1 ዖኦዚያኮ ናኣዚ ዒዮዓታሜፓ ሾይንቴ ዓካኣዜ ዪሁዳይዳ ካኣታዼ ዎዶና፥ ሶኦሪያ ዓጮ ካኣቲ ሬፂኔንታ ዒስራዔኤሌ ካኣቲ ሬማሊያ ናኣዚ ፓኣቁሄንታ ዖልዚሮ ኮዒ ዬሩሳላሜ ሙኬኔ፤ ጋዓንቴ ዔያታ ዬሩሳላሜ ባሻኒ ዳንዳዒባኣሴ። 7፡1 2ካኣቶ. ማ 16፡5፤ 2ፆኦሲ. ዓሃኬ 28፡5-6።

2 ሶሪያ ዓጫ ዒስራዔኤሌ ካኣቶና፥ ዎላ ፔቴ ማዒ ዖላኒ ጫኣቄሢ ዪሁዳ ካኣቲ ዋይዜ ዎዶና ዒዛንታ ዒዛኮ ዴሮንታ ዲቃቲ ዢባሬና ሂዒንታ ሚሢጉዲ ዓጊፄኔ።

3 ዬካፓ ናንጊና ናንጋ ጎዳ ዒሲያሴም ሂዚ ጌዔኔ፦ «ኔናንታ ናኣዚ ኔኤኮ ሼሪያሹቤንታ ካኣቲ ዓካኣዜና ካኣማኒ ማኣዓሢ ማስካ ዓሢኮ ጎዦ ባንሢ ዔኪ ዓኣዻ ጎይፆኮ ዓኣ ኬዶ ዛሎ ቦቆሎ ዋኣፆ ዻዋሢ ዎታ ካሮ ኬስኩዋቴ። 4 ዒዚ ታሣንዳጉዲ፤ ሃሣ ዒዚ ዒጊጩዋጉዲ፤ ታሚዳ ዔኤቲ ሚጪ ጩባ ዱርሚጉዲ ማዔ፥ ዻጎ ዻጋዻ ሬዚኔና ሶሪያ ዓጮ ዓሢ ሬማሊያ ናኣዚ ዛሎሮ ዲቃቲ ዒ ካራ ባይዙዋጉዲ ዒዛም ኬኤዜ። 5 ሶኦሪንታ ዔፕሬኤሜንታ ሬማሊያ ናኣዚ ባይዛኒ ሂዚ ጌዒ ዞርቴኔ፤ 6 ዪሁዳ ኑ ዖሊ ዓርቆም፥ ዓሶዋ ኑ ፓቂ ፓቂ ዣኣሊሲ ዓጬሎ ኑ ጊሽቲ ዎይሦም፤ ዬካፓ ፃቢዔኤሌ ናኣዚ ኑ ካኣታሣንዳኔ።»

7 ጋዓንቴ ናንጊና ናንጋ ጎዳ ሂዚ ጋዓኔ፦ «ዬይ ዔያቶኮ ዞርቲፃ ጎኔ ማዓዓኬ፤ ፔቴታዖ ማዺንቲንዱዋያኬ፤ 8 ዓይጎሮ ጌዔቴ፥ ሶሪያ ዓጮኮ ዑፆ ማዓዛ ዴማስቆ ማዓዛ፥ ዴማስቆኮ ዑፆ ማዓሢ ሬፂኔኬ፤ ጊንሣ ዒስራዔኤሌ ዓሶ ዛሎታቴ ላሂታሚ ዶንጎ ሌዔ ጋርካ ቤሲ ዔያቶኮ ባይቂ ካኣቶ ዓጪ ማዒ ዔርቲፃ ዓታንዳኔ። 9 ዬያጉዲ ሃሣ ዒስራዔኤሌኮ ዑፆ ማዓዛ ሳማሪያ፥ ሳማሪያኮ ዑፃ ማዒ ዎይሣንዳሢ ካኣቲ ፓቁሄኬ።

«ዒንሢኮ ዶዲ ጉሙርቂሢ ባኣያታቴ ዒንሢያ ዶዳዓኬ።»

10 ናንጊና ናንጋ ጎዳ ላሚ ዓካኣዜም ኬኤዛዖ፦ 11 «ሳዖኮ ሊካ ዴማፓ ማዔቴያ ጫሪንጮኮ ሌካ ዑፃፓ ፔቴ ማላታ ኔኤም ዒንጋንዳጉዲ ናንጊና ናንጋ ጎዳ ሺኢቄ» ጌዔኔ።

