Dos Sulat ni Pablo Atag to mgo Toho
EFESO
Unna nod Bosan
Inis bonuwa to Efeso, sakup to prubinsya to Asia no no-iraom to guberno to Roma. Iddot unnon timpu, mo-uraan minuvu no id oubpa riyot Efeso, woy oray'n novantug inin lugaa pomon to od koruwonnan sikandan woy pomon taddot konna bonnaan monama ran no si Diana.
Na si Pablo, mid oubpa taddon bonuwa daom to mgo otollun lahun amoy'd ponudtuu to Moppiyon Dinoggan moka-atag ki Disas Krays (Pinuungan 19:1-41; 20:17-38). Iddot timpu nid sulat ni Pablo ini, noprisu sikandin diyot Roma pomon da en to kodponudtuu rin moka-atag tadda.
Dos dakkoon dontulon no id sulat din ini, su amoy od paabbotlabbot moka-atag to puhawang to Monama “no od podsokaddon iddos diyot datas to langit woy dos ka-ay to ampow't ingod amoy id po-iraom to kodponguu ni Disas Krays” (1:10). De-en id nonaw mandad ni Pablo riyon tod pompomakoy, no ko-ilangan nod loppa iddos kodbovotasan dan taddot kod-aam to Monama kandan (4:1).
Mo-uraa kos ponunggelengan no id gamit ni Pablo amoy id pokita iddos kodposokaddoy tod pompomakoy no nosokkad diyot ki Disas Krays. Dos od pompomakoy, noko-iling to sokkad no lawa woy si Disas Krays kos timbang uu tadda (4:16). Id ikahi mandad si Pablo no iddos od pompomakoy, noko-iling to baoy (2:20-21) woy si Disas Krays kos timbang batu no po-unsaran tadda. Woy id ponunggelengan mandad ni Pablo iddos koroniyan to toosawa riyot ki Disas Krays woy riyon tod pompomakoy (5:32).
Duwon mandad od kopohinonawwan ta ka-ay moka-atag to ollog no kodbovotasan to mgo anak, amoy woy inoy, mgo uripon woy dos kandan no amu (6:1-9). Diyon to kotompusan ka-ay'n sulat, duwon mandad od kopohinonawwan ta moka-atag taddot id boggoy to Monama timbang goggot no pongallang to mgo kod-aakaa ni Moivuyan (6:10-20).
Dos mgo Nokota-aw:
Kodpokilaa (1:1-2)
Dos koroniyan tod pompomakoy riyot ki Disas Krays (1:3 taman to 3:21)
Dos kodposokaddoy woy ollog nod kodbovotasan tod pompomakoy (4:1 taman to 6:9)
Dos timbang goggot woy kaasag no id boggoy to Monama (6:10-20)
Kotompusan no mgo pomandu (6:21-24)
1
Kodpokilaa
1 Siyak si Pablo, novovallan a no apostoles ni Disas Krays ukit to id kopi-it Monama. Id sulat a koniyu no mgo minuvu to Monama ruwot bonuwa to Efeso no od pompomakoy no nosokkad diyot ki Disas Krays.
2 Muopa nod kotanggap dow kos kopiyannoy woy kosunayan no id pomon to Monamon Amoy ta woy tod Longaggon no si Disas Krays.
Dos Kopiyannan no id Pomon to Ispiritu to Monama
3 Od doongon ta iddos Monama no Amoy woy Monama mandad tod Longaggon ta no si Disas Krays, oyyos id boggoy rin keta kos langun no ispirituhanun no kopiyannan no id pomon diyot datas to langit. Id puungan ini to Monama pomon to nosokkad kid diyot ki Disas Krays. 4 To waa pa novovalli inis ingod, id aam kid tapoy to Monama amoy'd kosokkad kid diyot ki Disas Krays. Id puungan din ini, su amoy waa id pokosawoy keta woy molinis ki riyot kod-ontong to Monama. 5 Pomon to ginawa to Monama keta, tapoy rin don id puhawang nod bovallan ki no mgo anak din ukit ki Disas Krays, su ini en kos kandin nid kopi-i woy id kahaa-i. 6 De-en od doongon ta kos Monama taddot waa toppong no kopiyannoy rin no id pokita rin keta no nosokkad diyot Anak din no id dokollan din to ginawa.
