2 ሳሙዔኤሌ ማፃኣፖ
ዓይፆ ካሮ
ላማሳ ሳሙዔኤሌ ማፃኣፓ፦ ሳሙዔኤሌ ማፃኣፖ ቤርታሳዞ ሄሊ ፃኣፒንቴያ ማዓዛ፥ ዳውቴ ቤርታዺ ዾኦሎ ዛሎ ዓጮይዳ ዪሁዳኮ ካኣቲ ማዔሢ፤ (ዓይ. 1–4) ዬካፓ ኬዶ ዛሎ ዓጮ ማዔ፥ ዒስራዔኤሌንታ ዬኖ ዓጬሎኮዋ ቢያ ካኣቲ ማዒ ዎይሤሢ ዛላ ኬኤዛያኬ (ዓይ. 5–24)። ማፃኣፔላ፦ ዳውቴ ፔኤኮ ካኣቱሞ ዓጮ ዳልጊሻኒ፥ ሃሣ ፔ ቢታንቶ ዶዲሺ ዴይሣኒ ዓጬሎኮ ጋሮና ዙሎናፓ ሙካ ሞርኮና ዖልቴ ዼኤፒ ዼኤፒ ዖልዚያ ኬኤዛኔ። ዳውቴ ፆኦሲ ዒናፓ ጉሙርቃያ፥ ሃሣ ናሽካያ፤ ዬያጉዲ ዴራኣ ዒዛ ጉሙርቃያ ማዔሢ ሃኖ ማፃኣፖይዳ ኬኤዚንቴኔ፤ ሃሣ ጊንሣ ፔቴ ፔቴና ዒዚ ሚጪንቱዋዖ ፑርታ ማዾ ማዻያታሢና ፔ ማሊፆ ኩንሣኒ ፑርታ ፑርታ ጎሜ ማዼሢያ ፓይዲ ኬኤዛኔ። ጋዓንቴ ፆኦሲ ማሊፆ ኬኤዛሢ፥ ናኣታኣኔ ሙኪ ዒ ማዼ ጎሞ ኬኤዜ ዎዶና ፔኤኮ ጎሞ ቡኡፂ ፆኦሲ ዒዛይዳ ዓጌ ባኮዋ ዔኬሢ ኬኤዛኔ።
ዳውቴ ናንጌ ናንጎና ዒ ማዼ ማዻ ዒስራዔኤሌ ዴሮም ሚርጌና ኮሺ ማዔሢሮ ዒዛኮ ጊንፃፓ ዓጮይዳ ሜታ ሄላ ዎዶና ቢያ ሜሌ ካኣቲ ዔያታ ካኣታሳኒ ኮዓዖ ዳውቴ ናይ ሃንጎ ዳውቴ ዜርፃፓ ማዔያ፥ ዓዳ ዳውቴጉዲ ዔያቶ ዎይሣንዳያ ዓሲ «ዓይጌ ኑም ዒንጋንዳይ?» ጌይ ኮዓኔ።
ማፃኣፔላ ዱማ ዱማ ዓርቄ ባኮ
ዳውቴኮ ዪሁዳይዳ ካኣታዺፆ (1፡1—4፡12)
ዒስራዔኤሌ ዓጮ ጉቤይዳ ዳውቴኮ ካኣታዺፆ (5፡1—24፡25)
1. ቤርታሳ ሌዖ (5፡1—10፡19)
2. ዳውቴና ቤርሳቤሆና (11፡1—12፡25)
3. ሜቶና ዋኣዮና (12፡26—20፡26)
4. ጋፒንፆ ሌዖ (21፡1—24፡25)
1
ዳውቴ ሳኣዖኦሌኮ ሃይቦ ዋይዜሢ
1 ሳኣዖኦሌ ሃይቄስካፓ ዳውቴ ዓማሌቄ ዓሶ ዖሎና ባሺ ማዓዖ ፂቅላጌይዳ ላምዖ ኬሊ ዴዔኔ፤ 2 ሃይሣሳ ኬሎና ፔቴ ዼጌ ሳኣዖኦሌንሢ ዓኣ ቤዛፓ ሙኬኔ፤ ዬይ ናማ ዒማና ፔኤኮ ዓፒሎ ዳርዚ፥ ቶኦኮይዳኣ ሲላሊ ዋሂ፥ ዳውቴ ኮይላ ሙካዖ ሳዓ ላሂ ቦንቾ ዔኤሊሢ ዔኤሌኔ፤ 3 ዳውቴ ዒዛ፦ «ዓንካፓ ኔ ሙኬይ?» ጌይ ዖኦጬኔ።
