19
Pampudian kapataloan yao suruga
1 Mangkai too, urrangngimo' susi kamaranna tau buda sipetamba-tambaan illaan suruga nakua:
“Haleluya! Dipakasalle Puang Allata'alla Dewatanta!
Kabuttuanna kasalamasan,
anna To randan matande anna ma'kuasa.
2 Annu malolo urratta' bisara anna sipato' tongan angganna perambinna.
Umpabambannimi sangka' inde passundala' kaleleanne,
to ungkadakei lino napobua' pa'palakona.
Nabala'imi annu mangka umpatei sabua'na Puang Allata'alla.”
3 Nakua pole omo inde kamara kurangngie:
“Haleluya! Dipakasalle Puang Allata'alla Dewatanta!
Tae' dengan la kattu rambunna api ussumpun inde kota kamaie lambi' sae lako-lakona.”
4 Malimuntu' asammi inde dua pulo appa' perepi' anna appa' penatuoe umpenombai Puang Allata'alla to ummokko' yao tongkonan layuk. Anna ma'kada nakua:
“Amin! Haleluya! Dipakasalle Puang Allata'alla Dewatanta!”
5 Dirangngimi kamara yao mai tongkonan layuk nakua:
“O anggammua' sabua'na Puang Allata'alla, to mengkarea' langngan Puang Allata'alla, susi to kamai tenni to barinni',
pakasallekoa' Puang Allata'alla Dewatanta!”
6 Mangkai too, kurangngi omi susi tau buda mongngo', ummurrun susi sarambu kamai anna magaruru susi guntu', nakua:
“Haleluya! Dipakasalle Puang Allata'alla Dewatanta To randan kuasa,
annu ma'parentami temo.
7 Anta ma'dore'-dore'moa' sola ma'sende-sende
umpomatande Puang Allata'alla!
Annu nalambi'mi allo pa'sombaanna Anak Domba
anna tokamo baine la nasibalian.
8 Mangkami dibeen pakean mapatting
mabusa pakkillo'-killo' inde bainee la napake.”
(Pakean mapatting mabusa pakkillo'-killo' iamo panggauan mapianna petauanna Puang Allata'alla).
9 Nakuammo' inde malaeka'e: “Uki'i kumua: ‘Kerongko' ia angganna to ditambai lao ullomba pa'sombaanna Anak Domba!’ ” Nakua pole omo: “Inde battakadae tonganna, buttu yao mai Puang Allata'alla.”
10 Malimuntu'mo' dio tingngayona inde malaeka' la umpenombaie sapo tappa nakuanna': “Dau! Dau penombaina'. Annu sabua'nana' duka' Puang Allata'alla susi siamiki' anna angganna sa'do'dorammu to matutu ummanda'i kasa'bian napalanda' Puang Yesus. Puang Allata'allaria la mupenombai! Annu tula'na Puang Yesus umpa'pesa'bian Puang Allata'alla iamo to'na tula'na angganna nabi.”
To ussakei darang mabusa
11 Kuitai titungka'mi suruga, lemba'mi mesa darang mabusa nasakei disanga To Matutu anna To Dirannuan. Malolo urratta' bisara anna angga katonganan nangei ma'bundu'. 12 Susi api ma'lana-lana matanna, anna buda songko' tomaraya yao ulunna. Dengan sanga tiuki' dio kalena, sapo angga ia ummissananni. 13 Mangka dioton tama rara bayu rui'na. Anna digente': “Battakada Dewata”. 14 Windimi angganna tantara yao suruga unturu'i napissanni ma'darang mabusa anna ma'pakean mapatting mabusa pakkillo'-killo'. 15 Tilo'do'mi pa'dang mataran illaan mai sadangna la napake untalo angganna ma'rupa tau, anna la ma'parenta umpake tekken bassi. La umparra anggur illaan pallullusan anggur iamo ara' kamainna Puang Allata'alla to randan kuasa. 16 Dengan sanga tiuki' dio bayu rui'na sola dio apanna, nakua: “Tomarayanna angganna tomaraya anna Puangna angganna puang.”
To ma'darang mabusa untalo angganna ewalinna
17 Angku mane ummita mesa malaeka' ke'de' illaan mata allo, anna metamba lako angganna dassi mentia' yao loa, nakua: “Tirempummokoa' mai ullomba sara' kamainna Puang Allata'alla. 18 Maikoa' ummande balena angganna tomaraya, balena ponggawana tantara, balena pa'barani, balena darang sola to ussakeii, balena angganna ma'rupa tau susi to kamai tenni to barinni', susi sabua' tenni to tangngia sabua'.”
19 Kuitami inde olo'-olo'e sola angganna tomaraya illaan lino anna tantarana ma'rempun la sirari inde to ussakei darang mabusae sola angganna tantarana. 20 Tappa dialamia inde olo'-olo' sola nabinna,* nabinna: Battu' dikua olo'-olo' kaduanna kendek. Bacai 16:13. anna dipa'tibean tuo tama mesa angngenan kalua' ponno api napopa'lana-lana belerang. Inde nabinnae iamo to mangka umpogau' tanda memangnga-mangnga umpake kakuasaanna inde olo'-olo'e, napolalan umpapusa ma'rupa tau, to umpake tandana inde olo'-olo'e anna to umpenombaii pa'pasusianna. 21 Anna angganna tomaraya sola tantarana napatei iato pa'dang tilo'do' illalan mai sadangna to ussakei darang mabusao. Sasaeammi dassi ummande balena inde to dipateie sadea'na.