1 So menge batà kaw den te Timanem, yan keilangan eked kaw den peg-inang te medaet diyà te doma otaw. Ikà niyo egkebolalaw. Ikà niyo egpelingo-lingo. Ikà niyo eg-ingà. Ikà niyo egbaet-baet. 2 Keilangan gayed kaw meg-iling te ontò kagi te Timanem, iling te deitek batà gayed egkeibeg somoso. Pineokit te peg-iling niyo te kagi te Timanem, megketesan se pegsalig niyo diyà kandin, 3 so nenadam kaw den te keido te Pengolo tadon.

4 Keilangan beyà-beyaan kaw i Cristo egpemegay te kaling pedowan wedad temanan. Iling sikandin te bato gemiten te peg-inang te balay. Pengkey mig-aneng-aneng se menge otaw te wedad keelagà din, meneng sikandin se pinemallì te Timanem aw meelagà diyà kandin. 5 Binegayan kaw din te kaling pedowan wedad temanan. Aw beyà-beyaan kaw din, meinang kaw iling te menge bato gemiten te peg-inang te balay egsimbahan te Timanem. Inangen kaw din heman iling te menge pengolo te simbahan te Judiyo, so pineokit te tabang i Jesu Cristo, doen den mepakay tadon ibegay diyà te Timanem. Aw megsimba kidon kandin aw domuyun kidon heman kandin, yan se kelubahan din. 6 Doen kagi te Timanem insolat tepad ki Cristo,

9 Meneng kenà kaw iling kandan, so sikiyo se pinemallì te Timanem aw ininang kaw menge batà din. Ininang kaw din menge pengolo te simbahan eglowanan i Cristo. Ininang kaw din menge sakop din egpenimanem, aw tinig-apò kaw din heman. Pinemallì kaw din amon meg-indan kaw te doma otaw tepad te menge mèpiya ininang din diyà kenyo, so pegtawal din kenyo amon megpesakop kaw diyà kandin, inalin kaw din lekat te kengitngit doton te mèpiya kelowahan din. 10 Kedengan, kenà kaw menge sakop te Timanem, meneng songkani sakop kaw din den. Kedengan, wedà kaw ketaga-taga te doen keido te Timanem, meneng songkani dinetengan kaw den te keido din.

11 Meneng menge kedowa ko egkedekelan ko te pedowan, kenà keneyonan seini se ontò ogpeanan niyo, aw olò kaw iling te mepanaw dini lanto te tanà. Yan megpunù a den kenyo te keilangan eked kaw taking te medaet ibeg te lawa niyo, so pineokit kenyan kebàtan se pegtaking niyo te Timanem. 12 So tengtengen kaw te menge otaw wedà pa pemenal te Timanem, yan keilangan ontò metòlid se eg-inangen niyo, amon aw mikagi dan te doen salà niyo, metaga-taga dan beling te mèpiya se eg-inangen niyo, aw yan se doun te iduyun dan se Timanem te aldaw te pegdateng din.

13 Keilangan tomolò kaw te kedita te punù te gobirno, so yan se ibeg te Pengolo tadon. Keilangan tomolò kaw te selotan, so sikandin se eglowan diyà te kedita te doma opisyal. 14 Keilangan tomolò kaw heman te menge gobirnador, so insogò dan megpelumun te otaw eg-inang te medaet aw amon domuyun dan te otaw eg-inang te mèpiya. 15 Ibeg te Timanem, meg-inang kaw te metòlid, amon wedad isila te kedita te otaw wedà pa ketaga-taga te kebenalan aw wedad inenengen. 16 Mepakay aw memallì kaw den aw eden se inangen niyo, meneng ikà niyo eg-aneng-aneng te mepakay aw memallì kaw meg-inang te medaet, so keilangan metòlid se eg-inangen niyo, amon ipetaga-taga niyo te egtolò kaw den te Timanem. 17 Keilangan megsagman kaw te kedita te otaw. Keilangan dakel se pedowan niyo te kedita te doma sakop te Timanem. Keilangan melemitan kaw meg-inang te eked keibegi te Timanem. Keilangan megsagman kidon te otaw ginulal selotan tadon.

18 Nayan, se kedita niyo sineligan, keilangan tomolò aw megsagman kaw te amo niyo, kenà olò aw mèpiya dan aw egkeido dan, meneng keilangan megsagman kaw kandan pengkey wedad keido dan kenyo. 19 So aw tomayod kaw te pemilang pengkey wedad medaet ininang niyo, yan meluba se Timanem kenyo, so netegahan niyo te yan se ibeg te Timanem inangen niyo. 20 Meneng aw ipelumun kaw tandà te medaet ininang niyo, pengkey tomayod kaw te pelumun, eked kaw duyuni te Timanem. Meneng aw meketayod kaw te pemilang pengkey metòlid se eg-inangen niyo, yan doen ontong ibegay te Timanem diyà kenyo. 21 Ibeg te Timanem tomayod kaw te kelimahan. Nelimahan heman si Cristo aw timayod sikandin kenyan amon ketebangan kaw din. Sikandin se gegonan niyo amon meketayod kaw heman te kelimahan. 22 Wedad palos salà ininang din. Wedà sikandin palos pegkebolalaw. 23 Pegtompuyus dan kandin, wedad medaet intaba din. Pegpengimatay dan kandin, wedà sikandin peglamit kandan. Olò sikandin simalig diyà te Timanem eg-okom te metòlid. 24 Pegkematay din doton te kros, inibing din se kedita te salà tadon amon mekelowà kidon lekat te salà aw amon mekeinang kidon te metòlid. Pineokit te pegpelumun kandin, migkèpiya kidon den. 25 Kedengan, iling kaw te menge ayam-ayam karniro egketading. Meneng songkani, timaking kaw den ki Cristo biyasa egpengibing aw eg-ipat kenyo.