1 Yesu kʋsɑ ɩsɛ, ɩlɛnɑ ɩ́ nɑ toŋtʋnɑɑ tʋɣɩ pɑ kʋhɑʋ kɛ Ɩsɔ tǝsɛɛlɛ sɔsɔɔlɛ kʋhɑɑŋ ɑtɑkɑɑnɑɑ tɑɑ. 2 Nɑ ɩ́ nɑ́ tɔtɔɣɔ ɑlʋ leelu kʋnyɔntʋ nɔɣɔlʋ, nɑ ɩ́ pɛtǝɣɩ sɑntiinɑɑ nɑɑlɛɣɛ pǝ tɑɑ tǝnɑ. 3 Tǝnɑɣɑ Yesu tɔmɑ sɩ: Tɔm tɑmpɑnɑ tɔɔ kɛ́ mɑ heeliɣi-mɛ. Mpi leelu kʋnyɔntʋ ɩnɛ ɩ tʋwɑ tɔ, pǝ kǝlɑ pɑnɛ pɑ tǝnɑ pɑ kʋtʋtʋm. 4 Pǝ tɑɣɑ pʋlʋ, yǝlɑɑ lɛlɑɑ tǝnɑ nɑ́ kpɑɣɑ pɑ liɣitee nnɑ ɑ kpisɑ yem tɔɣɔ nɑ pɑ́ hɑɑkɩ. Amɑ ɑlʋ ɩnɛ, pɑɑ nɑ ɩ kɛ́ kʋnyɔntiyɑ tɔ ɩ kpɑɣɑ ɩ liɣitee tǝnɑ nɑ ɩ́ tʋ. Pǝ tɑ kɑɑsɩ-ɩ pʋlʋ sɩ ɩ́ yɑnɑ pɑɑ tɔɣɔnɑɣɑ mɑɣɑmɑɣɑ.

5 Ḿpʋ́ɣʋ́ nɑpǝlɩ pɑ cɑɣɑɑ nɑ pɑ́ yɔɣɔtǝɣɩ Ɩsɔ tǝsɛɛlɛ tɔm sɩ: Pɛɛ kʋpɑnɑ wenɑ pɑ lɑpǝnɑ Ɩsɔ tǝsɛɛlɛ kɛ cɑŋǝm tɔ nɑ mpi mpi pɑ hɑɑkɩ Ɩsɔ kɛ́ tǝ tɑɑ tɔ, pǝ lɑpɑ nɑ tǝ́ te teu kɛ́. Tǝnɑɣɑ Yesu heelɑ pʋntʋnɑɑ sɩ: 6 Pǝ tǝnɑ mpi ɩ́ nɑɑ ɩsǝntɔ tɔ, kʋyɛɛŋ kɑ́ kɔɔ wei ɩ tɑɑ pǝ kɑɑ kɑɑsɩ pǝlɛ lɛntɛ nɑ tǝ tǝnɑ lɛntɛ tɔɔ tɔ, pɑɑ tusi pǝ tǝnɑ.

7 Ḿpʋ́ɣʋ́ mpɛ ɩnɩ pɑ pɔɔsɑ Yesu sɩ: Pǝlee kɛ́ mpʋ ɩnɩ pɩɩ lɑ? Nɑ ŋmɑɑtǝlɛ nteɣe pɩɩ hʋ́lɩ́ nɑ tǝ́ nyǝnɑ sɩ pǝ wʋsɑɑ?

8 Tǝnɑɣɑ Yesu sɩ: Ɩ́ lɑ lɑɑkɑlɩ, ɩ́ tɑɑ yele nɑ nɔɣɔlʋ kɔɔ nɑ ɩ́ tolisi-mɛ. Mpi tɔ, pɑɣɑlɛ kɑ́ kɔɔ nɑ pɑ́ hɑɑ pɑ tǝɣɩ mɑ hǝtɛ, sɩ mpɛɣɛlɛ Mesii, nɑ pɑ́ tɔŋ sɩ, pǝ wʋsɑɑ kɛ́. Amɑ ɩ́ tɑɑ nɩɩnɑ-wɛ. 9 Ɩ́ kɔmɑ nɑ ɩ́ nɩɩ yooŋ nɑ pǝ tǝnɑ pǝ pǝsʋɣʋ yem kɛ́ kpɛntǝlɑsɩ tɔ pǝ tɑŋ, ɩ́ tɑɑ nyɑ́. Tǝlɛ tǝ tǝnɑɣɑ mpʋ, pǝ wɛɛ sɩ tǝ lɑ nɑ pǝcɔɣɔ. Amɑ wɑɑlɩ kɛ́ ɑntulinyɑ nɑ́ɑ́ kɔɔ nɑ ɩ́ tɛŋ.

