4 Ḿpʋɣʋ kʋyɑkʋ nɑkʋlɩ mɑ Ɩsɔ Tɑcɑɑ tɔmɑ-m sɩ: Pəsɩ heeŋ wei pɑ puki kʋɣʋ tɔ ɩ tiikilu. 5 Ɩ yɑtɑɑ nɑ́ lɛntəɣɩ-ɩ kɛ́ pɑɑ nɑɑkɩ pɑ tɑsəkəlɛ. Pə kɑɑsɩ nɑ ɩ pɛɛtəlɑɑ nɑ́ɑ́ woŋiɣi nɑ pɑ́ sɑŋ Ɩsɔ sɩ pɑ sʋʋ toŋ. Heeŋ mɑɣɑmɑɣɑ tiikilɑɑ nɑ́ fɛɩ ɩ pətɔɔtəlɛ. 6 Tɑcɑɑ yɔɣɔtənɑ sɩ: Mɑ kɑɑ wɛɛnɑ ɑtɛ yəlɑɑ pətɔɔtəlɛ. Mɑɑ tʋ pɑɑ wei kɛ́ ɩ wulɑʋ yɑɑ ɩ cɔlɔ tʋ niŋ tɑɑ. Awulɑɑ kɑ́ kpiisi tɛtʋ, mɑ kɑɑ fiti nɔɣɔlʋɣʋ pɑ niŋ tɑɑ.

7 Ḿpʋɣʋ Sɑkɑlɩ tɔmɑ sɩ: Mɑ́ pəsənɑ ntɛɣɛ tiikilu wei ɩ heeŋ yɑmpɑɣɑtəlɑɑ yɑkɩ nɑ pɑ́ kʋɣɩ tɔ. Mɑɑ cɑɑ kpɑtəŋ kɛ nɑɑlɛ nɑ mɑ́ hɑ lɛŋkʋ sɩ: Sɔɔlʋɣʋ. Ɩlɛnɑ lɛŋkʋ sɩ: Nɔɣɔ kʋlʋmɑɣɑ. Mɑɑ pɑɑsənɑ mɑ heeŋ. 8 Ɩsɔtʋ kʋlʋm tɑɑ kɛ́ mɑ yɑsɑ tiikilɑɑ tooso. Mɑ suulu tɛmɑ mɑ heeŋ tɔɔ, nɑ ɩ́lɛ́ ɩ́ nyəɣəsɩ-m. 9 Ɩlɛnɑ mɑ tɔmɩ-ɩ sɩ: Mɑ kɑɑ tɑsɑ-mɛɣɛ pɑɑsənɑʋ nɑ pə́ tɑɑŋɩ. Ɩlɛ mpɑ pɛlɛ pɑ cɑɑkɩ səm tɔ pɑ́ sɩ. Pɑ́ kʋ mpɑ pə wɛɛ sɩ pɑ́ kʋ tɔ. Ye pə kɑɑsɑ mpɑ ɩlɛ pɛlɛ pɑ li təmɑ.

10 Ɩlɛnɑ mɑ́ kpɑɣɑ kpɑ́tʋɣʋ ŋku pɑ yɑɑ sɩ Sɔɔlʋɣʋ tɔ nɑ mɑ́ pɛlɩ-kʋ. Ɩlɛnɑ mɑ́ yɔkɩ nɔɣɔ ŋkɑ mɑ́ nɑ piitimnɑɑ tɩɩ pɛɛlɑɑ tɔ. 11 Mɑ nɑ-mɛ tɑ́ nɔɣɔ pɛɛlʋɣʋ yɔkɑɑ. Ɩlɛnɑ heeŋ pɑɣɑtəlɑɑ mpɑ pɑ keŋnɑ-m tɔ pɑ́ cɛkənɑ sɩ Tɑcɑɑ nɔɣɔ wɛ pə tɑɑ. 12 Ɩlɛnɑ mɑ́ heeli-wɛ sɩ: Ye pə mɑɣɑ-mɛ ɩ́ fɛlɩ-m liɣitee, ye pə tɑɣɑ mpʋ ɑwusɑ. Ntɛnɑ pɑ́ mɑɣɑsɩ-yɛɣɛ nyəɣətʋ hiu nɑ nɑɑnʋwɑ. 13 Ḿpʋɣʋ Tɑcɑɑ tɔmɑ-m sɩ: Pɛtɩ liɣitee sɔsɔɔnɑ nnɑ pɑ mɑɣɑsənɑ-m mpʋ tɔɣɔ koolu. Ɩlɛnɑ mɑ́ pɛtɩ-yɛɣɛ koolu kɛ Ɩsɔ təsɛɛlɛ tɑɑ. 14 Pəlɛ pə wɑɑlɩ, ɩlɛnɑ mɑ́ pɛlɩ mɑ kpɑ́tʋɣʋ ŋku pɑ yɑɑ sɩ Nɔɣɔ kʋlʋmɑɣɑ tɔ. Ɩlɛnɑ pə́ yɑsɩ Ɩsɛɣɛlɩ nɑ Yutɑ. 15 Ḿpʋɣʋ Tɑcɑɑ tɑsɑ-m heeluɣu sɩ: Pəsɩ tiikilu kʋmɛlɛŋ. 16 Pəlɛ pə pɑɑsi mɑɑ ponɑ-mɛɣɛ tiikilu kʋfɑlʋ. Ɩ́lɛ́ ɩ kɑɑ pɑɑsənɑ heeŋ, hɑlɩ ɩ kɑ́ pɛɛkɩ ɩ kʋɣʋ kɛ́. Ɩ kɑɑ pɛɛkɩ kʋlepiŋ, yɑɑ ɩ́ fɛ wei pə wɩɩkɩ tɔ. Yɑɑ ɩ́ pɑɑsənɑ ɑlɑɑfəyɑ nyəŋ. Hɑlɩ ɩ kɑ́ tɔɣɔ ɩ tɑɑ kʋyɑsələŋ. Ɩ kɑ́ sɛtɩ lɛləŋ ɑcʋwɑ sɩ ɩ́ tɑɑ tɔ.