ጌኤዦ ማፃኣፖ ዒሲያሴ ማፃኣፖ 50

50

1 ናንጊና ናንጋ ጎዳ ሂዚ ጋዓኔ፦

ዒንሢኮ ዒንዶ ታ ዓንጄያ ማዒፆ ዔርዛ ዋርቃታ ዎካዳይ?

ዒንሢ ታኣኒ ዎያ ታኣም ሚኢሾ ታልዔሢም ሻንቼይ?

ዒንሢ ዒንሢኮ ጎሞሮ ሻንቺንቴኔ፤

ዒንሢ ዻቢንቶሮ ዒንሢኮ ዒንዳ ዓንጂንቴኔ።

2 «ታኣኒ ሙኬያና ዓይጎ ዓሲያ ባኣሢ ዓይጎሮዳይ?

ታኣኒ ዔኤሊንቴያና ዓይጎ ዓሲያ ዬሂባኣሢ ዓይጎሮዳይ?

ታኣኒ ዓውሳኒ ዳንዳዑዋዓዳ?

ዻቂሻኒ ዎልቄ ታኣኮ ባኣዓዳ?

ባዞ ታኣኒ ጎሪ ሚጪሳንዳኔ፤

ዎሮዋ ዓሲ ናንጉዋ ዳውሌ ታ ማሃንዳኔ፤

ዬካ ዓኣ ሞላሢያ ዋኣፃ ባኣሢሮ ሃይቂ ዎዓንዳኔ።

3 ጫሪንጮ ታኣኒ ዹሚሻንዳኔ፤

ሲዬ ዓፒላና ታ ዒዞ ጎኦቢ ዓኣቻንዳኔ።»

ፆኦሲ ዓይላሢኮ ዓይሢንቲፆ

4 ላቤዞንሢ ቃኣሎና ዶዲሺሢ ታ ዔራንዳጉዲ

ናንጊና ናንጋ ጎዳ ኮይሳ ባኣዚ ታ ጌስታንዳጉዲ

ዔራቶና ጌስታ ዒንዲርሲ ታኣም ዒንጌኔ፤

ጉቶ ጉቶ ጊንዓስካፓ ዒዚ ታና ጴቻኔ፤

ዔኤቢ ዋይዚ ዔሪሢዳ ዓኣ ዓሲሮጉዲ

ዋዮ ታኣኮ ዒዚ ቡላኔ።

5 ናንጊና ናንጋ ጎዳ ማሊ ጶቂሥሢ ታኣም ዒንጌኔ፤

ታኣኒያ ዋይዚ ዒፃያ ማዒ ዒዛይዳፓ ሃኪባኣሴ።

6 ዢራኣፖና ታና ጳርቃ ዓሶም ዙሎ

ቡኡጮ ታኣኮ ሜኤዳ ዓሶም ጋንጋሮ

ዓኣሢ ታኣኒ ዒንጌኔ፤

ጫሽኪ ታና ጩታ ዓሶይዳፓ

ዓኣፖ ካሮ ታኣኮ ታ ሺርሺባኣሴ።

7 ናንጊና ናንጋ ጎዳሢ ታና ማኣዳሢሮ ታ ዻውሲንቲንዱዋሴ፤

ታኣኒ ታና ዓዳ ሳቆ ሹቺጉዲ ዶዲሻንዳኔ፤

ታኣኒ ቦርሲንቲንዱዋሢያ ታ ዔራኔ።

8 ታኣም ዎጋንዳ ፆኦዛሢ ዑኬኬ፤

ዓካሪ ታኣና ሞኦታሢ ዖናዳይ?

ኑ ዎላ ሂንዳ ዎጎ ቤዞ ሺኢኮም።

9 ታና ማኣዳሢ ናንጊና ናንጋ ጎዳኬ፤

ዖ ታና ኔ ዻቤኔ ጋዓንዳይ?

ታና ሞኦታ ዓሳ ማኣዖጉዲ ጪንቃንዳኔ፤

ቢላኣ ዔያቶ ሙዓንዳኔ።

10 ዒንሢ ባኣካፓ ናንጊና ናንጋ ጎዳ ዒጊጫይ

ዒዛኮ ዓይላሢ ቃኣሎም ዓይሢንታሢ ዖናዳይ?

ፖዒባኣ ዹሚዳ ሃንታሢ

ናንጊና ናንጋ ጎዳ ጉሙርቆንጎ፤

ዒዚ ፔኤኮ ጉሙርቂፆ ፆኦዛሢዳ ማሆንጎ።

11 ሃሢ ጋዓንቴ ዒንሢ ታሚ ዔኤሤኔ፤

ቶኦካ ቶኦካ ዒንሢኮ ዔኤታ ኩሻ ዒንሢ ዓርቄኔ፤

ዓካሪ ዬያ ዒንሢኮ ታሞ ፖዖይዳ ዓኣዹዋቴ፤

ዒንሢ ዓይሤ ኩሾ ፖዓ ሃንቱዋቴ፤

ዒንሢ ታ ኩጫፓ ዔካንዳ ባካ ዬያኬ፤

ዬያ ሜቶና ዒንሢ ካራ ባይቃንዳኔ።

50:6 50፡6 ማቲ. 26፡67፤ ማር. 14፡65።

50:9 50፡9 ሮሜ 8፡33-34።