1 Ḿpʋ́ɣʋ́ Tɑcɑɑ tɔmɑ Moisi sɩ: 2 Lu liɣitee nyǝɣǝtʋ kɛ ɑkɑntɛɛ nɑɑlɛ. Anǝɣɩ pɑɑ hʋlɩ nɑ sɑmɑɑ kpeɣeli, yɑɑ kpekɑ tʋ mpɑɑʋ. 3 Wɑɑtʋ wei pɑ́ hʋlɑ ɑ nɑɑlɛ, ɩlɛ Ɩsɛɣɛlɩ sɑmɑɑ koti ɩ cɔlɔɣɔ cokǝle nɔnɔɣɔ. 4 Ye kʋlʋmtǝlɛ kɛ pɑ hʋlɑɑ, ɩlɛ nyʋɣʋ nyǝ́mɑ tike koti. 5-6 Ye pɑ hʋlɑ ɑkɑntǝlɛ nɑ kɑkiisɑsɩ, ɩlɛ tɛɛʋ ntɛ́. Pɑ hʋlǝɣɩ tɔm kɑncɑɑlɑɣɑ nyǝm, ɩlɛnɑ Ɩsɛɣɛlɩ kpekǝle nte tɩɩ sikinɑ cokǝle ilim tǝlɩɩlɛ tɔɔ tɔ, tǝ́ tʋ́ mpɑɑʋ. Pɑ tɑsǝɣɩ nɑɑlɛ nyǝm, ɩlɛnɑ ilim mpǝtǝŋ nyǝntɛ nɑ́ɑ́ tǝŋ. 7 Ye pǝ kɛ́ sɩ yǝlɑɑ kotuɣu, pɑ kɑɑ hʋlǝnɑ kɑkiisɑsɩ. 8 Alɔŋ pǝyɑlɑɑ kɔtǝlɑɑ tike kɑ hʋlǝɣǝnɑ ɑkɑntɛɛ ɑnɩ. Pǝ wɛɛ sɩ mǝ nɑ mǝ piyɑ piyɑ, ɩ́ kɑ́ tɔkɩ kʋsǝsɩɩtʋ tǝnɛɣɛ tɑm tɔɔ kɛ́.

9 Ye ɩ polɑ mǝ kolontunɑɑ kɛ yoonɑʋ nɑ pɑ kʋlǝɣɩ mǝ tɔɔ, ɩlɛ ɩ́ hʋlɩ ɑkɑntɛɛ nɑ kɑkiisɑsɩ ɩlɛnɑ Tɑcɑɑ mǝ Ɩsɔ mɑ́, mɑ tɔɔsɩ mǝ tɔɔ nɑ mɑ́ wɑɑsɩ-mɛ. 10 Mpʋ tɔtɔɣɔ ɩ́ kɑ hʋlǝɣɩ-yɛɣɛ mǝ ɑyɔɔlɑ kʋyɛɛŋ, nɑ mǝ ɑcimɑ nyǝŋ, nɑ mǝ ɩsɔtʋnɑɑ kɑncɑɑlɑɣɑ kʋyɛɛŋ, kɛ wɑɑtʋ wei ɩ lɑkɩ kɔtɑsɩ nsi kɔkɔ lusɑ sɩ tǝnɑ tɔ nɑ ciikuɣu nyǝnsɩ. Ɩlɛnɑ mɑ́ tɔɔsɩ mǝ tɔɔ. Mɑɣɑlɛ Tɑcɑɑ mǝ Ɩsɔ.

11 Ɩsɛɣɛlɩ nyǝ́mɑ Icipiti lɩɩʋ pǝnɑɣɑ nɑɑlɛ nyǝŋkɑ, ɩsɔtʋ nɑɑlɛ nyǝŋ kʋyɑkʋ hiu nyǝŋkʋ kɛ ɩsɔŋmʋntʋ kɛɛlɑ Ɩsɔ cokǝle tɔɔ. 12 Ḿpʋ́ɣʋ́ Ɩsɛɣɛlɩ nyǝ́mɑ kʋlɑ Holɛpʋ wʋlɑɣɑ tɛtʋ tɑɑ. Ɩlɛnɑ ɩsɔŋmʋntʋ tii Pɑlɑŋ wʋlɑɣɑ tɛtʋ tɑɑ. 13 Ɩsɛɣɛlɩ nyǝ́mɑ kʋlɑ tɔm kɑncɑɑlɑɣɑ nyǝm pǝnɛɣɛ, ɩsɩɩ Tɑcɑɑ kɛɛsʋɣʋ Moisi tɔ.

14 Yutɑ yoolɑɑ tintiɣile nɑ pɑ tuutɑ kɛlɛ nɔɣɔ tɔɔ. Aminɑtɑpɩ pǝyɑlʋ Nɑsɔŋ kɛlɛ pɑ nyʋɣʋ tʋ. 15 Ɩsɑkɑɑ nyǝ́mɑ nyʋɣʋ tʋ ntɛ́ Suwɑɑ pǝyɑlʋ Netɑneyɛlɩ. 16 Sɑpulɔŋ nyǝ́mɑ nyǝŋ ntɛ́ Helɔŋ pǝyɑlʋ Ɩliyɑpɩ.

17 Ḿpʋ́ɣʋ́ pɑ hɛtɑ cokǝle, nɑ Kɛɛsɔŋ nɑ Melɑli pɑ pǝyɑlɑɑ kpɑɣɑ-tɛ.