10 Ḿpʋ́ɣʋ́ Yesu tɑsɑ-wɛɣɛ heeluɣu sɩ: Tɛtʋ kɑteŋɑ lɛŋkɑ kɑ́ yoonɑ lɛŋkɑ nyǝ́mɑ, nɑ kɑwulɑɣɑ lɛŋkɑ kɑ́ kʋlɩ lɛŋkɑ tɔɔ. 11 Tɛtʋ kɑ́ sele pǝ kɑɑ lɑ nyǝnʋɣʋ, nyɔɣɔsɩ nɑ yʋlʋkʋsǝkʋ kɑ́ lɩɩ tiiliwɛ tiiliwɛ. Kɔkɔlɔ tǝmɑ sɔɣɔntʋ nyǝnɑ nɑ ɑtɔmɑ sɔsɔɔnɑ kɑ́ lɩɩnɑ ɩsɔtɑɑ nɑ pǝ́ tii.

12 Amɑ nɑ pǝ́cɔ́ tǝnɛ ɩnɩ tǝ tǝnɑ tǝ lɑkɩ ɩlɛ, pɑɑ kpɑ-mɛ, nɑ pɑ́ tʋ-mɛɣɛ wɑhɑlɑ sɔsɔ. Pɑɑ cɛlɛ-mɛɣɛ Yutɑ nyǝ́mɑ tǝkotilenɑɑ tɑɑ nyǝ́mɑ, nɑ pɛlɛ pɑ́ hʋʋnɑ-mɛ. Pɑɑ tʋ-mɛɣɛ sɑlǝkɑnɑɑ, pɑɑ yɑɑ-mɛɣɛ nɔnɔɔsɩ kɛ ɑwulɑɑ sɔsɑɑ nɑ tɛtʋ tɔkǝlɑɑ pɑ kiŋ kɛ mɑ tɔɔ. 13 Amɑ tǝnɑ wɛɣɛ pɩɩ topili-mɛɣɛ mpɑɑŋ sɩ ɩ́ hʋ́lɩ́ mɑ tɔm tɑmpɑnɑ. 14 Ɩ́ tɑɣɑnɩ mǝ tɩ sɩ, pɑɑ pɩɩ lɑ ɩsǝnɑ, ɩ́ tɑɑ nǝɣǝsɩ nti ɩ́ kɑ hʋʋ nɑ ɩ́ lɩɩ tɔ nɑ pǝ tɑ tɑtɑ. 15 Pǝ tɑɣɑ pʋlʋ, mɑ mɑɣɑmɑɣɑ mɑɑ tɑsǝnɑ-mɛɣɛ lɑɣɑtʋ kɛ tɔm nti ɩ́ kɑ́ yɔɣɔtɩ nɑ mǝ kolontunɑɑ tɑɑ nɔɣɔlʋ kɑɑ nɑ kʋcɔcɔtʋ, pǝyele pɑ kɑɑ kɛɛ pɑ nyǝntʋ tɔ. 16 Mǝ cɑɑnɑɑ nɑ mǝ toonɑɑ nɑ mǝ tɑɑlʋnɑɑ nɑ mǝ newɑɑ nɑ mǝ nyǝ́mɑ nɑ mǝ cewɑɑ kɑ tɩɩ tʋnɑ-mɛɣɛ mǝ kolontunɑɑ niŋ tɑɑ, hɑlɩ pɑɑ kʋ mǝ tɑɑ pɑɣɑlɛ. 17 Yǝlɑɑ tǝnɑ tɑɑ kɑ́ kpɑnɑ-mɛɣɛ mɑ tɔɔ. 18 Pɑɑ nɑ mpʋ mǝ tɑɑ nɔɣɔlʋ nyʋɣʋ kɑɑ holi-ɩ holuɣu mɑɣɑmɑɣɑ. 19 Ɩlɛ mɩɩ nyɑɣɑ ɑpɑlʋtʋ, pɩɩ yɑ mǝ nyɔɔŋ.

