4
Sɑkɑlɩ toosee tɑkɑ kɑkpɑsɩ nyənɑ
1 Ḿpʋɣʋ ɩsɔtɑɑ tillu wei ɩ yɔɣɔtəɣənɑ-m tɔ, ɩ kɔmɑ nɑ ɩ́ ciɣiti-m ɩsɩɩ pɑ feesuɣu yʋlʋ wei ɩ tooki tɔ. 2 Ɩlɛnɑ ɩ́ pɔɔsɩ-m sɩ: Pepeɣe n nɑɑkɩ? Mɑ cɔ-ɩ sɩ: Mɑ nɑɑkɩ wʋlɑ fətəlɑ. Nɑ nim tətʋlɛ kɛ ɩ nyʋɣʋ tɑɑ. Nɑ fətəlɑnɑɑ kɛ nɑɑtosompɔɣɔlɑɣɑ, nɑ pɑ kpoŋkpontu nɑ tə kɔkɔ. 3 Pə kɑɑsɩ nɑ Olifi tɩɩŋ nɑɑlɛ səŋɑ tənɑɣɑ ŋwɑɑŋ nɑ mpəlɛ tɔɔ.
4 Ntɛnɑ mɑ́ pɔɔsɩ ɩsɔtɑɑ tillu wei ɩnɩ ɩ yɔɣɔtənɑ-m tɔ sɩ: Mɑ cɑɑ, pepeɣe pə tənɑ ɩsəntɔ pə hʋləɣɩ?
5 Ɩlɛnɑ ɩ́ pɔɔsɩ-m sɩ: Ye mpʋ n tɑ nyɩ? Mɑ sɩ: Aɑɩ, mɑ cɑɑ. 6 Mpʋɣʋlɛ sɩ, Tɑcɑɑ heelɑ-m tɔm sɩ mɑ́ tɛləsɩ Solopɑpɛɛlɩ sɩ:
Pə tɑɣɑ toŋ yɑɑ nɑntʋ tɑɑ ɑlɑɑfəyɑ tɔm.
Amɑ mɑ feesuɣu toŋ kɛ́.
Pə tənɑ pə tʋ mɑ́ mɑ yɔɣɔtənɑ mpʋ.
Nɔɔsɩ nsi pɑ sɩɩ Solopɑpɛɛlɩ tɔ
7 Pɑɑ wɑhɑlɑnɑɑ kɑɑwɑ ɩsɩɩ pʋɣʋ,
Tɑcɑɑ kɑ́ yɔkɩ-wɛɣɛ.
Solopɑpɛɛlɩ kɑ́ ləsɩ kɑntəkɑɣɑ pəlɛ nte
pɑ kʋnɑ Ɩsɔ təsɛɛlɛ nyʋɣʋ tɔ.
Ɩlɛnɑ yəlɑɑ wiliti teu.
8 Ḿpʋɣʋ Tɑcɑɑ heelɑ-m sɩ:
9 Solopɑpɛɛlɩ kɑ́ ŋmɑnɑ Ɩsɔ təsɛɛlɛ tənɛ
nɑ ɩ niŋ nɑ ɩ́ tɛ-tɛ.
Wɑɑtʋ ɩnəɣɩ ɩ́ kɑ́ nyɩ sɩ Pə tənɑ pə tʋ Tɑcɑɑ tilinɑ-m mə kiŋ.
10 Mpɑ pɑ nyənəɣɩ yem kɛ́ təmisi sənɛ tɔ,
pɑ lɑŋɑ kɑ́ hʋlʋmɩ wɑɑtʋ wei pɑɑ nɑ́
kʋmɑɣɑsʋɣʋ kɛ Solopɑpɛɛlɩ niŋ tɑɑ tɔ.
Fətəlɑnɑɑ nɑɑtosompɔɣɔlɑɣɑ ɩnəɣəlɛ
Tɑcɑɑ ɩsɛ nnɑ ɩ nɑɑkənɑ tɛtʋ tənɑ tɔ.
11 Ḿpʋɣʋ mɑ́ pɔɔsɑ-ɩ sɩ: Olifinɑɑ tɩɩŋ wei ɩ səŋnɑ ḿpʋɣʋ fətəlɑ ŋwɑɑŋ nɑ ɩ mpəlɛ tɔɔ?
12 Ɩlɛnɑ mɑ́ tɑsɑ pɔɔsʋɣʋ sɩ: Olifinɑɑ tɩɩŋ wei kɛlɛ wʋlɑ fusi nsi sɩ tɑɑ nim lɩɩkɩ tɔ? 13 Ntɛnɑ ɩ́lɛ́ ɩ́ pɔɔsɩ-m sɩ: N tɑ nyɩ? Mɑ sɩ: Aɑɩ. 14 Ḿpʋɣʋ ɩ́ cɔ-m sɩ: Olifinɑɑ tɩɩŋ ɩnəɣəlɛ ɑpɑlɑɑ nɑɑlɛ wei pɑ pəlɑ nim nɑ pɑ́ kpɑ-wɛɣɛ Pə tənɑ pə tʋ Tɑcɑɑ təmlɛ nyə́mɑ tɔ.