1 Wɑɑtʋ wei Tɑcɑɑ yɔɣɔtǝnɑ Moisi kɛ Holɛpʋ pʋɣʋ tɑɑ tɔ, ɩ nɑ ɩ tɑɑlʋ Alɔŋ pɑɑ wɛnɑ piyɑ mpɑ tɔɣɔlɔ. 2 Alɔŋ pǝyɑlɑɑ kɑ wɛ liɣiti kɛ́. Pɑ sɔsɔ ntɛ́ Nɑtɑpɩ, nɑ pǝ́ fɛɛ Apihu, nɑ Ɩlɑsɑɑ, nɑ Ɩtɑmɑɑ. 3 Pɑɑ tɛmɑ-wɛɣɛ kɔtǝlɑɑ kpɑʋ kɛ́. Hɑlǝnɑ pɑ́ pǝlɩ-wɛɣɛ kɔtɑɣɑ nim kɛ pɑ nyɔɔŋ tɑɑ. 4 Amɑ Nɑtɑpɩ nɑ Apihu pɑ sǝpɑ cokǝle kiŋ kɛ Holɛpʋ wʋlɑɣɑ tɛtʋ tɑɑ. Wɑɑtʋ ɩnǝɣɩ pɑ kɔnɑ kɔkɔ kpɑɩ nyǝŋkɑ kɛ kɔtɑɣɑ tǝlɑtɛ tɔɔ. Ɩlɛ pɑ tɑɑ wɛɛnɑ ɑpɑlʋpiyɑ. Ɩlɑsɑɑ nɑ Ɩtɑmɑɑ pɑɑ wɛnnɑ pɑ cɑɑ Alɔŋ kiŋ nɑ pɑ́ lɑkɩ kɔtʋɣʋ tǝmlɛ.

5 Ḿpʋ́ɣʋ́ Tɑcɑɑ tɔmɑ Moisi sɩ: 6 Yɑɑ Lefii nyǝ́mɑ nɑ ń sɔɔsɩ-wɛɣɛ kɔtʋlʋ Alɔŋ tɔɔ, nɑ pɑ́ sǝnɑ-ɩ. 7 Pɑɑ lɑkɩ pɑ tǝmɑ nnɑ pǝ tʋ pɑ́ nɑ sɑmɑɑ tɔɣɔ tɑm kɛ́ cokǝle kiŋ, nɑ pɑ́ lɑkɩ tǝ tǝmlɛ. 8 Nɑ pɑ́ tɑɣɑnǝɣɩ tǝ tɑɑ wontunɑɑ. Pɑ́ lɑkɩ tǝ tǝmɑ nɑ Ɩsɛɣɛlɩ nyǝ́mɑ nɔɣɔ. 9 N kɑ́ cɛlɑ Lefii nyǝ́mɑ kɛ Alɔŋ nɑ ɩ pǝyɑlɑɑ kɛ́. Nɑ pɑ́ pǝsɩ ɩsɩɩ Ɩsɛɣɛlɩ nyǝ́mɑ tillɑɑ. 10 Nɑ ń feŋ nɑ Alɔŋ nɑ ɩ pǝyɑlɑɑ pɑ tike pɑ́ lɑkɩ kɔtʋɣʋ tǝmlɛ. Ye wei ɩ́ sʋʋ pǝ tɑɑ, nɑ ɩ́ tɑ́ kɛ́ kɔtʋlʋ ɩsɩɩ pɑ kʋ-ɩ.

11 Ḿpʋ́ɣʋ́ Tɑcɑɑ tɑsɑ Moisi kɛ heeluɣu sɩ: 12 Mɑ mɑɣɑmɑɣɑ mɑ lǝsǝnɑ Lefii nyǝ́mɑ kɛ Ɩsɛɣɛlɩ yǝlɑɑ lɛlɑɑ tǝnɑ tɑɑ sɩ, pɑ́ pǝsɩ mɑ tǝmlɛ nyǝ́mɑ. Nɑ pɑ́ lɛɛtɩ Ɩsɛɣɛlɩ kɑncɑɑlɑɣɑ ɑpɑlʋpiyɑ lonte. 13 Kʋyɑŋku mɑ kʋ́ Icipiti nyǝ́mɑ kɑncɑɑlɑɣɑ ɑpɑlʋpiyɑ tǝnɑ tɔ, mɑ sɩɩ mɑ tǝɣɩ Ɩsɛɣɛlɩ nyǝ́mɑ nɑ pɑ tɔlɑ kɑncɑɑlɑɣɑ ɑpɑlʋ nyǝnsɩ kɛ́. Mɑɣɑlɛ Tɑcɑɑ.

