1 ዓፒሎና ማዢንቴ፥ ፆኦሲ ዴሮና ካኣማ ማኣሮይዳፓ ናንጊና ናንጋ ጎዳ ሙሴ ዔኤላዖ ሂዚ ጌይ ዓይሤኔ፦ 2 ዒስራዔኤሌ ዴራ ታኣም ዒንጋ ባኮ ዒንጋ ዎዶና ዔያታ ካፓኒ ኮይሳ ዎጋ ያዺኬ፦

ፔቴ ፔቴ ዓሳ ዒንጎ ባኮ ታኣም ዒንጋ ዎዶና ፔኤኮ ባኣቶፓ፥ ማራቶፓ፥ ዋኣሮፓ ማዔቴያ ዒንጎንጎ፤ 3 ዬይ ዓሢ ባኣቶ ባኣካፓ ፔቴ ሚቺ ዒንጎ ዒንጊሢ ዒንጋኒ ኮዔቴ ዔኤቢ ቦሂሳ ባኣዚባኣ፥ ዚያ ጌማይ ዶኦሪ ዔኪ ሙኮንጎ፤ ዬይያ፦ ናንጊና ናንጋ ጎዳ ናሽኪ ዔካ፥ ሚቺ ዒንጎ ዒንጊሢ ማዓንዳጉዲ ዓፒሎና ማዢንቴ፥ ፆኦሲ ዴሮና ካኣማ ማኣሮኮ ጌሎ ካሮ ዛሎና ዔኪ ሙኪ ዔቂሶንጎ። 4 ዬካፓ ዬይ ዓሢ ሚቺ ዒንጋኒ ዔኪ ሙኬ ባኮኮ ቶኦካ ፔ ኩጮ ጌሦንጎ፤ ዬይ ዒዛኮ ጎሞ ጌኤሻኒ ዳንዳዓ ሚቺ ዒንጎ ዒንጊሢ ዒዛም ማዓንዳኔ። 5 ዬይ ዓሢ ጌሜ ዒኢካ ሹኮንጎ፤ ዬካፓ ዓኣሮኔ ፃጳፓ ማዔ፥ ቄኤሳ ሱጉፆ ናንጊና ናንጋ ጎዳ ቤርቶ ዔኪ ሙካዖ ዓፒሎና ማዢንቴ፥ ፆኦሲ ዴሮና ካኣማ ማኣሮ ጌሎ ካራ ዓኣ፥ ሚቺ ዒንጎ ባኮኮ ጎኦቦ ዛሎ ቢያ ፑጮንጎ። 6 ዬካፓ ዬይ ዓሢ ዒልዖ ሹኪ ዱማሲ፥ ዓሽኮዋ ሜኤሎና ሜኤሎና ቲቆንጎ፤ 7 ቄኤሳሢ፥ ዓኣሮኔ ፃጶ ማዔ ቄኤሳ ሚቺ ዒንጎ ቤዞይዳ ሃንፂሎ ጊኢጊሺ ታሚ ዔኤሦንጎ። 8 ዬያይዴስካፓ ቲቂንቴ ዓሽኮኮ ሜኤሎንታ ቶኦኮንታ፥ ሃሣ ማሎዋ ዔኤታ ታሞ ዑፃ ጌሦንጎ። 9 ዬይ ዓሢ ጎጶ ባኮና ጊንፆ ቶኮና ዔኪ ዋኣሢና ማስካዛ ዬኖ ዓቦ ማዻ ቄኤሳሢ ፆኦሲም ዒንጎ ቤዞይዳ ጉቤና ሚቾንጎ፤ ዬያይዲ ሚቺ ዒንጎ ባኮኮ ሳዋ ናንጊና ናንጋ ጎዳ ዎዛሳያ ማዓኔ።

10 ሚቺ ዒንጎ ባካ ማራይ፥ ሃሣ ዋኣሪ ማዔቴ፦ ዔኤቢ ቦሂሳ ባኣዚባኣ፥ ዓዴ ማራናይ ሃንጎ ኮላይናይ ማዖንጎ። 11 ዬያ ዒንጎ ባኮ ዒንጎ ቤዞኮ ኬዶ ዛላ ፆኦሲ ቤርታ ሹኮንጎ፤ ዬካፓ ቄኤሳ ሱጉፆ ዔኪ ሚቺ ዒንጎ ቤዞኮ ጎኦቦ ዛሎ ቢያ ፑጮንጎ። 12 ዬይ ዒንጋ ዓሢ ሹኪንቴ ባኮ ሜኤሎና ሜኤሎና ቲቄሢኮ ጊንፃ ዬኖ ዓቦ ማዻ ቄኤሳሢ ሜኤሎ ዓሽኮንታ ቶኦኮንታ ማሎንታ ቢያ ፆኦሲም ዒንጎ ቤዞይዳ ጊኢጊሺንቲ ዔኤታ ታሞ ዑፆይዳ ጌሦንጎ፤ 13 ዬካፓ ዓሢ ጎጶ ባኮንታ ጊንፆ ቶኮንታ ዋኣሢና ማስካዛ፥ ቄኤሳሢ ዬያ ዒንጎ ባኮ ቢያ ፆኦሲም ሚቺ ዒንጎ ባኣዚ ማሂ ሺኢሺ ሚቺ ዒንጎ ቤዞይዳ ሚቾንጎ፤ ዬያይዲ ታሚና ሚቺ ዒንጎ ባኮኮ ሳዋ ናንጊና ናንጋ ጎዳ ዎዛሳያ ማዓኔ።

14 ዒንጋ ዓሢ ሚቺ ዒንጎ ባኮ ካፖ ዜርፃፓ ዒንጋኒ ኮዔቴ ዶኦሌ ናይ ማዒባኣቴ ኪሬ ናይ ዔኪ ሺኢሻኒ ዳንዳዓኔ። 15 ቄኤሳሢ ዬያ ካፖ ዔኪ ሚቺ ዒንጎ ቤዞ ሺኢሼስካፓ ባቃኖ ዺዺ ዱኡዚ፥ ሚቺ ዒንጎ ቤዛ ዔኤታ ታሞይዳ ዓጊ ሚቾንጎ፤ ሱጉፃኣ ሚቺ ዒንጎ ቤዞኮ ጎኦቦ ዛላ ፆዾንጎ። 16 ጎጶ ባኮና ጋፓኖና ዱማሲ፥ ፆኦሲም ዒንጎ ባኮ ዒንጎ ቤዞኮ ዓባ ኬስካ ዛሎና ቢዲንፆ ላኣሎ ቤዞይዳ ኬኤሮንጎ። 17 ዬካፓ ጋኣዞንሢ ዓርቂ፥ ሄኮ ሾኦሎንጎ፤ ጋዓንቴ ሾኦሊ ዱማሲ ኬኬሶፓ። ቄኤሳሢ ሚቺ ዒንጎ ቤዞይዳ ዓኣ፥ ታማኣ ዓጊ ቢያ ሚቾንጎ፤ ዬያይዲ ሚቺ ዒንጎ ባኮኮ ሳውማ ናንጊና ናንጋ ጎዳ ዎዛሳያ ማዓኔ።