18
Pjot pi Babilon
1 Wi uko waŋ uţëpuŋ, dwin uwanjuŧ uloŋ kë uwalnaana baţi. Uwo na mnhina mnweek, kë bjeehi bi wa başë jeehan mboş. 2 Udo pdiim pweek aji :
« *Babilon ubeeka uweek ujoti!
Ujoti! Ujoti!
Ukak ufëţ wi ŋnŧaayi,
dko di ŋnŧaayi bŧi ŋawooŋ
na di ŋkaŧ ŋţop ŋwuţaan bŧi.
3 Ŋŧaak ŋi mboş bŧi ŋadaan poot pi da,
kë pdaan poot puŋ paşë wo pţopan uleef na pekadu di piinţ.
Başih biki mboş bŧi bawinar na da,
kë bawaap biki mboş bayokna ţi pŋal iko yi umundu pi bañaaŋ biki da. »
4 Wal mënţ dkak aŧiink pdiim ploŋ panwoonuŋ baţi, paji : « An pntaali pi naan, napënan ţi ubeeka wuŋ, nawutna kanaakiir ţi pjuban pi baka, iţaafa inkmbiiŋ ţi baka iwutna kajotnan. 5 Buţaan di baka dajunkan adoo ban baţi, Naşibaţi aleş iko inwooŋ iinwo iŧool bŧi yi badoluŋ. 6 Nadoon biki Babilon uko wi badoluŋ, nadoon nado do baka ŋyaaş ŋtëb iko yi badoluŋ, naţuun ţi pnkalame pi bajaaŋ baţu poot, panhaayuŋ apel pi baka ŋyaaş ŋtëb. 7 Naţuun da mnhaj na pwuţan panliŋuŋ na mndëm na pyok pi dabiiŋ aka, daji ţi uşal wi da : “Dţo ji naşih ñaaţ, mënkwo nayoţ nin, mënkwo na puum nin unuur uloŋ.” 8 Uko waŋ ukaaŋ kë ţi unuur uloolan ţañ, Naşibaţi Ajugun anwooŋ na mnhina akkob da na iţaafa inwooŋ i pjotna da : pkeţ, muum, ubon na uyik. »
Ŋwooni ŋi bawooniiruŋ Babilon
9 Pdiim pakak aji : « Wal wi başih biki mboş bambiiŋ awo ţi pjuban pi piinţ na Babilon abot awo na da ţi pŋal iko inuura maakan yi da bakwinuŋ udu wi uyik wi da, bawooni kabot kaţëga. 10 Baluŋ kanaţ kalow kaţi mnhaj muŋ kaşë kaji :
“Pwuţan oy! Pwuţan oy!
Ţi iwi, *Babilon, ubeeka uweek,
ubeeka unwooŋ na mnhina,
ikobana ţi uwoori uloolan ţañ!”
11 « Bawaap biki mboş bawooni abot aţëga ji bawo na puum, ţiki nin aloŋ aankak anug iko yi bajijuŋ abi bwaap. 12 Iko mënţ iwo uwuuru na unŧaam, mnko mwij wijan mantamuŋ preeş na mnko mnuura, iŧenda inuura, ijeenkal, idaaŋ iwoj wojaan na iloŋ kak ; mmul mnuura mantamuŋ preeş na iko yi bafejuŋ na mmul mënţ, iko yi babomanaanuŋ iñiiŋ yi ŋloŋ, yi ifeeru inuura, këme mnlaak, 13 ukëra ulil pţëkën uŧum umpaţuŋ kalilare na itoh ilil pţëkëñ na mnkulan, ubiñu na ukëra, pşon na uloort, ŋngit na ŋkaneel, ŋmpëlënŧ na ŋkaaru ŋi ŋmpëlënŧ ŋakpuluŋ ; badoo ji bawaap bañaaŋ bajën.
14 « Baluŋ kaji kak na Babilon : “Iko bŧi yi uhaaşu uŋaluŋ iinkak awin ya, ilowu! Iko inwooŋ yi mndëm mi nu na inuura maakan, iinkak awin ya nin.” 15 Bawaap bambiiŋ ayokna ţi ubeeka mënţ banaţ kalow kaţi mnhaj mi ubeeka mamob baka. Bado kawooni, kaţëga ţi ubeeka mënţ 16 kaji :
“Pwuţan oy! Pwuţan oy!
Ubeeka uweek
unwohariiŋ iŧenda inuura itam preeş,
ijeenkal, iwoj wojan,
unţuuŋ uwuuru na mnko mnuura mntam preeş,
17 ţi uwoori uloolan ţañ kë pyok mënţ bŧi paşë ŧoka.”
« Kë bajug ŋlanŧu na banjaaŋ baţoŋ ŋa na bañaaŋ bŧi banjaaŋ balemp ţi bdëk başë naţ alow. 18 Wi bawinuŋ udu wi uyik aşë ji : “Ubeeka unliŋi na wi ubi woha i?” 19 Baţu mboş ţi ikow yi baka aşë ŋajar awooni ji banwooŋ na puum aji :
“Pwuţan oy! Pwuţan oy!
Ubeeka uweek
wi bankaaŋ ŋlanŧu ţi bdëk bŧi
bayoknuŋ ţi pyok pi wa,
ţi uwoori uloolan ţañ kë uşë ŧoka!
20 Baţi, banjañan na baţupar Naşibaţi na an biki nul bŧi
nalilaan ţi pjot pi wa,
Naşibaţi akob wa ţi uko wi udolanaŋ.” »
21 Wal mënţ, kë uwanjuŧ unwooŋ na mnhina mnweek uşë jej plaak pweek maakan afël du bdëk aşë ji :
« Na mnhina mnŧënţ mi,
mi mi Babilon ubeeka uweek ukfëlaniiŋ,
baankak awin wa nin.
22 Nin iyeeh yi banjaaŋ bakob inŧuni na bayeeh
iinkak aŧiinkana.
Nin baŧeen na balul
baankak aŧiinkana.
Nin pŋaat pi baţak paankak aŧiinkana ;
nin phuunţ paankak aŧiinkana ţi btëk.
23 Nin unkaniya uunkak aŧeh ;
nin baankak aŧiink pdiim pi naniim na pi naniima.
Bawaap biki nu babiiŋ awo bañaaŋ baweek biki mboş.
Dayaamu di nu daneeman ŋŧaak bŧi.
24 Pñaak pi baţupar Naşibaţi, banwooŋ biki nul,
bañaaŋ bŧi banfiŋaniiŋ ţi mboş, pawo ţi iñen yi nu. »