1 Mɑ pəyɑlʋ ye n mʋɣɩ mɑ kʋyɔɣɔtʋtʋ,

nɑ ń tɔkəɣɩ mɑ kʋsəsɩɩtʋ kɛ nyɑ́ tɑɑ.

2 Ye n keŋ ŋkpɑŋʋɣʋ nɑ ləmɑɣɑsɛɛ kʋsɛɣɛsətʋ,

nɑ ń pəsənɑ lɑɑkɑlɩ kɛ nyɑ́ tɑɑ.

3 Ye n yɑɑ nyəm sɩ pə́ sənɑ-ŋ.

Nɑ ń kʋsɩ nyɑ́ nɔɣɔ nɑ ń yɑɑ nyʋɣʋ tɑɑ mɑɣɑsəm.

4 Ye n pɛɛkəɣɩ-wɩ ɩsɩɩ liɣitee,

nɑ ń cɑɑkɩ-wɩ nɑ ɩsəlɛ kʋsɛɛmlɛ ɩsɩɩ wɛnɑʋ.

5 Ɩlɛ mpʋ pə tɑɑ kɛ́ n kɑ́ cɛkənɑ Tɑcɑɑ nyɑmnɑʋ,

nɑ ɩsənɑ n kɑ́ nyəmɩ-ɩ tɔ.

6 Mpi tɔ, Tɑcɑɑ hɑɑkənɑ ləmɑɣɑsɛɛ,

nɑ ɩ nɔɣɔ tɑɑ lɩɩkɩ nyəm nɑ nyʋɣʋ tɑɑ mɑɣɑsəm tɔm.

7 Ɩ yeki nɑ tɑmpɑnɑ təŋlɑɑ təhikile ɩɩ lɑŋəɣɩ,

nɑ ɩ́ kentiɣi mpɑ pɑ lɑkɩ siɣisuɣu tɔ.

8 Ɩ wɑɑsəɣɩ mpɑ nɑ lɛlɑɑ pɑ wɛ leleŋ tɔ,

nɑ ɩ́ hɑsəɣɩ ɩ yəlɑɑ nɔɔhɛɛ tɛɛ.

9 Wɑɑtʋ ɩnəɣɩ n kɑ́ cɛkənɑ siɣisuɣu nɑ mpi pə təŋɑɑ tɔ,

nɑ mpɑɑŋ wei ɩ pukinɑ təpɑntɛ tɑɑ tɔ.

10 Mpi tɔ, n kɑ́ wɛɛnɑ ləmɑɣɑsɛɛ kɛ nyɑ́ lotu tɑɑ,

nɑ nyəm hɛɛsɩ nyɑ́ lɑŋlɛ.

11 N kɑ́ wɛɛnɑ nyəm nɑ nyʋɣʋ tɑɑ mɑɣɑsəm,

nɑ pɩɩ kenti nyɑ́ tɔɔ.

12 Nɑ pə́ yɑ-ŋ kɑwɑlɑɣɑ mpɑɑʋ tɑɑ,

nɑ ɩsɑɣɑtʋ yɔɣɔtəlɑɑ niŋ tɑɑ.

13 Nɑ mpɑ pɑ yelɑ mpɑɑʋ kʋsiɣisuɣu

nɑ pɑ́ kpɑɣɑ səkpɛtʋɣʋ nyəŋkʋ,

14 nɑ pɑ lɑŋlɛ hɛɛkənɑ ɩsɑɣɑtʋ lɑpʋ

nɑ pɑ́ yɔɔləɣənɑ ɩsɑɣɑtʋ tɔ pɑ niŋ tɑɑ.

15 Mpɛ ɩnɩ pɑ mpɑɑŋ kɛɛwɑɣɑ

nɑ pɑ hɑpɛɛ nɑ́ɑ́ koŋlɑɑ.

16 Ɩlɛnɑ pə́ yɑ-ŋ ɑlʋ kpɑɩ tʋ

wei ɩ tʋsəɣɩ yəlɑɑ nɑ ɩ nɔɔleleŋ tɔ ɩ niŋ tɑɑ.

17 Wei ɩ kisɑ ɩ pɑɑlʋ wei ɩ cɛpɑ ɩ ciɣitɑ

nɑ ɩ́ sɔɔ Ɩsɔ nɔɣɔ pɛɛlʋɣʋ tɔɔ tɔ.

18 Alʋ ɩnɩ ɩ təyɑɣɑ wɛnnɑ səm hɔɣɔlʋɣʋ kɛ́,

nɑ ɩ mpɑɑʋ sʋʋkɩ ɑtɛtəlɛ tɑɑ.

19 Mpɑ pɑ puki ɩ tɛ tɔ pɑ tɑɑ nɔɣɔlʋ ɩɩ tɑsəɣɩ məlʋɣʋ.

Pəyele pɑɑ tɑsəɣɩ weesuɣu mpɑɑʋ kɛ nɑʋ.

20 Mpʋ tɔ, təŋ yəlɑɑ kʋpɑmɑ ɩkpɑtɛ,

nɑ ń tɔkɩ tɑmpɑnɑ təŋlɑɑ mpɑɑʋ.

21 Mpi tɔ, mpɛ pɑ cɑkənɑ tɛtʋ tɑɑ.

Mpɑ pɑ fɛɩnɑ kɑwɑliyɑ tɔ mpɛ pɑɑ wɛɛnɑ tənɑ.

22 Amɑ pɩɩ kpiisi ɑsɑɣɑɑ kɛ tɛtʋ tɑɑ.

Pɩɩ ləsɩ Ɩsɔ lɔlɑɑ kɛ tə tɑɑ.