14 Ḿpʋ́ɣʋ́ Tɑcɑɑ tɔmɑ Moisi kɛ Holɛpʋ wʋlɑɣɑ tɛtʋ tɑɑ sɩ: 15 Kɑlɑ Lefii nyǝ́mɑ nɑ ń kɛɛsǝnɑ pɑ lʋlʋŋ nɑ pɑ tɛɛsɩ. Pǝ kpɑɣɑʋ ɑpɑlʋpiyɑ nsi sɩ wɛnɑ ɩsɔtʋ kʋlʋm nɑ wɑɑlɩ tɔ.

16 Ɩlɛnɑ Moisi lɑ mpʋ.

17 Lefii pǝyɑlɑɑ hǝlɑ ntɛ́ Kɛɛsɔŋ, nɑ Kehɑtɩ, nɑ Melɑli. 18 Kɛɛsɔŋ nyǝ́mɑ ntɛ́ Lipini nɑ Simeyi. Mpɛ ɩnɩ pɑ pǝsǝnɑ pɑ lʋlʋŋ nyɔɔŋ nyǝ́mɑ nɑ pɑ́ yɑɑkɩ-wɛɣɛ pɑ hǝlɑ. 19 Kehɑtɩ nyǝ́mɑ ntɛ́ Amǝlɑm nɑ Ɩsɑɑ nɑ Hepǝlɔŋ nɑ Wusiyɛlɩ. Mpɛ ɩnɩ pɑ pǝsǝnɑ pɑ lʋlʋŋ nyɔɔŋ nyǝ́mɑ. 20 Melɑli nyǝ́mɑ ntɛ́ Mɑlii nɑ Musi. Mpɛ ɩnǝɣǝlɛ pɑ lʋlʋŋ nyɔɔŋ nyǝ́mɑ. Mpɛ pɑ kɛnɑ Lefii kpekɑ nyǝ́mɑ nɑ pǝ́ kɛɛsǝnɑ pɑ lʋlʋŋ.

21 Kɛɛsɔŋ lʋlʋŋ nyǝ́mɑ fɑɣɑ tɔm nɑɑlɛɣɛ. Lipini nyǝŋkʋ nɑ Simeyi nyǝŋkʋ. 22 Kʋkɑlʋɣʋ wɑɑtʋ, pɑ hikɑ ɑpɑlɑɑ nɑ ɑpɑlʋpiyɑ mpɑ pɑ wɛnɑ ɩsɔtʋ kʋlʋm nɑ wɑɑlɩ tɔɣɔ, iyisi nɑɑtosompɔɣɔlɑɣɑ nɑ nɑsǝlɛ nɑ nɩɩnʋwɑ (7500). 23 Mpɛ ɩnɩ pɑ sikɑɣɑnɑ cokǝle wɑɑlɩ nɑ ilim tǝtʋlɛ tɔɔ. 24 Lɑyɛlɩ pǝyɑlʋ Ɩliyɑsɑfɩ kɛlɛ pɑ nyʋɣʋ tʋ. 25 Kʋlʋmɑɑ mpɛ pɑ pɑɑsɑɣɑnɑ cokǝle tɑɑ nɑ tǝ wɑɑlɩ tɔɔ. Nɑ tǝ tɔɔ kʋtɑkʋɣʋ, nɑ tǝ nɔnɔɣɔ pʋʋɣʋ kʋkɑkɑɣɑʋ. 26 Nɑ kɑlɑɑ wei ɩ cɔɔnɑ cokǝle nɑ kɔtɑɣɑ tǝlɑtɛ tɔ ɩ pɔɔŋ nɑ ɩ nɔnɔɣɔ nyǝŋ nɑ pǝ ŋmɩɩsɩ. Mpɛ pɑ pɑɑsɑɣɑnɑ pǝ tǝnɑɣɑ mpʋ.

27 Kehɑtɩ lʋlʋŋ nyǝ́mɑ fɑɣɑ tɔm liɣiti kɛ́. Amǝlɑm nyǝ́mɑ, nɑ Ɩsɑɑ nyǝ́mɑ, nɑ Hepǝlɔŋ nyǝ́mɑ, nɑ Wusiyɛlɩ nyǝ́mɑ. 28 Pɑ kɑlɑ pǝ kpɑɣɑʋ ɑpɑlɑɑ, nɑ ɑpɑlʋpiyɑ mpɑ pɑ wɛnɑ ɩsɔtʋ kʋlʋm nɑ wɑɑlɩ tɔ. Pɑ wɛ iyisi pǝlefɛɩ nɑ nɑsǝtoso (8600). Pɑ nyǝntɛ ntɛ́ Ɩsɔ cokǝle tɑɑ wontunɑɑ pɑɑsǝnɑʋ. 29 Cokǝle ilim mpǝtǝŋ tɔɔ kɛ́ pɑ sikɑɑ. 30 Pɑ nyʋɣʋ tʋ ntɛ́ Wusiyɛlɩ pǝyɑlʋ Ɩlisɑfɑŋ. 31 Pɛlɛ pɑ pɑɑsǝɣǝnɑnɑ Ɩsɔ ɑtɑkɑɑ, nɑ tɑɑpǝlɩ, nɑ fǝtǝlɑnɑɑ tǝsɩɩlɛ, nɑ kɔtɑɣɑ tǝlɑtɛnɑɑ. Nɑ cokǝle tɑɑ wontunɑɑ mpɑ pɑ lɑkǝnɑ tɔ. Nɑ pǝ tɑɑ pʋʋɣʋ kʋkɑkɑɣɑʋ.

