1 Ḿpʋ́ɣʋ́ kɔkɔlɔ sɔsɔ nɔɣɔlʋ ɩ lɑpɑ hɑtuu ɩsɔtɑɑ. Alʋ nɔɣɔlʋ ɩ tɑkǝnɑ ilim kɛ ɩ tɔɔ ɩsɩɩ pɑ tɑkʋɣʋʋ pʋʋɣʋ tɔ, nɑ ɩsɔtʋ nɑ́ɑ́ wɛ ɩ nɔɔhɛɛ tɛɛ, nɑ pǝ́ lʋʋ ɩsɔtʋlʋŋɑsɩ nɑɑnʋwɑ nɑ nɑɑlɛɣɛ ntenuɣu nɑ pǝ́ te ɩ nyʋɣʋ. 2 Ɩ kɑ pɩɩwɑɣɑ tǝtoɣotoɣo nɑ ɩ́ wʋsɑ lʋlʋɣʋ, nɑ lʋlʋɣʋ kʋnyɔntɔɣɔlɛ nɑ pǝ wʋsɑsɩ kpɑ-ɩ nɑ ɩ́ sʋʋ kɑpusi mɑpʋ.

3 Tǝnɑɣɑ kɔkɔlɔ lɛlʋ nɑ́ tɑsɑ lɑpʋ tɔtɔɣɔ ɩsɔtɑɑ. Tʋm sɔsɔ wei ɩ sɛɛwɑ ɩsɩɩ kɔkɔ tɔ ɩ lɩɩwɑ, ɩ nyɔɔŋ wɛ nɑɑtosompɔɣɔlɑɣɑ nɑ ɩ hǝŋ kɛ nɑɑnʋwɑ, nɑ nteniŋ temɑ pɑɑ ɩ nyʋɣʋ ŋku kʋ tɔɔ. 4 Ḿpʋ́ɣʋ́ ɩ pɑɑlɑ ɩsɔtɑɑ kɛ́ ɩsɔtʋlʋŋɑsɩ tintikɑ tooso tɑɑ kʋlʋmtǝlɛ nɑ ɩ sukɑ nɑ ɩ́ pɛtɩ tɛtʋ tɔɔ. Ɩlɛnɑ ɩ́ sǝŋ ɑlʋ ɩsɛntɑɑ sɩ ɩ́lɛ́ ɩ́ lʋlɩ ɩ pǝyɑɣɑ nɑ ɩnɩ ɩ li. 5 Apɑlʋpǝyɑɣɑ ŋkɑ kɑɑ tiiki piitimnɑɑ tǝnɑ nɑ nyǝɣǝlʋɣʋ kpɑ́tʋ́ɣʋ́ tɔɣɔ ɑlʋ ɩnɩ ɩ lʋlɑɑ. Ɩlɛnɑ pǝ́ kpɑɑnɑ ɩ pǝyɑɣɑ nɑ pǝ́ ponɑ-kɛɣɛ Ɩsɔ nɑ ɩ kumte pǝ kiŋ. 6 Ɩlɛnɑ ɑlʋ nɑ́ɑ́ se nɑ ɩ́ polo wʋlɑɣɑ tɛtʋ tɑɑ. Ɩsɔ kɑ tɑɣɑnɑ-ɩ tǝcɑɣɑlɛ kɛ tǝnɑɣɑ sɩ ɩ́ cɑɣɑ nɑ pɑ́ tɔɔ-ɩ kʋyɛɛŋ iyɑɣɑ nɑ kʋyɛɛŋ ŋmʋnʋɣʋ nɑ nɩɩtoso (1260) tɑɑ.

7 Ḿpʋ́ɣʋ́ yoou kʋlɑ ɩsɔtɑɑ. Misɛɛlɩ nɑ ɩ ɩsɔtɑɑ tillɑɑ nɑ tʋm nɑ ɩ́lɛ́ ɩ ɩsɔtɑɑ tillɑɑ pɑ yookinɑ nɑ tǝmɑ. 8 Amɑ Misɛɛlɩ-wɛ pɑ kǝlɑ tʋm nɑ pɑ́ tɔɣɔnɩ ɩ nɑ ɩ ɩsɔtɑɑ tillɑɑ kɛ ɩsɔtɑɑ. 9 Nɑ pɑ́ pɛtɩ tʋm sɔsɔ yɑɑ Sɑtɑnɩ wei ɩ puɣusiɣi ɑntulinyɑ tǝnɑ tɔ. Ɩ́ nɑ ɩ ɩsɔtɑɑ tillɑɑ kɛ pɑ kpɛntɑɑ nɑ pɑ́ pɛtɩ ɑtɛ.

