Iwarakha ilhepiye ni
Nayuda
Malhove o uholhelha
Iwarakha ineehaniya iwarakha i Nayuda inoromolhiya wo nchina na ntu lhempe yeyo iwarakha iyo. Nayuda anowiichuwaniha ukhalha mwanhima aya Nayakhobo, nhima awe Yesu. Tho, inorumelhelhiya wiira phi mmoka a ashihimawe Yesu (nlhako wo 1). Khanichuwelhaka yakhalhaka wiira iwarakha ilha yaalhakelhiye urweehiya wa nlhoko unchuwania wa attu anrumelhenlhe Kuristo. Ni wo ulhikaaniha ni Malhehano o Khalhayi, attu yaalhakelhiye ushoma iwarakha i Nayuda yaari nlhoko wa Ayahudi. Inakhalhaka chiicho etu, anooniha wiira anrweeha iwarakha aya wa “onkhaye ehaniye, anottuniya ni Nlhuku Athithi ni ulhutaana ni Yesu Kuristo Moopolhi” (nlhako wo 1). Iwarakha inoonia wiira yalhepiye iyaakha yaaphiyelha iyaakha yo 60 baada yo uyaria wa Kuristo.
Nnikwa wo ulhepiya iwarakha wa milhoko cha attu anrumelhenlhe Kuristo onkhaye waari waamuka ni waachiichiha ahipoterihiye ni meettuchiho o woothachiya (nlhako wo 1:4, 2 Nap nlhako wo 2:1). Ntu lhempe iwarakha ilha noohokolhelha uhimiacha malhove ni chittu chihimiye ni Malhehano o Khalhayi wiira alhipihe malhove awe. Iwarakha ilha inoohimiacha malhove menchi ari nhina iwarakha yo nayelhi i Napeturo ihimiaka mwaha wo waamuka uhiya uttwara meettuchiho a o wiittuchiha o woothachiya (nlhako wo 1:4, 2 Napeturo nlhako wo 2:1). Ihimiaka tho miaha cho minepa o wiirimu ni mwaha wo Usodoma ni Ugomora.
Chiri nhina
Nayuda anopachera wo waashikuria attu (nlhako wo 1:1-2).
Tho, anoohimiacha nnikwa aya wo ulhepa iwarakha, waamuka ahiye mwaha wo uttwara meettuchiho o woothachiya (nlhako wo 1:3-4).
Baada yo vavawo anowaamuka attu wo ulhikaaniha ni chittu chaakhumelhenlhe mahuku o Malhehano o Khalhayi (nlhako wo 1:5-16).
Tho, anoothepa waamuka ni waahimeria chittu chinothananiya aya upanga (nlhako wo 1:17-23).
Anomalhiha iwarakha aya wo untotopelha Nlhuku (nlhako wo 1:24-25).
1
1 Mii Yuda karumiya a Yesu Kuristo ni nhima aya Nayakhobo.
Kinolhepa iwarakha iwe uwaninyu mwaatti onkhaye mwiihaniye, nnottuniya ni Nlhuku Athumwanihu ni ushungiya rata wo nlhatu na Yesu Kuristo.
2 Munchereriyeke chinene ikiriri ni mpuha ni uttunana munlhokoni mwinyu.
Owiittuchiha o woothacha
3 Ashilhoko aka ninottunana, kahoona ihorera chinene ulhepa nlhove uwaninyu wo nlhatu wo woopolhiya unovarelha ihu onkhaye. Nansho kihoona vahorera wiira kilhepe kuukurumichakani wiira nthepeke uvarelha nrima Nlhuku waakawenlhe awe attu atakatifu nkwaha mmoka tu wo ikatema yonkhaye. 4 Ukhalhawaya attu ahinchuwenlhe Nlhuku aheekelhiha wo nivitho mmilhokoni mwihu, attu anopanga chittu cho uhilhoka anokukureeha nttenga wo nnema wa Nlhuku wiira apange ishembwere ni unkhota Yesu Kuristo rii vekha awe Nholhelhi ni Athithi ihu. Nansho Malhove Matakatifu ahomalha ulhohera toka khalhayi uhukumulhiya unaaweherera yayo attu ayo.
5 Nansho vano kuwuupushekeni ittu imoka inakhalharu mwahomalha uchuwelha chittu chonkhaye chi, wiira muupuwelheke Nlhuku Athithi chenre aya wo uwoopolhani mwaatti attu o Uisraeli ni uuthamihani ilhapo yo Umisri ni uweevakacha yahaarumelhenlhe alhe. 6 Chiicho muupuwelheke minepa cho wiirimu ahaavarechenshe ikuru chaavahiye aya ni uhiya ukhalha vanipuroni waya, Nlhuku ahaatikhelha wiipiphini ni waattuka wo minyororo mahuku o uhimalha wiira awe yaahukumulhiya nenno Nihuku nulhupalhe nno. 7 Tho, muupuwelheke etu ilhapo cho Usodoma ni Ugomora ni iwani cho nthotho mwaya. Anenchi o wowo yahopangacha thoko minepa chaapannge aya chilhe, yahopanga ishembwere ni upangacha chittu cho uhilhoka cho urukunusha moopelho oopiye aya nkayaatwarushiya ntwarusho wo mooro wo mahuku o uhimalha akhalhe meettuchiho o waamuka attu onkhaye.
