1 Ahad od poko-ooseng a to nokod-osso-osson kinohiyan ka-ay to ampow't ingod, ahad iddos kinohiyan to mgo ponolihan, piru ko waa kodginawa ku to duma, waa en koru-anon. Oyyos od poko-iling a ra en tod poko-ulingoo no ahung o maadting no kulintang no awang don toptapa. 2 Ahad duwon kogahan ku nod ponudtuu taddot id poposaddoo to Monama koddi, ahad nosorollan ku kos langun no kotuihan woy iddos waa id posaddoo to Monama riyot duma, woy ahad oray'n mosalig kos kopomakoy ku no od pokopa-alin to buvungan, piru ko waa kodginawa ku to duma, waa en koru-anon ku. 3 Ahad id boggoy ku pa kos langun no korotuwan ku riyot worowora, woy ahad id boggoy ku kos koddin lawa amoy'd loowon, piru ko waa kodginawa ku to duma, waa en koru-anon to kodpuung ku tadda.

4 Iddos mohingginawon minuvu, mowwet kos posinsya woy eeruwon. Konna sikandin od kosina, konnod pobporoong woy konnod poratasdatas. 5 Konna mandad morat kos botasan din woy konnod pomohos to kandin nid kopi-i. Konna monit kos uu woy konnod tota-aw to morat no ginawa. 6 Iddos mohingginawon minuvu, konnod kahaa to morat no pinuungan, ko konna, iyon din id kahaa-i iddos motallong no pinuungan. 7 Dos mohingginawon minuvu, moti-isti-is to langun no kosupittan. Dii sikandin od koworan to kodsalig, woy dii mandad od koworan to ko-immanan diyot mgo duma rin, woy konnod ko-obbod diyot ahad ondan nod kotomanan.

8 Iddos kogahan to kodponudtuu taddot id poposaddoo to Monama, woy dos kogahan to kod-ooseng to nokod-osso-osson kinohiyan no waa nopohinonawwi to minuvu, duwon od tomanan. Iling dad en mandad tadda iddos sinorollan, duwon od tomanan. Piru iddos kodginawa, waa en od tomanan. 9 Su iddos sinorollan ta ko-ungkay, duwon pe-en kulang. Woy dos kodponudtuu ta taddot id poposaddoo to Monama keta, duwon pe-en mandad kulang. 10 Piru kod inguma ron kos allow no od kotuman don kos langun, od kowora ron iddos langun no kogahan no duwon kulang.

11 Dangan to anak a pa, iddos kodpopoomdom ku, iling to anak woy dos kod-ooseng ku, iling mandad to anak, woy dos kodpomuhawang ku, iling en to anak. Piru ko-ungkay to buyyag ad, id tonanan kud iddos botasan to ko-onakoy ku. 12 Ungketen dad en mandad keta nod pompomakoy, ko-ungkay iddos sinorollan ta moka-atag to Monama, duwon pe-en kulang. Oyyos noko-iling idda to kod-ontong diyot oungan no dii oray'd kokilaa. Piru init morin allow, matamata tad en tod kita kandin. Ko-ungkay, kulang pe-en kos sinorollan ku to Monama, piru init morin allow, od kosodsorollan kud en sikandin, iling taddot sinorollan din koddi.

13 Na, duwon inis otollu no od ponayun taman to waad tomanon. Idda en so kopomakoy, dos ko-immanan taddot id tandu to Monama woy dos kodginawa. Piru iddos lampas to langun ka-ay't otollu, idda en so kodginawa.