1 ሙሴ ሃሣ ኬኤዛዖ፦ «ዒንሢ ናንጊና ናንጋ ጎዳ ማዔ ዒንሢኮ ፆኦዛሢ ናይኬ፤ ዬያሮ ዓሲ ሃይቄም ዒንሢ ዬኤካ ዎዶና ዑፆ ዋኣጪንቲ ቶኦኮዋ ዒንሢኮ ጉኡሊንቲፖቴ፤ 14፡1 ሌዊ. ዓኬ 19፡28፤ 21፡5። 2 ናንጊና ናንጋ ጎዳ ማዔ ዒንሢኮ ፆኦዛሢም ዒንሢ ዱማዼ ዴሬኬ፤ ሳዖይዳ ናንጋ፥ ሃንጎ ዓሶይዳፓ ቢያ ዒዛም ዱማዼ ዴሬ ዒንሢ ማዓንዳጉዲ ፔኤም ዒንሢ ዒ ዶኦሬኔ» ጌዔኔ። 14፡2 ኬሲ. ማፃ 19፡5-6፤ 4፡20፤ 7፡6፤ 26፡18፤ ቲቶ 2፡14፤ 1ጴፂ. 2፡9።

3 «ቄፄ ማዔ ዓይጎ ባኣዚኮዋ ዓሽኮ ሙይፖቴ፤ 4 ዒንሢ ዓሽኮ ሙዓንዳጉዲ ኮይሳ ባካ፦ ባይ፥ ማራይ፥ ዋኣሪ፥ 5 ሮኦቶ፥ ጌንዓ፥ ሞይሌ፥ ሚርዳ፥ ጋፒሪንታ ዎሾንታኬ። 6 ቶኮ ሹቁላ ላምዖ ፓቂንቴያ፤ ሃሣ ዓሌ ዻዓ ባኮ ሙዑዋቴ፤ 7 ጋዓንቴ ቶኮ ሹቁላ ላምዖ ፓቂንቲባኣያ፥ ጊንሣ ዓሌ ዻዑዋ ባኣዚ ሙይፖቴ፤ ዬያሮ ጋኣሎንታ ዋሪሌንታ ሾኦኖንታ ዬያጉዴ ባኮ ሙይፖቴ፤ ዬያጉዴ ባካ ዓሌ ዻዓያ ማዔታቴያ ቶኮ ሹቁላ ላምዖ ፓቂንቲባኣያ ማዔሢሮ ዒንሢኮ ቄፄኬ፤ 8 ጉዱንሢያ ሙይፖቴ፤ ዔያቶኮ ቶኮ ሹቁላ ላምዖ ፓቂንቴያ ማዔቴያ ዓሌ ዻዑዋያታሢሮ ቄፄ ማዓኔ፤ ዬያጉዴ ባኮ ሙይፃ ዓታዛ ሃይቄም ዑፆ ዑፆ ካኣሚፖቴ» ጌዔኔ።

9 «ሞላሢ ዜርፆይዳፓ ጋኣሲና ዒልዖይዳ ቁኡሪ ማላ ባኣዚ ዓኣ ባኮ ሙዓኒ ዒንሢ ዳንዳዓኔ፤ 10 ጋዓንቴ ዋኣሢዳ ናንጋያ ጋኣሲና ቁኡሪ ማላ ዒልዒባኣ ባካ ቢያ ሙይንቱዋሴ፤ ዬያጉዴ ባካ ዒንሢኮ ቄፄ ማዓንዳያ ኮይሳኔ» ጌዔኔ።

11 «ካፖይዳፓኣ ዓሽኪ ሙይንታኒ ኮይሳዞንሢ ሙዑዋቴ፤ 12-18 ዓሽኪ ሙይንታኒ ኮይሱዋ ካፓ ሃካፓ ሊካ ፓይዲንታዞንሢኬ፤ ዬያታ፦ ዚኢጊላ፥ ሃምፑራ፥ ኮኦኬ፥ ኪላንቄ፥ ዱማ ዱማ ዜኤጌ፥ ዱማ ዱማ ቁራኬ፥ ቱኡቴ፥ ሃንጋሃንጋ፥ ጫሬ ካፒ፥ ዱማ ዱማ ጋርማ ዜርሢ፥ ኩኩቴ፥ ሶኦሦ ሃምፑራ፥ ሙኡታሌ፥ ባዚ ካፒ፥ ቶኮ ኬኤላ ዎላ ካኣሜ ባዞ ካፓ፥ ጫውራ፥ ቦኦካ፥ ቆልሞና ሃንታ ቦኦሬ ካፓ፥ ማኣሎንታ ፓቃቴንታኬ» ጌዔኔ።

19 «ጋኣሲና ባራና ዻኮ ዻኮ ባካ ቢያ ዒንሢኮ ቄፄኬ፤ ዬያጉዴ ባካ ሙይንቱዋሴ፤ 20 ጋዓንቴ ዔያቶ ባኣካፓ ዱማና ሙይንታኒ ኮይሳ ባኮንሢ ዒንሢ ሙዓኒ ዳንዳዓኔ» ጌዔኔ።