ዒዚ ማሃዖ፦ «ዒስራዔኤሌ ዓሳ ዓኣ ቤዛፓ ቶሊ ታ ሙኬኔ» ጌዔኔ።
4 ዳውቴ ዒዛ ኮይላ፦ «ሂንዳ ማዺንቴ ባኮ ቢያ ታኣም ኬኤዜ» ጌዔኔ።
ናማ፦ «ኑኡኮ ፖኦሊሳ ዖሎና ባሺንቲ ጳሽኬኔ፤ ሚርጌ ዓሲ ኑኡኮ ሃይቄኔ፤ ሃሣ ሳኣዖኦሌንታ ዒዛኮ ናኣዚ ዮናታኣኔያ ዎዾናኔ» ጌዔኔ።
5 ዳውቴ ዬያ ሃይሶ ዔኪ ሙኬ ዼጌሢ ኮይላ፦ «ሳኣዖኦሌንታ ዒዛኮ ናኣዚ ዮናታኣኔንታ ሃይቄሢ ዎዲ ኔ ዔሬይ?» ጌይ ዖኦጬኔ።
6 ዼጌሢ ማሃዖ፦ «ታኣኒ ጊልቦዓ ዹካ ዓኣዖ ሳኣዖኦሌ ፔኤኮ ዎርፆ ኮኦላዺ ዓኣንቴ፥ ሃሣ ዒዛ ሞርኮኮ ሳርጌሎ ዖይታ ዴዒ ዖላ ዓሶንታ ፓራሢና ዖላ ዓሶንታ ዒዛ ባንሢ ሙካንቴ ታ ዴንቄኔ፤ 7 ዒዚ ዒማና ጊንሢም ሺሪ ታና ዴንቃዖ ዔኤላዛ፥ ታኣኒ፦ ‹ዮ! ታ ጎዳ› ጌዔኔ፤ 8 ዒዚ ታና፦ ‹ኔ ዓንኮ ዓሲዳይ?› ጌዒ ዖኦጬም፥ ታኣኒ ዓማሌቄ ዓሲታሢ ኬኤዜኔ፤ 9 ዬካፓ ዒዚ፦ ‹ሃኒ ሙኪ ታና ዎዼ፤ ዱኡቲ ታ ማኣሳኒ ዓኣሢሮ ታ ሃይቄያዋይ!› ጌዔኔ፤ 10 ዒዚ ሎሎኦማዖ ሃይቃንዳሢ ታ ዔሬሢሮ ዒዛ ባንሢ ሙኪ ታ ዒዛ ዎዼኔ፤ ዬካፓ ታኣኒ ዒዚ ቶኦካ ዓጋ ቦንቾ ባኮንታ ጋዎንታ ዔኬኔ፤ ታ ጎዳ! ሃይሾ፥ ታ ኔኤም ዔኪ ሙኬኔ» ጌዔኔ። 1፡10 1ሳሙ. 31፡1-6፤ 1ፆኦሲ. ዓሃኬ 10፡1-6።
11 ዬያሮ ዳውቴ ዖያዖ ፔኤኮ ማኣዓሢ ዳርዜም ዒዛና ዎላ ዓኣ ዓሳኣ ዒማይዴኔ፤ 12 ሳኣዖኦሌንታ ናኣዚ ዮናታኣኔንታ ፆኦሲ ዖሎ ዖላ፥ ዒስራዔኤሌ ዓሳ ሚርጌ ሃይቄሢሮ ዴንዲ ሳዓ ዓማንዳያ ሄላንዳኣና ሙኡዚ ሙዑዋዖ ዖዪ ዬኤኬኔ።
13 ዳውቴ ዬያ ሃይሶ ዔኪ ሙኬ ዼጌሢ፦ «ኔ ዓንኮ ዓሲዳይ?» ጌይ ዖኦጬኔ።
ዒዚ ማሃዖ፦ «ታ ኔ ዓጮይዳ ቤቲ ሙኪ ናንጋ፥ ዓማሌቄ ዓጪ ዓሲ ናይኬ» ጌዔኔ። 14 ዳውቴ ዒማና፦ «ሂዳዖ ናንጊና ናንጋ ጎዳ ዶኦሚ ካኣታሤ ካኣቲ ዎዲ ኔ ጫርቂ ዎዼይ?» ጌይ ዖኦጬኔ። 15 ዬካፓ ዳውቴ ዒዛና ዎላ ዓኣ ዓሶይዳፓ ፔቴ ዓሲ ዔኤላዖ፦ «ሃያ ዎዼ!» ጌይ ዓይሣዛ፥ ዬይ ዓሢ ዬያ፥ ዓማሌቄ ዓጮ ናማ ጳርቂ ዎዼኔ፤ 16 ዒማና ዳውቴ ዓማሌቄ ዓሳሢ ኮራ፦ «ሃያ ባኮ ኔ ኔጊዳ ኔኤሮ ኔኤኒ ዔኪ ዬዔኔ፤ ናንጊና ናንጋ ጎዳ ዶኦሜ ካኣቲ ‹ታ ዎዼኔ› ጌይ ኬኤዚፆና ኔጊዳ ኔ ኔኤሮ ዎጌኔ» ጌዔኔ።
