Dos Sulat ni Pablo Atag to mgo Toho
GALACIA
Unna nod Bosan
Inis Galacia, sokkad no prubinsya no duwon mgo bonuwa no sakup, no idda en so Iconio, Listra, Derbe woy dos bonuwa to Antioquia no sakup mandad to Pisidia. Iddon mgo lugaa, id tuuyan onni Pablo riyot unnon iponawon dan amoy'd ponudtuu to Moppiyon Dinoggan (Pinuungan 13:1 taman to 14:52). Iddos mgo toho Galacia, konna sikandan mgo Judio. Diyot unna, id simba ran to konna bonnaan mgo monama. Piru to id inguma onsi Pablo, mo-uraa kos id pomakoy ki Disas Krays ukit taddot nonaw ran.
Piru to id uli ron onsi Pablo, duwon mgo Judio nid inguma no id supak to nonaw rin, de-en notaong kos poomdom taddot lammin od pompomakoy. Su id nonaw ran no dii en od tonggapon to Monama kos minuvu ukit da to kodsalig woy kopomakoy ki Disas Krays. Ko-ilangan kun en mandad no od ikuu taddot botasanon moka-atag to kodpotupu amoy'd kotobbus.
De-en to norinog ni Pablo iddos moka-atag taddot bengkog no nonaw ran, id popiyod din inin sulat diyot od ponlolivuung nod pompomakoy to Galacia, su amoy od kosorollan dan iddos kovonnaan pomon diyot Monama. Id posampot ni Pablo riyot kandan no waa osson od pokotobbus to minuvu, idda ra en so mooggot no kodsalig taddot kopotayan ni Disas Krays. Oyya su ukit taddot id puungan din, duwon kolegguangan ta pomon diyot kodsilut to Monama to keton mgo saa, ahad waa ta notuman iddos langun no Suhu ni Moises. Ini en kos id livodlivod ni Pablo tid oseng ka-ay'n sulat.
Diyot langun no sulat ni Pablo, ini en kos uu-unno-i nid sulat din. Id sulat din ini, mgo sopuu-pittun lahun nopongnga novatun si Disas.
Dos mgo Nokota-aw:
Kodpokilaa (1:1-10)
Dos kodposivonnaa ni Pablo no sokkad sikandin no apostoles (1:11 taman to 2:21)
Id podmotallong to Monama kos minuvu ukit da en to kopomakoy ki Disas Krays (3:1 taman to 4:31)
Dos kolegguangan tod pompomakoy woy dos kodpo-iraom dan to Uhis no Ispiritu (5:1 taman to 6:10)
Kotompusan no mgo pomandu woy kodpongumusta (6:11-18)
1
Kodpokilaa
1-2 Siyak si Pablo kos mid sulat ka-ay atag koniyu no od ponlolivuung nod pompomakoy ruwot mgo bonuwa no sakup to prubinsya to Galacia. Siyak woy dos langun no suwod ta riyot kopomakoy ka-ay, id po-uma to kodpongumusta koniyu.
Id posampot ku koniyu no inis kotundanan ku no apostoles, konna minuvu kos id aam woy mid suhu koddi, ko konna, si Disas Krays en woy dos Monamon Amoy no id badnow kandin pomon diyot kopotayan. 3 Muopa nod kotanggap dow iddos kopiyannoy woy kosunayan no id pomon to Monamon Amoy ta woy tod Longaggon no si Disas Krays, 4 no id boggoy to kandin no umuu amoy'd koposinsyan kos mgo saa ta. Id puungan ni Disas Krays ini, oyyos id kopi-i to Monamon Amoy no od pokolegguang ki pomon diyot kororattan no id hari ko-ungkay rinit ampow't ingod. 5 Od doongon ta kos Monama taman to waad tomanon. Oyya, od kotuman en ini.
