1 Moisi kɑ kpɑɣɑ Kusi ɑlʋ nɔɣɔlʋɣʋ. Ɩlɛnɑ Mɑlǝyɑm nɑ Alɔŋ pɑ́ cɑɣɑnɑ-ɩ ɑkpɑɣɑlɛ ntɛ́ tǝ tɔm. 2 Hɑlǝnɑ pɑ́ tɔ́ sɩ: Tɑcɑɑ yɔɣɔtǝɣǝnɑ tɑ́ tɔtɔɣɔ. Pǝ tɑɣɑ Moisi tike kɛ ɩ yɔɣɔtǝɣǝnɑ.

Ɩlɛnɑ Ɩsɔ nɑ́ɑ́ nɩɩ-tɩ. 3 Amɑ Moisi nɑ́ tɑ́ cɔ nɑtǝlɩ. Mpi tɔ, ɩ kɑ tɛɛwɑ ɑtɛ yǝlɑɑ tǝnɑɣɑ suulu kɛ́. 4 Ḿpʋ́ɣʋ́ Tɑcɑɑ yɑɑ ɩ́ nɑ Alɔŋ nɑ Mɑlǝyɑm, nɑ pɑ́ suli cokǝle kiŋ. 5 Nɑ ɩ́ tii ɩsɔŋmʋntʋɣʋ tɑɑ kɛ́ cokǝle nɔɣɔ. Nɑ ɩ́ yɑɑ Alɔŋ nɑ Mɑlǝyɑm nɑ pɑ nɑɑlɛ pɑ polo. 6 Nɑ Tɑcɑɑ tɔ-wɛ sɩ: Ɩ́ nɩɩ mɑ kʋyɔɣɔtʋtʋ kɛ teu yoo. Ye mɑ kʋyɔɣɔtʋtʋ tɛlǝsǝlʋ ɩ́ wɛ mǝ hɛkʋ mɑ hʋlǝɣɩ-ɩ mɑ tǝɣɩ. Nɑ mɑ́ lɩɩkɩ ɩ tɔɔ nɑ mɑ yɔɣɔtǝɣǝnɑ-ɩ toosee tɑɑ. 7 Amɑ mɑ yʋlʋ Moisi nɑ́ nɩɩnɑ-m teu kɛ́, nɑ ɩ́ lɑkɩ ɩ tǝmlɛ kɛ mɑ tǝyɑɣɑ tǝnɑ tɑɑ. 8 Mɑ nɑ-ɩ tǝ yɔɣɔtǝɣǝnɑ tǝmɑɣɑ tǝcɛɩcɛɩ. Mɑ hʋlǝɣɩ-ɩ mɑ tɩ nɑ ɩ́ nɑɑkɩ mɑ wɛɛtʋ. Ɩlɛ pepe tɔɔ kɛ́ mǝ tɑ́ nyɑnɑ-ɩ, nɑ hɑlǝnɑ ɩ́ cɑɣɑnɑ-ɩ?

9 Ḿpʋ́ɣʋ́ Tɑcɑɑ mʋ pɑ́ɑ́nɑ́ nɑ ɩ́ tɛɛ. 10 Wɑɑtʋ wei ɩsɔŋmʋntʋɣʋ kɛɛlɑ cokǝle tɔɔ ɩlɛ, kʋtɔŋ ŋku kʋ pilisiɣi yʋlʋ tɔ kʋ wɑɑsɑ Mɑlǝyɑm tɔɔ kɛlɛ, nɑ ɩ́ hʋlʋmɑɑ tǝloiloi ɩsɩɩ kponkpomʋlʋm. Ḿpʋ́ɣʋ́ Alɔŋ nɑ́ mpʋ. 11 Ɩlɛnɑ ɩ́ tɔ Moisi sɩ: Hɑɩ, suulu Tɑcɑɑ, tɑ́ tɔm sǝpɑɣɑ. Ɩlɛ tɑɑ lɛɛtɩ-tʋɣʋ tɑ́ kʋmɛlɛntʋ sɑlǝkɑ. 12 Mɑlǝyɑm ɩ́ tɑɑ wɛɛ ɩsɩɩ pǝyɑɣɑ sǝkʋɣʋ kɑ too lotu tɑɑ, nɑ pɑ́ lʋlɩ-kɛ nɑ kɑ tɔnʋɣʋ fetiliɣi ɩsǝnɑ tɔ.

13 Tǝnɑɣɑlɛ Moisi wiinɑ Tɑcɑɑ sɩ: Hɑɩ, Tɑcɑɑ, Suulu, wɑɑsɩ.

14 Ntɛnɑ Ɩsɔ sɩ: Ye ɩsɩɩ ɩ cɑɑ kɑ tɔwɑ ɩ ɩsɛntɑɑ kɛ́ ntɑɣɑmɑ, pǝ tɑɣɑ kʋyɑkʋ nɑ kʋ ɩsikile kɛ ɩ cɑkɩ fɛɛlɛ tɑɑ? Mpʋ tɔ, pǝ wɛɛ sɩ pɑ́ lǝsɩ-ɩ tǝsikile kɛ kʋyɑkʋ nɑ kʋ ɩsikile kɛ́. Pǝ wɑɑlɩ ɩlɛnɑ pɑ́ tɑɣɑnɩ-ɩ yɑɑʋ.

15 Ḿpʋ́ɣʋ́ pɑ lǝsɑ Mɑlǝyɑm kɛ tǝsikile tɑɑ kɛ́ kʋyɑkʋ nɑ kʋ ɩsikile. Pɑ mǝlǝnɑ-ɩ tɔɣɔ Ɩsɛɣɛlɩ nyǝ́mɑ tʋ́ mpɑɑʋ. 16 Nɑ pɑ́ polo pɑ siki Pɑlɑŋ wʋlɑɣɑ tɛtʋ tɑɑ.