2
Dos Pomandu ni Pablo to Kodti-is to Kosupittan
1 Na sikkow, Timoteo no anak ku riyot kopomakoy, ponokkalow kos ginawa ru ukit to tavang ni Disas Krays. 2 Iddos nonaw no norinog du no id nonaw ku riyot mo-uraan minuvu, nonaw ru mandad idda riyot od kosolihan no mgo minuvu amoy id pokononaw ran mandad diyon to duma. 3 Lonug ka riyot kodti-is to kosupittan timbang od kosolihan no sundau ni Disas Krays. 4 Waa sundau nod po-ikot taddot pinuungan to konna mgo sundau. Su iyon dontulon din no od kahaa kos ponguu rin. 5 Na iling dad en mandad taddot minuvu nod lonug to lumba to kodlungkossu, waa en od kotanggap din no ganti otik dii rin od ikulon kos mgo po-ukit to kodlumba. 6 Ungketen dad en mandad iddos minuvu no id oiluggat to kodkamot, ollog en no sikandin kos unna nod tanggap to taad taddot bunga to pinomuwa rin. 7 Poomdommow inis mgo osengan ku, su od tovangan ka tod Longaggon amoy'd koovottan du ini langun.
8 Woy riyot kosupittan, poomdommow no si Disas Krays, novadnow pomon diyot kopotayan woy lubbad ni Harin David. Ini en kos Moppiyon Dinoggan no id ponudtuu ku. 9 Pomon to kodponudtuu ku ka-ay'n Moppiyon Dinoggan, id ti-is a to kosupittan dinit prisuwan woy id baku a to kodina iling to sokkad no kriminal. Piru ahad id baku a, iddos kahit Monama, konna en od kovaku. 10 De-en od ti-ison ku kos langun no kosupittan atag to mgo minuvu no id aam to Monama, su amoy od kotobbus sikandan ukit to kopomakoy ran ki Disas Krays, woy od kolonug dan to waad tomanon no se-aa to kotuusan din. 11 Bonnaa en iddos osengan no mid ungketen to,
“Otik id lonug ki to kopotayan ni Disas Krays,
od kolonug ki mandad duma kandin diyot lammin umuu rin.* Od kovasa ini riyot Roma 6:1-11; 2 Corinto 5:17; 7:4-6; Colosas 2:12, 20; 3:13.
12 Otid ponayun ki nod ti-is to kosupittan,
od hari ki mandad kangkan duma kandin.
Piru kod ikahi ki no waa ki id kilaa kandin,
od ikohiyon din mandad kangkan no waa sikandin id kilaa keta.
13 Otik dii ki od kosolihan, ponayun en sikandin nod kosolihan,
oyyos od tumanon din en ko ondan kos id oseng din.”
Dos Moppiyon Uripon to Monama
14 Na, posampot du ruwot od pompomakoy iddos mgo osengan ku. Woy loglohottiyu sikandan diyot isowwan to Monama, no konna ran od po-opuloy moka-atag to kohulugan to mgo kahi, su iddon od kopuungan, waa koru-anon woy od pokodora-at da en to kopomakoy taddot od pominog. 15 Noonokkaliyu tod tuman iddos id kopi-it Monama amoy'd kahaa sikandin kikow. Na otik iling tadda kos od puungan du, waa id ko-ilow ru, su ollog man iddos kodpaabbotlabbot du taddot bonnaan nonaw. 16 Yo kod iling-iling taddot mgo osengan no waa koru-anon no konna id kahaa-i to Monama, su iddos od puung to iling tadda, od pokoriyu pe-en to Monama. 17 Iddos nonaw ran, noko-iling to moka-arat-arat no bohok no kanser no enot-enot od kotkot to tivuk no lawa. Dos oruwa taddot od ponnonaw to ungketen, si Himeneo woy si Fileto. 18 Id suwoy ran taddot bonnaan nonaw, oyyos tomman dan no id lihad don kos kodbadnow, de-en worad kun od ingumon kodbadnow taddot id poomatoy ron. Na iddon nonaw, nokodora-at to kopomakoy to duma. 19 Piru ahad ungketen, dii en od kovovaawan iddos bonnaan nonaw to Monama iling to mosalig no batu no po-unsaran no diid kowaong. Oyyos duwon no-ikahi riyot Nosulat no Kahit Monama no mid ungketen to,
“Nokilaa to Monama ko ondoy kos kandin no mgo minuvu.”* Od kovasa ini riyot Numeros 16:5.
Duwon pe-en nokosulat dutun no,
“Iddos ahad ondoy nod ikahi, no minuvu sikandan to Monama, ko-ilangan nod tanan to langun no morat no pinuungan.”
20 Na Timoteo, duwon ponunggelengan ku. Diyot dakkoon baoy to minuvu nod koruwonnan, duwon mgo tootawwan no binovallan pomot buawan woy plata no od gomiton atag to kolivuungan no dakkoo kos koru-anon. Duwon mandad mgo tootawwan no binovallan pomot kayu woy livuta no iling to kuron atag to ahad ondan nod kohomitan. 21 Na siketa nod pompomakoy, od poko-iling ki en mandad taddot mgo binovallan no dakkoo kos koru-anon. Otid tonanan ta kos langun no morat no pinuungan, dakkoo kos koru-anon ta riyot kod-ontong to Monama, oyyos od kahamit ki atag kandin woy nopanoy kid nod puung to ahad ondan no moppiya.
22 Poriyu ka taddot nooyami no morat no ingowollon to mgo sudduwan poron. Iyon du moho noonokkali iddos motallong, woy ohottow kos kopomakoy ru. Noonokkaliyu mandad iddos kodpokita to ginawa riyot duma, woy oubpa ka no moppiya kos koroniyan du riyot mgo minuvu no iddos kodnganoy ran to Monama, id pomon diyot molinis no pusung. 23 Poriyu ka mandad taddot mgo ko-ongollan woy waa koru-anon no mgo kodpo-opuloy. Nokosaddoo kad man no od undag da en idda to ukahan. 24 Dos uripon tod Longaggon, ko-ilangan no konna boopulon, ko konna, moppiya sikandin diyot langun no minuvu. Ko-ilangan mandad nod kotuig sikandin od nonaw woy mowwet kos posinsya. 25 Ko-ilangan no od oupiyannan din to kodpomandu duma to mosunay no pusung iddos od supak to bonnaan nonaw. Su saddook od boggayan sikandan to Monama to timpu no od sondit to kodsupak dan amoy'd pokohimata ran taddot bonnaan nonaw. 26 Na od kopokes don kos koovottan dan, woy od pokolegguang sikandan pomon diyot lettag ni Moivuyan nopongnga ran nokosahad to kodpuung tid kopi-i rin.