Sokkad da en kos Moppiyon Dinoggan
6 Mgo suwod, nosoobbuwan a moho oraroy koniyu, su go-os kow id inoyyug to Monama no id aam koniyu ukit to kopiyannoy ni Disas Krays. Id pomakoy kow kun to osson nonaw no kunan dow ko moppiyon dinoggan. 7 Iyon bonnaa, waa osson Moppiyon Dinoggan, ko konna, idda ra en so id ponudtuu ku koniyu moka-atag ki Disas Krays. Piru duwon mgo minuvu nid unduwon to koniyu no id ponudtuu to osson nonaw, su id kopi-i ran nod bovaawan iddos Moppiyon Dinoggan. Pomon tadda, nongotaong kow. 8 Piru poomdomma row ini. Otik duwon od ponudtuu koniyu to ossa pa taddot Moppiyon Dinoggan no id ponudtuu ku koniyu, ahad ponolihan pe-en sikandin pomon diyot datas to langit o sikami vo, od pokosahap en taddot lampas no silut to Monama. 9 Id ikahi royd dangan ini koniyu, piru od uliton ku mandon, no otik duwon od ponudtuu koniyu to ossa pa taddot Moppiyon Dinoggan no notanggap dow pomon konami, od pokosahap en taddot lampas no silut to Monama!
10 Yo kow'd popoomdom no iyon dontulon ka-ay't koddin osengan no id kopi-i ku nod koroong a to mgo minuvu, su iyon ku id kopi-i no od koroong a to Monama. Oyya su otik idda pa so koddoong to minuvu kos od ingowollon ku, konna a en mooggot no uripon ni Disas Krays.
Dos Kod-aam to Monama ki Pablo no od Kovovallan no Apostoles
11 Mgo suwod, id kopi-i ku nod kosorollan dow no iddos Moppiyon Dinoggan no id ponudtuu ku koniyu, waa idda bobbovalli to minuvu. 12 Waa ku mandad idda notanggap pomon diyot mgo minuvu, woy waa id nonaw koddi tadda, ko konna, si Disas Krays da en kos id posaddoo koddi.
13 Norinog dow iddos kodbovotasan ku dangan to oraroy a pa nid ikuu to pomokayon to mgo Judio. Su iddos od ponlolivuung nod pompomakoy to Monama, id posupittan ku no waad en ahad disok no eru ku kandan, woy id noonokkalan ku no waa sokkad nod kosama riyot kodpomakoy ki Disas Krays. 14 Otik moka-atag to kod-ikuu to pomokayon to mgo Judio, waa od pokotoppong koddi to langun no iling to idad ku. Oyyos oraroy a no mohi-od nod ikuu taddot botasanon to kovuyyahan doy.
15 Piru id pokita to Monama kos kopiyannoy rin koddi, oyya su iddot waa a pa id tobbow, id ossa ad tapoy nikandin woy id aam nod kovovallan no uripon din. 16 Woy id inguma kos timpu no id pokita to Monama koddi iddos Anak din no si Disas Krays, su amoy id pokoponudtuu ku iddos Moppiyon Dinoggan diyot konna mgo Judio. Iddon timpu, waa a mid porani to ahad ondoy amoy'd buyu to mgo pomandu. 17 Waa a mandad id undiyon to Jerusalem amoy'd buyu to mgo pomandu taddot mgo apostoles no unna pa koddi, ko konna, id tollus a riyot ingod to Arabia, woy kopongnga tadda, id livod a riyot bonuwa to Damasco. 18 To id lihad kos otollun lahun, idda pa id undiyon a to Jerusalem amoy'd lowwi ki Pedro.* Otik diyot Griego no kinohiyan, inis ngaran no Pedro, Cefas. Na id oubpa a rutun duma kandin to mgo oruwon simana. 19 To iddon timpu, waa dumon apostoles no nokita ku, ko konna, si Pedro ra en woy si Santiago no suwod tod Longaggon. 20 Bonnaa en inis id sulat ku, woy nokosaddoo kos Monama no waa a mid ouhus.
21 Pomon diyot Jerusalem, id undiyon a to prubinsya to Siria woy Cilicia. 22 Iddon timpu, waa a poron nokilaa taddot od ponlolivuung nod pompomakoy ki Disas Krays no id pon-ubpa riyot prubinsya to Judea. 23 Iyon dan da nosorollan moka-atag koddi, idda ra en so od osengon to duma no, “Iddos minuvu nid posuppit keta dangan, ko-ungkay, id nonaw ron moka-atag to kopomakoy no id noonokkalan din dangan tid dora-at.” 24 De-en id doong dan kos Monama pomon to id lammi a nikandin.