18 Ɩlɛnɑ Lupɛŋ yoolɑɑ tintiɣile, nɑ pɑ tuutɑ pɑ́ tʋ́ pɑ wɑɑlɩ. Pɛlɛ pɑ nyʋɣʋ tʋ ntɛ́ Setewu pǝyɑlʋ Ɩlisuu. 19 Simiyɔŋ nyǝ́mɑ nyʋɣʋ tʋ ntɛ́ Sulisɑtɑɩ pǝyɑlʋ Selumǝyɛlɩ. 20 Kɑtɩ nyǝ́mɑ nyǝŋ ntɛ́ Teuwɛlɩ pǝyɑlʋ Ɩliyɑsɑfɩ.

21 Ɩlɛnɑ Lefii tʋ Kehɑtɩ lʋlʋɣʋ nyǝ́mɑ mpɑ pɑ sǝɣǝlɑ ɩsɔ sɛɛʋ wontu tɔ pɑ́ tǝŋ. Nɑ Lefii nyǝ́mɑ lɛlɑɑ nɑ́ɑ́ tɔŋɑ cokǝle sikuɣu nɑ pɑ́ tɑŋɑ-wɛ.

22 Ɩlɛnɑ Ɩfǝlɑyim yoolɑɑ tintiɣile nɑ pɑ tuutɑ pɑ́ tʋ́ pɑ wɑɑlɩ. Pɛlɛ pɑ nyʋɣʋ tʋ ntɛ́ Amihuti pǝyɑlʋ Ɩlisɑmɑ. 23 Mɑnɑsee nyǝ́mɑ nyǝŋ ntɛ́ Petɑsuu pǝyɑlʋ Kɑmliyɛlɩ. 24 Pɛncɑmɛɛ nyǝ́mɑ nyǝŋ ntɛ́ Kitoni pǝyɑlʋ Apitɑŋ.

25 Pǝ wɑɑlɩ kɛ́ Tɑŋ yoolɑɑ tintiɣile nte tǝ kɛ́ wɑɑlɩ tɑŋlɑɑ tɔ, tǝ́ nɑ tǝ tuutɑ tǝ tʋ́ mpɑɑʋ. Amisɑtɑɩ pǝyɑlʋ Ahiyesɛɛ kɛlɛ pɑ nyʋɣʋ tʋ. 26 Asɛɛ nyǝ́mɑ nyǝŋ ntɛ́ Okǝlɑŋ pǝyɑlʋ Pɑkiyɛlɩ. 27 Nefǝtɑli nyǝ́mɑ nyǝŋ ntɛ́ Ɩnɑŋ pǝyɑlʋ Ahilɑ.

28 Ɩsǝnɑ Ɩsɛɣɛlɩ nyǝ́mɑ kpɛsɑ pɑ tǝsikile nɑ pɑ́ tʋ́ mpɑɑʋ tɔɣɔlɛ.

29 Ḿpʋ́ɣʋ́ Moisi tɔmɑ ɩ yǝtɩ Mɑtiyɑŋ tʋ Lewɛlɩ pǝyɑlʋ Hopɑpɩ sɩ: Tɛtʋ nti Tɑcɑɑ sɩɩ nɔɣɔ sɩ ɩ hɑɑkɩ-tʋ tɔ, tǝ tɑɑ kɛ́ tǝ puki. Ɩlɛ tǝŋ-tʋ nɑ tɩɩ tɑlǝnɑ-ŋ kʋpɑntʋ nti ɩ lɑkɩ-tʋ tɔ. 30 Ntɛnɑ ɩ́lɛ́ ɩ kisi sɩ ɩ mǝlǝɣɩ ɩ tɛtʋ tɑɑ. 31 Mpʋɣʋlɛ Moisi sɩ: Tɑɑ lɔ-tʋ. Mpi tɔ, nyɑ́ nyǝmnɑ wʋlɑɣɑ tɛtʋ tɑɑ timpi timpi tɩɩ siki tɔ, tǝŋ-tʋ nɑ ń hʋlɩ-tʋ. 32 Ye n tǝŋɑ-tʋ, tɩɩ tɑlǝnɑ-ŋ kʋpɑntʋ nti Tɑcɑɑ kɑ lɑ-tʋ tɔ.

33 Ḿpʋ́ɣʋ́ tǝ kʋlɑ Tɑcɑɑ pʋɣʋ cɔlɔ, nɑ tǝ́ tɔ́ kʋyɛɛŋ tooso. Nɑ Ɩsɔ ɑtɑkɑɑ kɛ́ tɑ nɔɣɔ tɔɔ sɩ ɩ pɛɛkǝɣɩ-tʋɣʋ timpi tɩɩ siki nɑ tǝ́ hɛɛsɩ tɔ. 34 Ilim tɑɑ kɛ tǝ kʋlɑɑ, nɑ ɩsɔŋmʋntʋ wɛ tɑ nyɔɔŋ tɑɑ. 35 Tǝ tɛɛkɑɣɑnɑ Ɩsɔ ɑtɑkɑɑ ɩlɛnɑ Moisi yɔɣɔtǝnɑ nɔɣɔ sɔsɑɣɑ sɩ: Tɑcɑɑ sǝŋ nyɑ́ nɑɑsɩ tɑɑ, nɑ nyɑ́ kolontunɑɑ nɑ mpɑ pɑɑ cɑɑ-ŋ tɔ pɑ́ yɑ́. 36 Wɑɑtʋ wei pɑ sɩɩkɑɣɑ Ɩsɔ ɑtɑkɑɑ, ɩlɛnɑ Moisi tɑsɑ sɩ: Tɑcɑɑ kɔɔ, nɑ ń cɑɣɑ Ɩsɛɣɛlɩ nyǝ́mɑ tɑ tɑ hɛkʋ. Mpi tɔ, tǝ wɛ pɑɣɑlɛ kɛ́, tǝ fɛɩ kɑlʋɣʋ.