21 «ሃይቄ ባኣዚኮ ዓሽኮ ሙይፖቴ፤ ዒንሢ ባኣካ ናንጋ፥ ሜሌ ዓጮ ዓሳ ዬያ ሙዓንዳጉዲ ዒንጉዋቴ፤ ሃንጎ ሜሌ ዓጮ ዓሶም ዓሽኮ ዒንሢ ሻንቻኒ ዳንዳዓኔ፤ ዒንሢ ጋዓንቴ ናንጊና ናንጋ ጎዳ ማዔ ዒንሢኮ ፆኦዛሢም ዱማዼ ዴሬኬ። ዋናናይ ዒንዶ ዲኢቆና ካሢፖቴ»* 14፡21 ዋናናይ ዒንዶ ዲኢቆና ካሢፖቴ ዬይ ካኣናኔ ዓሳ ማዻ ዳምቤኬ፤ ፆኦሲ ዬያ ማዾ ዒስራዔኤሌ ዓሳ ማዹዋጉዲ ላኣጌሢ ዓይጎሮታቴያ ዔርቱዋሴ። ጌዔኔ። 14፡21 ኬሲ. ማፃ 23፡19፤ 34፡26።

22 «ሌዓ ሌዓ ጎሽኪ ዒንሢ ዴንቃ ሃኣኮ ቢያሢዳፓ ታጶይዳፓ ፔቴ ኩቺ ዔኪ ዔኪ ዱማሲ ጌሡዋቴ፤ 23 ዬካፓ ናንጊና ናንጋ ጎዳ ማዔ ዒንሢኮ ፆኦዛሢ ዒዛ ዒንሢ ካኣሽካንዳጉዲ ዶኦሬ ቤዞ ዔኪ ዓኣዺ ናንጊና ናንጋ ጎዳ ቤርታ ቡኪንቲ ዒንሢኮ ሃኣካፓ፥ ዎይኖ ዑዦና ሪሚቶ ዛይቶናይዳፓ ታጳፓ ፔቴ ኩቺ ዔኪ ዒንሢ ዱማሴሢንታ ዒንሢ ዔኪ ሙኬ፥ ባኣቶና ዋኣሮናኮ ቤርታ ሾይንቴ ቆልሞ ናንጊና ናንጋ ጎዳ ማዔ ዒንሢኮ ፆኦዛሢ ጴዻ ቤዛ ሙዑዋቴ፤ 24 ጋዓንቴ ናንጊና ናንጋ ጎዳ ማዔ ዒንሢኮ ፆኦዛሢ ዒንሢ ዓንጄያ ማዔም ሃሣ ዒዛ ዒንሢ ካኣሽካንዳጉዲ ዒ ዶኦሬ ቤዛ ዒንሢኮ ሃኬ ማዒ ዒንሢ ዱማሲ ኬሴ ባኮ ዔኪ ዒኢካ ሄሊሳኒ ዳንዳዒንቲባኣቴ፥ 25 ታጳፓ ፔቴ ኩቺ ዒንሢ ዱማሲ ኬሴ ባኮ ሚኢሼም ሻንቺ ሚኢሾ ዔኪ ናንጊና ናንጋ ጎዳ ካኣሽኪንታ ቤዞ ዴንዱዋቴ። 26 ናንጊና ናንጋ ጎዳ ማዔ ዒንሢኮ ፆኦዛሢ ጴዻ ቤዛ ቡኪንቲ ዒንሢ ኮዔ ጎይፆ ባይ፥ ማራይ፥ ዎይኔ ዑሺንታ ሜሌ ካፄ ዑሺያ ሻንቂ ዒኢካ ሙይ ዑሽኩዋቴ፤ ዬያይዲ ዒንሢንታ ዒንሢኮ ማኣሮ ዓሶንታ ናንጊና ናንጋ ጎዳ ማዔ ዒንሢኮ ፆኦዛሢ ጴዻ ቤዛ ዎዛዹዋቴ» ጌዔኔ።

27 «ዒንሢ ዬያይዳ ዎዶና ዒንሢ ባኣካ ናንጋ፥ ሌዊ ዓሶ ዋሊፖቴ፤ ዓይጎሮ ጌዔቴ ዒንሢና ዎላ ዔያታ ጊሽቲ ዔኬ ዓጪ ባኣሢሮኬ። 28 ሃይሣሳ ሃይሣሳ ሌዖኮ ጋፒንፃ ዒንሢ ጎሽኬ ሃኣኮይዳፓ ቢያ ታጶይዳፓ ፔቴ ኩቺ ኬሲ ኬሲ ዒንሢኮ ካታማ ካታማ ቡኩሱዋቴ፤ 29 ዬያ ሃኣኮ ዒንሢ ባኣካ ናንጋያ፥ ዒንሢና ዎላ ዓጮ ጊሽቲ ዔኪባኣ ሌዊ ዓሶንታ ሜሌ ዓጫፓ ቤሲ ባይቂ ሙኬ ዓሶንታ ዜኤሮ ናኣቶንታ ዜኤሮይዶንሢንታ ሙዖንጎ፤ ዬያ ዒንሢ ማዼቴ ናንጊና ናንጋ ጎዳ ማዔ ዒንሢኮ ፆኦዛሢ ዒንሢ ማዻ ባኮና ቢያ ዒንሢ ዓንጃንዳኔ» ጌዔኔ። 14፡29 ሌዊ. ዓኬ 27፡30-33፤ ፓይ. ማፃ 18፡21።