52
ፆኦሲ ዬሩሳላሜ ዓውሳንዳያ ማዒፆ
1 ፂዮኔ! ጴጬ! ዔቄ፤
ዎልቆ ኔኤኮ ዓዳ ማኣዖጉዲ ማይንቴ!
ዱማዼ ካታሜሌ ዬሩሳላሜ! ኔኤኮ ሚዛጶ ማኣዓሢ ማይንቴ፤
ሃካፓ ሴካ ዓቲንቶ ቤርቶ ቲቂንቲባኣዞንሢና
ዳምቦ ጎይፆና ጌኤሽኪባኣ ዓሳ ኔኤኮ ኬኤሎ ዲሮ ጋሮ ጌላዓኬ። 52፡1 ዮሃ. ፆፔዻ 21፡2፤27።
2 ዲዒንቲ ዔውቲ ዓኣዼ ዬሩሳላሜ!
ዔቂጋፓ ሲላሎ ኔኤኮ ሃርፔ፤
ካኣቱሞ ሻኣሎይዳ ዴዔ፤
ዒንሢ ፂዮኔፓ ዲዒንቲ ዔውቴ ዓሳ!
ዒንሢ ቱኡቴ ካኖ ቢራቶ ባቃናፓ ቡሉዋቴ።
3 ናንጊና ናንጋ ጎዳ ሂዚ ጋዓኔ፦ «ሚኢሼ ዔኩዋዖ ጉሪ ዒንሢ ሻንቺንቴኔ፤ ዒንሢ ማሂ ዔውታንዳሢያ ሚኢሼ ጪጉዎንቴኬ። 4 ታ ዴራ ሃያኮ ቤርታ ሙኬ ዓሲ ማዒ ናንጋኒ ጊብፄ ዓጮ ኬዴኔ፤ ዬካፓ ዓሶኦሬ ዓሳ ካራባኣ ጎይሢና ሄርቂ ዔያቶ ዎይሤኔ። 5 ታኣኮ ዴራ ዔኤቢ ጪጉዎዖ ዔውታንቴ ታ ዛጌኔ፤ ሃሢ ታኣኒ ዓይጎ ማዻንዳ ባኣዚ ዓኣይ? ዔያቶ ዎይሣ ዓሳ ቦሂ ዔያቶና ዓማላኔ፥ ሱንፆዋ ታኣኮ ዬና ዓሳ ጫሽኬ ጎይሣ ፔኤቃኔ። 52፡5 ሮሜ 2፡24።
6 ዬያሮ ታ ዴራ ታ ሱንፆ ዔራንዳኔ፤
ዬኖ ዓቦና ዬያ ቤርታዺ ኬኤዜሢ ታና ማዔሢ ጶቂሣንዳኔ፤
ሂዮ፤ ታኣኒ ታናኬ።»
7 ዹኮ ዑፆና ጌዒ ኮዦ ሃይሶ ዔኪ ሙካ ቶካ
ኮሹሞ ዛላኣ ኬኤዛዞንሢ
ዻቂንቶ ዛሎ ዒላቲ ኬኤዛዞንሢ
ፂዮኔማኣ፦ «ኔ ፆኦዛሢ ካኣታዼኔ!» ጋዓዞንሢ ዎዚ ሚዛጳይ! 52፡7 ናሆ. 1፡15፤ ሮሜ 10፡15፤ ዔፕ. 6፡15።
8 ካታሞ ኔኤኮ ካፓ ዓሳ ዑኡዞ ፔኤኮ ዼጊዲ ዒላታሢ ዋይዜ!
ፔቱሞና ዔያታ ዎዛዺ ዓይናዻኔ፤
ናንጊና ናንጋ ጎዳ ፂዮኔ ማዒ ሙካኣና ፔ ዓኣፖና ዔያታ ዛጋንዳኔ።
9 ናንጊና ናንጋ ጎዳ ፔኤኮ ዴሮ ዶዲሼኔ፤
ዬሩሳላሜያ ዒ ዓውሴኔ፤
ዬያሮ ዒንሢ ዬሩሳላሜኮ ዶዔ ቦካ!
ቡኪንቲ ፔቱሞና ዎዛዺ ዓይናዹዋቴ።
10 ናንጊና ናንጋ ጎዳ ዴሮ ቢያሢኮ ቤርታ
ዒ ዎልቄናታሢ ፔጋሲ ዔርዛንዳኔ፤
ዓጫ ጉቤ ዒዛኮ ዓውሲፆ ዛጋንዳኔ።
11 ዒንሢ ጌኤዦ ማኣሮ ሜሆ ኬዳ ዓሳ!
ባብሎኔይዳፓ ኬስኩዋቴ፥ ዱማዹዋቴ፤
ቄፄ ማዔ ባኮ ካኣሚፖቴ፤
ዒዞፓ ኬስኪ ጌኤሺ ማዑዋቴ። 52፡11 2ቆሮ. 6፡17።
12 ናንጊና ናንጋ ጎዳ ዒንሢኮ ቤርታ ማዒ ዔኪ ዒንሢ ዓኣዻንዳሢሮ
ዒስራዔኤሌ ፆኦዛሢ ጊንፆ ዛሎና ማዒ ዒንሢ ካፓሢሮ
ጳሺና ዒንሢ ኬስካዓኬ፤ ዓኣሺንቲያ ዒንሢ ዓኣዻዓኬ።
ሜታ ሄላንዳ ፆኦሲ ዓይላሢ
13 ናንጊና ናንጋ ጎዳ፦
«ዓካሪ ታ ዓይላሢ ማዻ ባኮ ዔሪ ማዻንዳኔ፤
ዼግ ዼጊ ጌዒ ቦንቺንታንዳኔ፤
ሱንሢ ኬስኪ ሚርጌና ዔርቴያ ማዓንዳኔ።
14 ሚርጌ ዓሲ ዒዛ ዛጊ ዲቃታንዳያ ሄላንዳኣና
ዒዛኮ ዓውካራ ዓሲ ቢያፓ ዱማዼያ ማዒ ዖኦፔኔ።
15 ቤርታ ዔያቶም ኬኤዚንቲባኣ ባኣዚ ዔያታ ዛጋንዳሢሮ
ዋይዚባኣ ባኣዚ ማሊ ጶቂሣንዳሢሮ
ሚርጌ ዴራ ታ ዓይላሢ ዛሎ ዲቃቲ ሄርሻንዳኔ፤
ካኣታኣ ጎዖንዶ ባኣዚ ባይዚ ዻንጋ ዓርቃንዳኔ» ጌዔኔ። 52፡15 ሮሜ 15፡21።