12 ዓካኣዜ ጋዓንቴ፦ «ማላታ ታኣም ዒንጌ ጌይ ታ ዖኦጫዓ፤ ፆኦሲ ዎይታቴያ ዛጋኒ ታ ኮዓዓኬ» ጌዔኔ።

13 ዬያሮ ዒሲያሴ ማሃዖ ሂዚ ጌዔኔ፦ «ዒንሢ ካኣቲ ዳውቴ ማኣሮ ዓሳ! ዋይዙዋቴ፤ ዓሶ ዒንሢኮ ሼናሲፃ ዻኬም ፆኦሲ ዒንሢ ዖዪሳኒ ኮዓ? 14 ዓካሪ ናንጊና ናንጋ ጎዳ ዒንሢም ማላታ ዒንጋንዳኔ፤ ኩሙሢ ዉዱሮናይ ጎጳዻንዳኔ፤ ዓቲንቄ ናይያ ዒዛ ሾዓንዳኔ፤ ዒዛኮ ሱንፆ ዒዛ ‹ዓማኑዔኤሌ›* 7፡14 ዓማኑዔኤሌ ጌይፃ፦ ዔብሬ ዓሶ ሙኡጮና «ፆኦሲ ኑኡና ዎላኬ» ጌይሢኬ። ጌዒ ጌሣንዳኔ፤ 7፡14 ማቲ. 1፡23። 15 ዒዚያ ፑርታ ባኣዚ ሃሺ ኮሺ ባኣዚ ዶኦራኒ ዳንዳዒሳ ዔራቶ ዴንቄ ዎዶና ዔኤሲና ዲኢቂና ሙዒ ዑሽካንዳኔ። 16 ዓካሪ ዬይ ናዓሢ ኮዦ ፑርቶይዳፓ ዱማሲ ዔራንዳሢኮ ቤርታ ኔኤኒ ዒጊጫ ዬንሢ ላምዖ ካኣቶንሢኮ ዓጫ ዓሲ ናንጉዋ ዳውሌ ማዓንዳኔ።

17 «ናንጊና ናንጋ ጎዳ ዒስራዔኤሌ ዓሳ ዪሁዳ ዓሶይዳፓ ዱማዼ ዎዳፓ ዓርቃዖ ዛጊንቲ ቤቂባኣ ሜቶ ዎዴ ኔኤና ኔ ዴሮናይዳ፥ ኔ ዓዶ ካኣቱሞ ማኣሮ ዓሶይዳ ዔኪ ሙካንዳኔ፤ ዬይያ ዓሶኦሬ ዓጮ ካኣቲ ኔ ጊዳ ዔኪ ዬዓንዳኔ ጌይሢኬ።

18 «ዬኖ ዎዳ ሄላዛ ሃኬ ዓኣ ዓባዬ ዎሮ ዓጫፓ ጊብፄ ዓሳ ሚርጌ ዉፃሌጉዲ፥ ዓሶኦሬ ዓሳ ሃሣ ፔ ዓጫፓ ማሢጉዲ ሻዺ ሙኮም ፆኦሲ ዔያቶ ዉቲ ዔኤላንዳኔ። 19 ዔያታ ዲርጊ ሙኪ ዳውሎ ዶኦጮና ላሎ ቆኦፖናይዳ፥ ዓንጊፆ ቶሾና ባኣታ ሄንቃ ማኣቶናይዳ ቁንዳንዳኔ።

20 «ዬና ዎዳ ሄላዛ ናንጊና ናንጋ ጎዳ ዔፒራፂሴ ዎሮኮ ሶኦ ሱካፓ ዔርጌ ዋኣዳ ጌይፃ ዓሶኦሬ ካኣቲ ዒንሢኮ ቶኦኮ ጋሞንታ ቡኡጮንታ ዑፆ ጋሞዋ ቢያ ሜኤዳንዳኔ።

21 «ዬኖ ዎዶና ፔቴ ዓሲ ፔቴ ማሮና ላምዖ ማራይና ቆላንዳኔ፤ 22 ዬያታ ሚርጌ ማኣፃ ዲኢቃፓ ዒዛም ኮይሳ ሙኡዚ ቢያ ዒ ዴንቃንዳኔ፤ ዬያሮ ዓጬሎይዳ ሚርጌ ዓሶኮ ሙይ ዑሽኮሢ ዔኤሲና ዲኢቂና ማዓንዳኔ።

23 «ዬኖ ዓቦና ሺያ ቢራ ኬሳንዳኔ ጌይ ማሎና ፔቴ ሺያ ዶኦሪንቴ ዎይኔ ቱኮና ጎዦይዳ ቢያ ጋውዲና ዓንጊሢና ባቃላንዳኔ። 24 ዓጬላ ጋውዲና ዓንጊሢና ኩሜያ ማዓንዳሢሮ ዴራ ዬያ ካዮ ጌላንዳሢ ቆኦሲና ሂኢሺያ ዓርቂኬ። 25 ሃያኮ ቤርታ ባላሻና ቦኦኪንቴም ሃኣካ ካፃ ጌሜራ ቢያ ጋውዲና ዓንጊሢና ባቃልሴም ዖኦኒያ ዒኢካ ዓኣዺንዱዋሴ፤ ጋዓንቴ ባይና ማራይና ሄንቃ ቤሲ ማዓንዳኔ።»