8 Wo iphiro thoko chechiyo phiri aya yayo attu ayo. Itora chaya chinowaaholhelha unanariha iruttu chaya ashinene ni uveeha ikuru cha Nlhuku ni uruwana chuupiye cho nthimicho cho uchulhu. 9 Ata Mikaele, nnepa o wiirimu mulhupalhe kheerilhe chiicho, vanne awe ni Nakare wo nlhatu no iruttu ya ashinna Musa. Mena khaalhikanche uchukulha ni unhukumulha Nakare wo unruwana nansho eerilhe “Athithi anene o uchacherekeni.” 10 Nansho alha attu alha anooruwana ittu iriyoothe ihichuwenlhe aya, anowa wiivakachiya wo malhove thoko yayo achuwenlhe aya ayo wo wuupiya waya thoko ashinama ahirii ni irusho.
11 Ahothapana yayo attu ayo. Yayo attu ayo ahottwara meetelho a Nakaini. Wo nlhatu no uttuna chinene uttuviya nchurukhu aheethapaniha thoko Balaamu. Ahowonya thoko Kora chenre awe wo uwonya. Ni ayo ahotwarushiya thoko yayo chaatwarushiye aya. 12 Yayo attu ayo arii thoko manepa o unanariha vanolhia aya mu ikaramu cho uttunana chinolhia inyu. Anokhalha thoko mahute ahinorupa ipulha anoveverushiya ni iphioo. Yayo arii thoko miri chuumilhe velhi chihinemma, chiphelhiye, chikhwilhe. 13 Yayo attu ayo arii thoko mawimbi o ubahari antutuma niphoru wo mitheko chaya cho wuulhiha muru. Yayo attu ayo arii thoko ittotwa chinothemwathemwa cheeshiye wiipiphini chinene mahuku o uhimalha.
14 Nahenoko, o iyari yo saba toka apwiiya Adamu, yaholhohera aachaka yayo attu ayo wiira, “Mwiwelhelheke, Athithi anoowa ni maelufu menchi ahinaalhakelhia o minepa chaya cho wiirimu 15 uwa uwaahukumulhani attu onkhaye ni waatwarusha attu onkhaye ahinonthimicha Nlhuku wo milhatu cho uhilhoka chinopangacha aya wo uhimwoova Nlhuku ni wo nlhatu wo malhove o uhilhoka onkhaye yoolhumanche aya attu o uwonya ayo.”
16 Kila nihuku yalha attu alha phi attu o uchukulhacha ni waahukumulha attu akina ni uttwaratwara iphiro chaya cho uhilhokalhoka, yeeshipaka ni wulhumacha chittu cho waatotopelha attu akina chinene, yeelhohaka ashineneru.
Waamukiya ni malhehero
17 Nansho mwaatti ashilhoko aka, muupuwelheke mwaha waahimeriye inyu katashi ni akarumiya a Athithi Yesu Kuristo. 18 Yowirenlheni wiira, “Mahuku o umalhelha vanohalha aya waaya, anowa aakhumelhelha attu anohalha unyoholhani mwaattiva, attu anottwara nikakata naya no uhilhoka.” 19 Attu anohimiacha mwaha wo umwalhaana, attu anottwara nikakata no velhaponi ahirii ni Iphumu ya Nlhuku.
20 Nansho mwaatti ashilhoko aka, mwiithekeke mwaashinene wo nrima winyu ntakatifu chinene ni ulhapelha wo machiri o Iphumu ya Nlhuku. 21 Nlhokelheke mu uttunani wa Nlhuku mwaawehereraka Athithi Yesu Kuristo arii wo ikiriri aya anowa ovahani ukumi wo mahuku o uhimalha.
22 Mwoonelheke ikiriri attu o nipampa. 23 Mwoopolheke ni waarulha ukhuma umooroni, mwoonelheke ikiriri ni wiichinanelha, nvengaka ata ikuwo chaya chiri ni manepa o nikakata naya no mwiiruttuni no uhilhoka.
Ulhapelha wo utotopelha
24 Muntotopelheke yoyo nooria waashunga attu ahikwakwathuwe ni waapiha wo uhitteka mpaka unthimichoni wawe wo uhilhaphachiya, wo uteelhiya chinene, 25 Yoyo ri vekha awe, Nlhuku Moopolhi ihu, ukhalhe nthimicho mulhupalhe ni machiri ni ikuru wo iphiro ya Athithi Yesu Kuristo, ukhuma machokholhelho, vano va ni ata mahuku o uhimalha. Aye.