ዳውቴ ሳኣዖኦሌና ዮናታኣኔና ዛሎ ቃዬ ቃዮ
17 ዳውቴ ሳኣዖኦሌና ዮናታኣኔና ዛሎ ዖዪ ቃዬኔ፤ 18 ዬያጉዲ ሃሣ ሂኢሺ ዛላ ቃዪንቴ ቃዮ ዪሁዳ ዴራ ጌይ ጌይ ዔራንዳጉዲ ዒዚ ዓይሤኔ፤ ዬይ ቃያ ያሻሬ ማፃኣፖይዳ ፃኣፒንቲ ዓኣኔ፤ 1፡18 ዒያ. 10፡13።
19 «ኑኡኮ ሱኡጋ ዒስራዔኤሌ ጌሜሮይዳ ሃይቄኔ፤
ኑኡኮ ፖኦሊሶፓ ዔርቴ ዶዶ ዓሳ ኩዴኔ!
20 ዬያ ሃይሶ ጋኣቴይዳ ኬኤዚፖቴ፤
ዓስቄሎና ጎይፆይዳኣ ጌስቲፖቴ፤
ፒሊስፄኤሜ ላኣላ ዎዛዻንዳጉዲ
ዓቲንቶ ቤርቶ ቲቂንቲባኣ ዓሶኮ
ላኣሎ ዒላሺሲፖቴ።»
21 «ዔርቴ ዖሎ ዓሶኮ ጊቲማ ዒኢካ ኬኤሪንቲ ዓቴሢሮ
ሳኣዖኦሌኮ ጊቲማ ዛይቶና ዑጪንቶ ዓቴሢሮ
ጊልቦዓ ጌሜሮይዳ ዒርዚ ዋርቆፓ
ሃሣ ዖልኬያ ዖልካዾፓ!
ዔያቶኮ ጎዦይዳ ፔቴ ባኣዚታዎ ባቃሎፓ፤
22 ዮናታኣኔኮ ዓኣዛ ሳኣ ኬዱዋያኬ፤
ሳኣዖኦሌኮ ጬንቾ ዓፓራ ሞርኮ ቲቂ ኩርሳያኬ፤
ዎልቆና ዓኣ ዼኤፖ ቆፂ ሜንሣያኬ፤
ሞርኮዋ ዎዻያኬ።»
23 «ዒስራዔኤሌ ዴራ ቢያ ሳኣዖኦሌና ዮናታኣኔና ዒናፓ ናሽኪ ዔያቶ ሄርሻኔ፤
ሳኣዖኦሌና ዮናታኣኔና ዱማዹዋዖ ዎላ ናንጊ፥ ዎላ ሃይቄኔ፤
ዔያታ ኮኦኬይዳፓ ባሼ ሩኡራያ፥
ዞቢዳፓኣ ባሼ ዎልቄ ዓኣያኬ።»
24 «ዒስራዔኤሌ ላኣሊዮቴ!
ሳኣዖኦሌ ዒንሢ ሚዛጶ ሻኣዦ ዓፒሎ ማይሴሢሮ
ዎርቆና ሚዛጲሶና ማኣዓሢ ማይሴሢሮ
ሳኣዖኦሌ ዬኤኩዋቴ!»
25 «ዔርቴ ፖኦሊሳ ቢያ ኩዴኔ፤
ቢያሢ ዖሎና ሃይቄኔ፤
ዮናታኣኔያ ጌሜሮይዳ ሃይቂ ላሄኔ!»
26 «ታ ዒሻሦ፥ ዮናታኣኔ!
ታ ኔ ዛሎ ዒናፓ ዖያኔ፤
ኔኤና ኑ ዎሊ ኮሺ ናሽካያኬ፤
ኔ ታና ናሽካ ናሹማ ሃይማኬ ጌይንቱዋያኬ፤
ዬይ ናሹማ ላኣሊ ናሽኮያይዳፓ ዑሣኬ።»
27 «ዎልቆና ዓኣ ዼኤፖ ዖሎ ዓሳ ሃይቄኔ!
ዔያቶኮ ዖሎ ዓንጋማኣ ጉሪ ዓቴኔ።»