10 Ḿpʋ́ɣʋ́ mɑ nɩɩ pǝ yɔɣɔtǝnɑ ɩsɔtɑɑ nɑ toŋ toŋ sɩ: Pǝnɛntɑɑ pǝ tɑlɑ Ɩsɔ ɩ́ wɑɑsɩ. Pǝnɛntɑɑ kɛ́ Ɩsɔ kɑ́ hʋ́lɩ́ ɩ kɑwulɑɣɑ toŋ. Nɑ pǝnɛntɑɑ kɛ́ ɩ Mesii kɑ́ hʋ́lɩ́ ɩ́lɛ́ ɩ pǝsʋɣʋ. Pǝ tɑɣɑ pʋlʋ tɔɔ, tɑ́ tɑɑpɑlɑɑ tɔm suulu wei ɩ kɑ sǝŋɑɣɑ tɑ́ Ɩsɔ ɩsɛntɑɑ nɑ ɩ́ suuki-wɛɣɛ tɔm kɛ tɑm tɔ pɑ lǝsɑ-ɩ ɩsɔtɑɑ nɑ pɑ́ pɛtɩ. 11 Ɩwǝyɑɣɑ cɑlǝm toŋ tɔɔ, nɑ tɑmpɑnɑ tɔm nti pɑ kpɑɑlɑɣɑ tɔ tǝ toŋ tɔɔ pɑ kǝlɑ-ɩ. Pɑɑ hɑwɑ pɑ weesiŋ kɛ́ sɩ ye sǝm sǝm. 12 Pǝ tɔɔ ɩlɛ ɩsɔtɔnʋɣʋ nɑ kʋ tɑɑ nyǝ́mɑ mɛ ɩ́ pɑɑ teu. Amɑ ɑtɛ nɑ teŋku pǝ tɔm wɛnnɑ wɑɩyo. Mpi tɔ, Ɩlɔɣɔʋ sɔsɔ lɩɩnɑ ɩsɔtɑɑ nɑ ɩ́ tii mǝ cɔlɔ nɑ ɩ́ hɑɣɑ pɑ́ɑ́nɑ́ kɛ teu, ɩlɛ pǝ tɑɣɑ pʋlʋ tɔɔ, ɩ nyǝmɑ́ sɩ ɩ wʋlɛ wʋsɑɑ.

13 Tʋm kɔmɑ nɑ ɩ́ nɑ́ sɩ pɑ pɛtɑ-ɩ ɑtɛ, ɩlɛnɑ ɩ́ sʋʋ ɑlʋ wei ɩ kɑ lʋlɑ ɑpɑlʋpǝyɑɣɑ tɔ ɩ wɑɑlɩ kɛ́ seu. 14 Ḿpʋ́ɣʋ́ pǝ nyɔsɑ ɑlʋ kɛ hɛkǝlɛ sɔsɔ keŋ nɑɑlɛ sɩ ɩ́ kʋlɩ hʋntʋ nɑ ɩ́ tɑlɑ ɩ tǝcɑɣɑlɛ kɛ wʋlɑɣɑ tɛtʋ tɑɑ. Tǝnɑɣɑ pɑɑ tɔɔ-ɩ pɩɩsɩ tooso nɑ pǝnɑɣɑ hɔɣɔlʋɣʋ tɑɑ, nɑ tʋm kɑɑ keesi-ɩ. 15 Tǝnɑɣɑ tʋm tɔ lʋm nɑ ɩ nɔɣɔ nɑ pǝ́ lɑ́ ɩsɩɩ pɔɣɔ sɔsɔɣɑ kɛ ɑlʋ ɩnɩ ɩ wɑɑlɩ sɩ lʋm holɑ ɩ́ kpɑɣɑ-ɩ. 16 Amɑ tɛtʋ wɑɑsɑ ɑlʋ ɩnɩ, tɛtʋ hɑɑ nɔɣɔ nɑ tǝ́ li lʋm mpi tʋm kɑ tɔnɑ ɩ nɔɣɔ kɛ mpʋ tɔ. 17 Ḿpʋ́ɣʋ́ tʋm mʋ ɑlʋ nɑ pɑ́ɑ́nɑ́ kɛ sɔsɔm, nɑ ɩ́ polo nɑ ɩ́ yoonɑ ɑlʋ piyɑ nsi pǝ yelɑɑ tɔ. Mpɛɣɛlɛ pɑ tǝnɑ mpɑ pɑ tǝŋǝɣɩ Ɩsɔ kʋheelitu nɑ pɑ́ tɔkɑ teu kɛ tɑmpɑnɑ nnɑ ɑ tɔɔ Yesu kulɑɑ tɔ. 18 Ɩlɛnɑ ɩ́ polo ɩ sǝŋ teŋku nɔɣɔ tɔɔ.