpekɑ nyɔɔŋ tɔɔ, ɩsɩɩ Tɑcɑɑ kɑ heeluɣu-wɛ tɔ. Ɩlɛnɑ pɑ́ kpɛŋnɑ-yɛ nɑ pɑ́ sɩɩ timpi pɑɑ siki ɑhoo ɑnɩ tɔ. 9 Ḿpʋ́ɣʋ́ Yosuwee cɑɑ pɛɛ nɑɑnʋwɑ nɑ nɑɑlɛ tɔtɔ, nɑ ɩ́ kɑɑ kɑŋmɑɑɣɑ kɛ pɔɣɔ pile tɑɑ, timpi kɔtǝlɑɑ kɑ sǝɣǝlɑ Ɩsɔ ɑtɑkɑɑ nɑ pɑ́ sǝŋɑɑ tɔ. Nɑ ɑ wɛ tǝnɑɣɑ hɑlǝnɑ sɑŋɑ.

10 Ḿpʋ́ɣʋ́ Ɩsɔ ɑtɑkɑɑ sǝɣǝllɑɑ sǝŋɑ pɔɣɔ tɑɑ kɛ́ mpʋ. Hɑlǝnɑ yǝlɑɑ tɛ nti Ɩsɔ Tɑcɑɑ kɑ heelɑ Yosuwee sɩ ɩ́ tɛlǝsɩ-wɛ tɔ tǝ lɑpʋ, ɩsɩɩ Moisi kɑ kɛɛsʋɣʋ-ɩ tɔ. Pǝ tɛmɑ mpʋ, ɩlɛnɑ sɑmɑɑ tɛsɩ lɔŋlɔŋ. 11 Pǝ kɔmɑ nɑ sɑmɑɑ tǝnɑ tɛ tɛsʋɣʋ, ɩlɛnɑ Ɩsɔ ɑtɑkɑɑ sǝɣǝllɑɑ ŋmɑɑ pɑ nɔɣɔ tɔɔ. 12 Ḿpʋ́ɣʋ́ Lupɛŋ nɑ Kɑtɩ nyǝ́mɑ, nɑ Mɑnɑsee kpekǝle hɔɣɔlʋɣʋ nyǝ́mɑ, tɛɛ sɑmɑɑ nɔɣɔ tɔɔ nɑ pɑ́ tɔkɑ pɑ yoou wontu, ɩsɩɩ Moisi kɑ heeluɣu-wɛ tɔ. 13 Ḿpʋ́ɣʋ́ Ɩsɛɣɛlɩ nyǝ́mɑ yoolɑɑ lɩɩwɑ Tɑcɑɑ ɩsɛntɑɑ, ɩsɩɩ yǝlɑɑ iyisi nɩɩlɛ (40000) nɑ pɑ́ suuwɑ yoou wontu. Nɑ pɑ́ pukinɑ Yeliko tɔɔ kɛ́ timpi tɛtʋ wɛ ɩhǝntɑʋ tɔ. 14 Kʋyɑkʋ ŋkʋɣʋ Tɑcɑɑ tʋwɑ Yosuwee kɛ teeli kɛ Ɩsɛɣɛlɩ nyǝ́mɑ tǝnɑ ɩsɛntɑɑ. Ɩlɛnɑ pɑ́ nyɑŋnɑ-ɩ, hɑlǝnɑ ɩ sǝm. Ɩsɩɩ pɑ nyɑŋɑɣɑnɑ Moisi tɔ.

15 Ḿpʋ́ɣʋ́ Tɑcɑɑ tɔmɑ Yosuwee sɩ: 16 Heeli kɔtǝlɑɑ mpɑ pɑ sǝɣǝlɑ Ɩsɔ ɑtɑkɑɑ tɔ sɩ pɑ́ lɩɩ pɔɣɔ tɑɑ.

17 Ɩlɛnɑ Yosuwee nɑ́ɑ́ heeli-wɛɣɛ mpʋ. 18 Too ɩsɩɩ Ɩsɔ ɑtɑkɑɑ sǝɣǝllɑɑ kpɛsʋɣʋ pɑ nɔɔhɛɛ kɛ pɔɣɔ pǝle tɑɑ nɑ pɑ́ sɩɩ kʋteŋ tɔɔ, ɩlɛnɑ lʋm mǝlɩ kpɑkpɑɑ nɑ pǝ́ su nɑ pǝ́ wɑtɩ pɔɣɔ kʋtemiŋ, ɩsɩɩ pɩɩ wɛʋ tɔ. 19 Pɑ ɩsɔtʋ kɑncɑɑlɑɣɑ nyǝŋ kʋyɛɛŋ nɑɑnʋwɑ wule kɛ Ɩsɛɣɛlɩ nyǝ́mɑ lɩɩ pɔɣɔ tɑɑ, nɑ pɑ́ polo pɑ́ siki timpi pɑ yɑɑ sɩ Kilikɑɑ tɔɣɔ Yeliko ɩcɑtɛ nɑ ilim tǝlɩɩlɛ tɔɔ.

20 Kilikɑɑ tǝnɑɣɑ Yosuwee ŋmɑwɑ pɛɛ nɑɑnʋwɑ nɑ nɑɑlɛ wei pɑɑ kulɑ pɔɣɔ tɑɑ tɔ. 21 Mpʋɣʋlɛ ɩ heelɑ Ɩsɛɣɛlɩ nyǝ́mɑ sɩ: Ye kʋyɑkʋ ŋku mǝ piyɑ pɔɔsɑ-mɛ sɩ pɛɛ ɑnɛ ɑ nyʋɣʋ suwe? 22 Ɩlɛ ɩ́ kɑ́ kɛɛsɩ-wɛ sɩ tɩɩ tɛsɑ Yɑɑtɑnɩ kɛ wʋlɑɣɑ kɛ́. 23 Pɔpɔtʋ fɛɩ leleŋ, kʋyɑkʋ nɑkʋlǝɣɩ Tɑcɑɑ tɑ Ɩsɔ lɑpɑ nɑ Yɑɑtɑnɩ nyɔɔ nɑ tǝ́ tɛsɩ, ɩsɩɩ ɩ kɑ tɛm lɑpʋ kɛ Sǝsǝncɑɑsɩ teŋku tɑɑ tɔ. 24 Tɑcɑɑ lɑpɑ ḿpʋ́ɣʋ́ sɩ ɑtɛ yǝlɑɑ tǝnɑ ɩ́ nyɩ sɩ ɩ wɛnɑ tomɑ. Ɩlɛnɑ tɑɑ nyɑŋnɑ-ɩ tɑm.