7 Na ukit to longossa ni Disas Krays no id tihis diyon to krus, notobbus ki woy noposinsyan don kos mgo saa ta ukit to waa toppong no kopiyannoy to Monama. 8 Id busbus din iddon kopiyannoy rinit keta duma to moraom no koovottan woy sinorollan, 9 su amoy od koovottan ta iddos puhawang din no waa rin id posaddoo dangan no iyon dontulon din no od kotuman idda ukit ki Disas Krays. 10 Su iyon puhawang din, no otid inguma ron kos ollog no timpu, od podsokaddon din iddos langun no riyot datas to langit woy dos ka-ay to ampow't ingod amoy id po-iraom to kodponguu ni Disas Krays.
11 Na, id puungan to Monama kos langun ukit taddot puhawang woy id kopi-i rin. De-en id aam koyd nikandin tapoy amoy'd kovovallan no mgo minuvu rin ukit to kodsokkad ta ki Disas Krays. 12 Id puungan din ini, su amoy ukit konami no mgo Judio no unnon mid salig ki Disas Krays, od koposivontuhan kos Monama. 13 Woy sikiyu mandad, to norinog dow iddos bonnaan kahi no idda en so Moppiyon Dinoggan moka-atag to kodtobbus, id pomakoy kow ki Disas Krays. De-en id boggoy to Monama koniyu iddos Uhis no Ispiritu no id tandu rin dangan, timbang id patow no mgo minuvu kowd nikandin. 14 Dos Uhis no Ispiritu, idda en kos od posivonnaa nod kotanggap ta iddos id tandu to Monama keta no mgo minuvu rin. Oyyos od inguma kos timpu no od ipongngan din iddos kodtobbus keta. Id puungan din ini amoy od doongon woy'd posivontuhan ta sikandin.
Dos Dosalon ni Pablo
15 Na, norinog ku iddos moka-atag to koniyun kopomakoy riyot ki Disas nod Longaggon woy dos koniyun kodginawa atag to langun no minuvu to Monama. 16 De-en inaayun a od posolamat diyon to Monama atag koniyu, woy inaayun ku sikiyu od opilon diyot koddin dosalon. 17 Id dasaa a riyot od posivontuhon no Monama no Amoy ta woy Monama mandad tod Longaggon ta no si Disas Krays, no od tovangan kow to Uhis no Ispiritu. Sikandin kos od boggoy koniyu to moraom no koovottan moka-atag to Monama amoy'd kokilaa row pe-en sikandin. 18 Id dasaa a mandad no od kopokes kos koniyun poomdom, su amoy od koovottan dow kos ko-immanan no idda en kos unayan no id aam kow to Monama amoy'd kovovallan no mgo anak din. Id kopi-i ku nod koovottan dow mandad iddos lampas no kopiyannan no id tandu rin atag keta no mgo minuvu rin. 19 Woy id dasaa a nod koovottan dow iddos waa toppong no kotuusan to Monama no od tavang dinit keta nod pompomakoy. Ini en no kotuusan kos 20 id badnow ki Disas Krays pomon diyot kopotayan woy id po-unsad kandin lomig to kowanan din diyot datas to langit. 21 Dutun, si Disas Krays kos lampas to langun no hari, taddot duwon mgo kotungud woy taddot duwon kotuusan, ahad iddos diid kokita no duwon mgo kotungud. Waa en od pokolampas kandin, konna ra ko-ungkay'n mgo timpu, ko konna, ahad init od inguma pa. 22 Id po-iraom to Monama kos langun diyot kotungud ni Disas Krays, woy id aam sikandin no timbang uu to langun nod pompomakoy. 23 Na iddos langun nid pomakoy kandin kos timbang lawa rin. Diyot kandan, nosokkad iddos langun no botasanon woy koovottan ni Disas Krays. Woy ahad ingkon ka-ay to ampow't ingod woy riyot datas to langit, diyon en sikandin.