32 Lefii nyʋɣʋ nyǝ́mɑ tɑɑ sɔsɔ ntɛ́ kɔtʋlʋ Alɔŋ pǝyɑlʋ Ɩlɑsɑɑ. Ɩnɩ ɩ feŋiɣinɑ cokǝle pɑɑsǝnlɑɑ tɔɔ.

33 Melɑli lʋlʋŋ nyǝ́mɑ fɑɣɑ tɔm nɑɑlɛɣɛ: Mɑlii nyǝ́mɑ, nɑ Musi nyǝ́mɑ. 34 Pɑ kɑlɑ pǝ kpɑɣɑʋ ɑpɑlɑɑ nɑ ɑpɑlʋpiyɑ, mpɑ pɑ wɛnɑ ɩsɔtʋ kʋlʋm nɑ wɑɑlɩ tɔ. Nɑ pɑ kpɛntɩ iyisi nɑɑtoso nɑ ŋmʋnʋɣʋ (6200). 35 Pɑ nyʋɣʋ tʋ ntɛ́ Apihɑyili pǝyɑlʋ Suluyɛlɩ. Nɑ mpɛ ɩnɩ pɑ sikɑɣɑnɑ cokǝle ilim ntɔɣɔŋ tɔɔ. 36 Melɑli nyǝ́mɑ tǝmlɛ ntɛ́ sɩ pɑ́ pɑɑsǝnɑ cokǝle kpɑtǝŋ kʋwɑlǝŋ, nɑ kʋkɑɣɑŋ nɑ tesikɑsɩ, nɑ sɩ tɑpǝŋ tɛɛ nyǝɣǝtʋ kʋtemtu, nɑ pǝ wontu. Nɑ pǝ tǝnɑ mpi pɑ lɑkǝnɑ tɔ. 37 Nɑ kɑlɑɑ tesikɑsɩ, nɑ sɩ tɑpǝŋ tɛɛ nyǝɣǝtʋ kʋtemtu, nɑ pǝ kɑŋkɑnɑsɩ nɑ pǝ ŋmɩɩsɩ.

38 Cokǝle ilim tǝlɩɩlɛ tɔɔ kɛ́ Moisi nɑ Alɔŋ nɑ ɩ pǝyɑlɑɑ pɑɑ sikɑɑ. Mpɛ pɑ pɑɑsɑɣɑnɑ cokǝle nɑ Ɩsɛɣɛlɩ nyǝ́mɑ tǝnɑ nɔɣɔ. Ye kpɑɩ tʋ ɩ kpǝtǝnɑɑ ɩsɩɩ pɑ kʋ-ɩ.

39 Lefii nyǝ́mɑ tǝnɑ, pǝ kpɑɣɑʋ ɑpɑlɑɑ nɑ ɑpɑlʋpiyɑ mpɑ pɑ wɛnɑ ɩsɔtʋ kʋlʋm nɑ wɑɑlɩ tɔ. Pɑ kpɛntɑ ɩsɩɩ iyisi hiu nɑ nɑɑlɛ (22000). Ɩsɩɩ Tɑcɑɑ kɑ kɛɛsʋɣʋ Moisi nɑ Alɔŋ tɔ. Ḿpʋ́ɣʋ́ pɑ kɑlɑ-wɛ nɑ pǝ́ kɛɛsǝnɑ pɑ lʋlʋŋ.

