1 Ḿpʋ́ɣʋ́ Tɑcɑɑ tɔmɑ Moisi sɩ: 2 Tɛlǝsɩ Ɩsɛɣɛlɩ nyǝ́mɑ sɩ, wɑɑtʋ wei ɩ́ kɑ́ sʋʋ Kɑnɑɑŋ tɛtʋ nti mɑ hɑɑkɩ-mɛ tɔ tǝ tɑɑ tɔ, tǝ toosi ntɛ́ 3 Siŋ wʋlɑɣɑ tɛtʋ nɑ Ɩtɔm nyǝntʋ nɑ pǝtɛɛ tɔɔ. Nɑ kɑ́ kpɑɣɑ teŋku kʋsǝpʋ, 4 nɑ kɑ́ mǝlǝnɑ pǝcɛsɩ pulɑsɩ tontoŋle pǝtɛɛ tɔɔ. Ɩlɛnɑ kɑ́ polo Siŋ, nɑ kɑ́ tiinɑ Kɑtɛɛsɩ-Pɑɑneyɑ pǝtɛɛ tɔɔ. Nɑ kɑ́ mǝlɩ Hɑsɑɑ-Atɑɑ nɑ Asǝmɔŋ. 5 Nɑ kɑ́ kɛɛ nɑ kɑ́ yoosinɑ Icipiti lɔɔʋ, nɑ kɑ́ lɩɩ Metitelɑnee teŋku. 6 Ilim tǝtʋlɛ tɔɔ toŋɑ ntɛ́ Metitelɑnee teŋku ɩnɩ. 7 Ilim tǝlɩɩlɛ mpǝtǝŋ tɔɔ nyǝŋkɑ ntɛ́ teŋku kʋlʋm ɩnɩ, nɑ Hoo pʋɣʋ pǝ hɛkʋ tɑɑ. 8 Ɩlɛnɑ kɑ́ lɩɩ Lepo-Hɑmɑtɩ nɑ Setɑ, 9 nɑ kɑ́ polo Sifǝloŋ, nɑ kɑ́ lɩɩ Hɑsɑɑ-Ɩnɑŋ.

10 Ilim tǝlɩɩlɛ tɔɔ nyǝŋkɑ ntɛ́ pǝ kpɑɣɑʋ Hɑsɑɑ-Ɩnɑŋ nɑ Sefɑm tɛtʋ hɔɣɔlʋɣʋ tɔɔ. 11 Ɩlɛnɑ kɑ́ mǝlǝnɑ Lipǝlɑ kɛ Ayiŋ ilim tǝlɩɩlɛ tɔɔ, nɑ kɑ́ tɛɛ pooluŋ nɑ kɑ́ polo kɑ yoosinɑ Kenɑsɑlɛtɩ kʋteŋ, 12 nɑ kɑ́ polo kɑ lɩɩ Yɑɑtɑnɩ lɔɔŋ, nɑ teŋku kʋsǝpʋ. Mǝ tɛtʋ tǝnɑsɩ ntɛ́.

13 Ḿpʋ́ɣʋ́ Moisi tɛlǝsɑ tǝ tǝnɑɣɑ Ɩsɛɣɛlɩ nyǝ́mɑ nɑ ɩ́ tɑsɑ-wɛɣɛ heeluɣu sɩ: Tɛtʋnɑɑ mpɑ Tɑcɑɑ tɔmɑ sɩ ɩ́ tɔ́ tɛtɛ nɑ ɩ́ tɑlɑ Ɩsɛɣɛlɩ kpekɑ pɔɣɔlɑɣɑfɛɩ nɑɑnʋwɑ nɑ hɔɣɔlʋɣʋ tɔɣɔlɛ. 14-15 Mpi tɔ, Lupɛŋ nɑ Kɑtɩ pɑ lʋlʋɣʋ nyǝ́mɑ nɑ Mɑnɑsee kpekǝle hɔɣɔlʋɣʋ lɛŋkʋ nɑ́ tɛmɑ pɛlɛ pɑ nyǝntʋ hikuɣu kɛ Yeliko ɩsɛntɑɑ kɛ Yɑɑtɑnɩ wɑɑlɩ nɑ ilim tǝlɩɩlɛ tɔɔ.

16 Ḿpʋ́ɣʋ́ Tɑcɑɑ tɔmɑ Moisi sɩ: 17 Kɔtʋlʋ Ɩlɑsɑɑ nɑ Nuŋ pǝyɑlʋ Yosuwee pɑɑ pɑɑsǝnɑ tɛtʋ tɑlʋɣʋ. 18 Pɑ́ kpɑ pɑɑ kpekǝle nte tǝ tɑɑ kɛ́ nyʋɣʋ tʋ wei ɩ kɑ́ pɑɑsǝnɑ-wɛ tɔ. 19 Mpɑ mpɑ pɑɑ kpɑ mpʋ tɔ pɑ hǝlɑ ntɔ: Yutɑ kpekǝle tɑɑ nyǝŋ ntɛ́ Yefune pǝyɑlʋ Kɑlɛpʋ. 20 Simiyɔŋ nyǝntɛ tɑɑ nyǝŋ ntɛ́ Amihuti pǝyɑlʋ Semuwɛlɩ. 21 Pɛncɑmɛɛ nyǝntɛ tɑɑ nyǝŋ ntɛ́ Kisiloŋ pǝyɑlʋ Ɩlitɑtɩ. 22 Tɑŋ nyǝntɛ tɑɑ nyǝŋ ntɛ́ Yokili pǝyɑlʋ Puki. 23 Yosɛɛfʋ pǝyɑlʋ Mɑnɑsee nyǝntɛ tɑɑ nyǝŋ ntɛ́ Ɩfoti pǝyɑlʋ Hɑnǝyɛlɩ. 24 Yosɛɛfʋ pǝyɑlʋ nɑɑlɛ nyǝŋ Ɩfǝlɑyim nyǝntɛ tɑɑ nyǝŋ ntɛ́ Sifitɑŋ pǝyɑlʋ Kemuwɛlɩ. 25 Sɑpulɔŋ nyǝntɛ tɑɑ nyǝŋ ntɛ́ Pɑɑnɑkɩ pǝyɑlʋ Ɩlisɑfɑŋ. 26 Ɩsɑkɑɑ kpekǝle tɑɑ nyǝŋ ntɛ́ Asɑŋ pǝyɑlʋ Pɑlǝtǝyɛlɩ. 27 Asɛɛ nyǝntɛ tɑɑ nyǝŋ ntɛ́ Selomitɩ pǝyɑlʋ Ahihuti. 28 Nefǝtɑli nyǝntɛ tɑɑ nyǝŋ ntɛ́ Amihuti pǝyɑlʋ Petɑyɛlɩ.

29 Mpɑ Tɑcɑɑ lǝsɑɑ sɩ pɑ́ tɑlɑ Kɑnɑɑŋ tɛtʋ kɛ Ɩsɛɣɛlɩ kpekɑ nyǝ́mɑ tɔɣɔlɛ.