20 Ye ɩ́ kɔmɑ nɑ ɩ́ nɑ́ yoolɑɑ kʋpiŋ tɑmɑ Yosɑlɛm kɛ kotɑɣɑ, ɩ́ nyɩ sɩ ɩ yɔkʋɣʋ wʋsɑɑ kɛlɛ wɑɑtʋ ɩnɩ. 21 Mpʋ ɩnɩ tɔ, mpɑ pɑ́ wɛ Yutɑ, pɑ se nɑ pɑ́ kpɑ pɔ́ɔ́ŋ. Nɑ mpɑ pɛlɛ pɑ́ wɛ Yosɑlɛm tɑɑ, pɑ́ lɩɩ nɑ pɑ́ hɑtǝlɩ. Nɑ mpɑ pɛlɛ pɑ́ wɛ tɑwɑ tɑɑ, pɑ́ tɑɑ kpe. 22 Pǝ tɑɣɑ pʋlʋ, kʋyɛɛŋ ɩnɩ ɩ tɑɑ kɛ́ pɩɩ nɑɑsɩ Yosɑlɛm nyǝ́mɑ ɩlɛnɑ pǝ́cɔ́ pǝ tǝnɑ pǝ́ lɑ́ ɩsɩɩ pɑɑ ŋmɑɑʋ Ɩsɔ Tɔm tɑɑ tɔ. 23 Ahusitonɑɑ nɑ ɑsɔŋ pɑ tɔm kɑ́ lɑ wɑɩyo kɛ́ wɑɑtʋ ɩnɩ. Wɑhɑlɑ kɑ́ tɔɔ ɩcɑtɛ ńtɛ́ tǝ tɑɑ, yǝlɑɑ pɑnɛ pɑɑ nɑ́ Ɩsɔ pɑ́ɑ́nɑ́. 24 Pɑɑ kʋ-wɛ nɑ lɑɣɑtɛ, pɑɑ kpɑ-wɛɣɛ yomle kɛ piitimnɑɑ tǝnɑ tɑɑ. Mɑ tɑ nyɩ ɩsɔnɑɑ kɛ pɩɩ yelinɑ Yosɑlɛm nɑ pɑ́ pɑ́ɑ́lǝ́ɣɩ́ ɩ tɑɑ, hɑlǝnɑ pɛlɛ pɑ wɑɑtʋ kɔɔ nɑ ɩ́ sɩɩ tǝnɑɣɑ.

25 Pɩɩ hʋ́lɩ́ ŋmɑɑtɛɛ kɛ ilim nɑ ɩsɔtʋ nɑ ɩsɔtʋlʋŋɑsɩ pǝ tɔɔ. Lɑŋwɑkǝllɛ sɔsɔɔlɛ kɑ́ kpɑ kɑteŋɑ tǝnɑ, nɑ nǝɣǝsɛɛ kɑ́ kʋ-wɛɣɛ teŋku nɑ ɩ holɑ sɔsɔɔnɑ pǝ kɔkɔtɛ sɔsɔɔlɛ tɔɔ. 26 Yǝlɑɑ kɑ́ hʋʋ mpi pɩɩ kɔɔ ɑntulinyɑ tǝnɑ tɑɑ tɔ pǝ tɔm, ɩlɛnɑ sɔɣɔntʋ sɔsɔɔntʋ kpɑ-wɛ nɑ pɑ́ sɩ pɑ tɩɩŋ tɔɔ kɛ́ yem tǝkpǝtɩɩ. Pǝ tɑɣɑ pʋlʋ tɔɔ, pɩɩ ciɣiti ɩsɔtɔnʋɣʋ tɑɑ kɔkɔlɔnɑɑ. 27 Wɑɑtʋ ɩnǝɣɩ pɑɑ nɑ Yʋlʋ Pǝyɑɣɑ mɑ́ mɑ sǝŋɑ ɩsɔŋmʋntʋɣʋ tɔɔ, nɑ mɑ́ tiiki nɑ mɑ tomɑ kɛ sɔsɔm nɑ mɑ teeli. 28 Ɩ́ kɔmɑ nɑ ɩ́ nɑ mpʋ ɩnɩ pǝ sʋʋ lɑpʋ ɩlɛ, ɩ́ kʋsɩ mǝ nyɔɔŋ nɑ ɩsɔ nɑ ɩ́ feesi tǝfʋʋʋ. Pǝ tɑɣɑ pʋlʋ, mǝ wɑɑsʋɣʋ cɑɑnɑ kɔntɛ.