40 Ḿpʋ́ɣʋ́ Tɑcɑɑ tɔmɑ Moisi sɩ: Kɑlɑ Ɩsɛɣɛlɩ nyǝ́mɑ kɑncɑɑlɑɣɑ ɑpɑlʋpiyɑ tǝnɑ. Pǝ kpɑɣɑʋ mpɑ pɑ wɛnɑ ɩsɔtʋ kʋlʋm nɑ wɑɑlɩ tɔ. Ɩlɛnɑ ń tʋ́ pɑ hǝlɑ kɛ tɑkǝlɑɣɑ tɑɑ. 41 Sɩɩ Lefii nyǝ́mɑ nɑ pɑ mpɑɑ kɛ Ɩsɛɣɛlɩ ɑpɑlʋpiyɑ kɑncɑɑlɑɣɑ nyǝnsɩ lonte tɑɑ. Nɑ ń sɩɩ Lefii nyǝ́mɑ tɔlɑ nɑ ɑ mpɑɑ kɛ Ɩsɛɣɛlɩ nyǝ́mɑ tɔlɑ kɑncɑɑlɑɣɑ ɑpɑlʋ nyǝnɑ lonɑ tɑɑ. Tɑcɑɑ mɑ́ mɑ nyǝm ntɛ́.

42 Ḿpʋ́ɣʋ́ Moisi kɑlɑ Ɩsɛɣɛlɩ nyǝ́mɑ kɑncɑɑlɑɣɑ ɑpɑlʋpiyɑ tǝnɑ, ɩsɩɩ Tɑcɑɑ tʋɣɩ-ɩ tɔ. 43 Pǝ kpɑɣɑʋ mpɑ pɑ wɛnɑ ɩsɔtʋ kʋlʋm nɑ wɑɑlɩ tɔ, nɑ pɑ́ tʋ́ pɑ hǝlɑ kɛ tɑkǝlɑɣɑ tɑɑ. Pɑ wɛ iyisi hiu nɑ nɑɑlɛ nɑ ŋmʋnʋɣʋ nɑ nɩɩtoso nɑ nɑɑnʋwɑ nɑ tooso (22273). 44 Ɩlɛnɑ Tɑcɑɑ tɑsɑ Moisi kɛ heeluɣu sɩ: 45 Sɩɩ Lefii nyǝ́mɑ nɑ pɑ mpɑɑ, nɑ pɑ́ pǝsɩ mɑ nyǝ́mɑ kɛ Ɩsɛɣɛlɩ kɑncɑɑlɑɣɑ ɑpɑlʋpiyɑ lonte tɑɑ. Nɑ ń lɑ mpʋ tɔtɔɣɔ Lefii nyǝ́mɑ tɔlɑ, kɛ Ɩsɛɣɛlɩ nyǝ́mɑ tɔlɑ kɑncɑɑlɑɣɑ ɑpɑlʋpiyɑ lonte tɑɑ. Mɑɣɑlɛ Tɑcɑɑ. 46 Ɩsɛɣɛlɩ ɑpɑlʋpiyɑ ŋmʋnʋɣʋ nɑ nɩɩtoso nɑ nɑɑnʋwɑ nɑ tooso (273) pɑɣɑtǝnɑ ntɛɣɛ Lefii nyǝ́mɑ. Nɑ mpɛ ɩnǝɣɩ pǝ wɛɛ sɩ pɑ́ yɑ pɑ nyɔɔŋ. 47 Nɑ pɑ́ tʋ́ pɑɑ wei ɩ nyʋɣʋ tɔɔ kɛ́ liɣitee nyǝɣǝtʋ kɑkpɑsɩ. Nɑ pǝ́ kɛɛsǝnɑ Ɩsɔ cokǝle tɑɑ liɣitee mɑɣɑsʋɣʋ. Pɑɑ nyǝɣǝlʋɣʋ ŋku kʋ yuŋ kɑ wɛ cɑcɑɑsɩ nɑɑnʋwɑ. 48 Ɩlɛnɑ pɑ cɛlɑ-yɛɣɛ Alɔŋ nɑ ɩ pǝyɑlɑɑ, nɑ pɑ́ yɑnɑ kɑncɑɑlɑɣɑ ɑpɑlʋpiyɑ kʋpɑɣɑtɑsɩ nyɔɔŋ.

49-50 Ḿpʋ́ɣʋ́ Moisi mʋ Ɩsɛɣɛlɩ nyǝ́mɑ kɑncɑɑlɑɣɑ ɑpɑlʋpiyɑ mpɑ pɑ pɑɣɑtɑ mpʋ tɔ. Pɑ liɣitee wenɑ pɑ yɑpǝnɑ-wɛ, ɩsɩɩ pɑ mɑɣɑsʋɣʋ Ɩsɔ cokǝle tɑɑ tɔ, ɑ lɩɩ nyǝɣǝtʋ iyɑɣɑ nɑ ŋmʋnʋɣʋ nɑ nɩɩnʋwɑ nɑ nɩɩtoso nɑ kɑkpɑsɩ (1365). 51 Ḿpʋ́ɣʋ́ pɑ cɛlɑ-yɛɣɛ Alɔŋ nɑ ɩ pǝyɑlɑɑ ɩsɩɩ Tɑcɑɑ kɑ sɩɩʋ tɔ.