29 Ḿpʋ́ɣʋ́ Yesu tɔmɑ-wɛ sɩ: Ɩ́ nyǝnnɑ tʋɣʋ ŋku pɑ yɑɑ sɩ fiki tɔ nɑ tɩɩŋ lɛlǝŋ nɑ ɩ́ nɑ. 30 Ye ɩ kɔmɑ nɑ ɩ́ sʋʋ nɛɣɛtʋɣʋ ɩ́ nyǝmɑ́ kpɑkpɑɑ sɩ hɛɛsʋɣʋ tɑlɑɑ kɛ́. 31 Mpʋ tɔtɔɣɔ pǝ wɛɛ, ɩ́ kɔmɑ nɑ ɩ́ nɑ mpʋ ɩnɩ pǝ lɑkɩ, ɩ́ nyɩ kpɑkpɑɑ sɩ Ɩsɔ Kɑwulɑɣɑ wʋsɑɑ. 32 Tɑmpɑnɑ kɛ mɑ heeliɣi-mɛ, yǝlɑɑ mpɑ pɑ wɛʋ ɩsǝntɔ tɔ pɑ kɑɑ sɩ pɑ tǝnɑ nɑ pǝ́cɔ́ pǝ tǝnɑɣɑ mpʋ pǝ́ lɑ. 33 Ɩsɔtɔnʋɣʋ nɑ ɑtɛ kɑ́ mʋkɩ yem. Amɑ mɑ kʋyɔɣɔtʋtʋ kɑɑ sɑɑlɩ pɑɑ pǝcɔ.

34 Ɩ́ lɑ lɑɑkɑlɩ, ɩ́ tɑɑ yele nɑ tǝtɔɣɔlɛ nɑ sʋlʋnyɔɔlɛ pǝ́ pǝsɩ-mɛ, nɑ kɑɣɑnɑ ɑntulinyɑ ɩnɛ ɩ nyǝntʋ nǝɣǝsɛɛ kʋ-mɛ. Ye ɩ́ pɑɑsǝnɑ mpʋ kʋyɑkʋ ŋkʋ kɩɩ tuti-mɛɣɛ. 35 Pǝ kɔŋ kuuu kɛ ɑntulinyɑ tǝnɑ tɑɑ yǝlɑɑ tǝnɑ tǝmɑɑ kɛ́ ɩsɩɩ pɑ pɛtʋɣʋ puluɣu tɔ. 36 Pǝ tɔɔ tɔ ɩ́ feŋ nɑ ɩ́ sǝlǝmǝɣɩ Ɩsɔ kɛ́ tɑm, nɑ ɩ́ hiki tomɑ nɑ ɩ́ lɩɩ mpi pɩɩ kɔɔ tɔ pǝ tɑɑ, nɑ ɩ́ kɔɔ ɩ́ sǝŋ Yʋlʋ Pǝyɑɣɑ mɑ́ mɑ ɩsɛntɑɑ.

37 Yesu sɛɣɛsɑɣɑ Ɩsɔ tǝsɛɛlɛ tɑɑ kɛ́ ilim ilim nɑ ɩ́ mǝlǝɣɩ Olifinɑɑ pʋɣʋ tɔɔ kɛ́ tɑɑnɑɣɑ tɑɑnɑɣɑ nɑ ɩ́ sʋʋkɩ. 38 Yǝlɑɑ tǝnɑ pukɑɣɑ Ɩsɔ tǝsɛɛlɛ tɑɑ kɛ́ tɑnɑŋ tɑnɑŋ tǝhuluhulu nɑ pɑ́ nɩɩkɩ ɩ wɑɑsʋ.