1 Dalem te peg-ogpà i Apolos doton te Korinto, limiyo si Pablo te bontod pesalo doton te Efeso. Netelaan din kidoen se menge tinoledaan. 2 Mig-insà si Pablo, kagi din, “Pegpemenal niyo te Timanem, dimateng lay se Espiritu Santo diyà kenyo?”

Timaba dan, “Wedà, so wedà kay toledai tepad te Espiritu Santo.”

3 Mig-insà si Pablo, kagi din, “Eden lay kemoloi te pegbonyag se pinemenalan niyo?”

Timaba dan, “Pegbonyag i Juan Memonyagay.”

4 Minikagi si Pablo, “Binonyagan i Juan se otaw migselsel te salà dan. Meneng migtoladà heman sikandin te keilangan memenal se menge Judiyo diyà te sebad otaw somelilin kandin, aw yan si Jesus.”

5 Pegdineg dan kenyan, nemenal dan diyà te Pengolo si Jesus aw binonyagan dan. 6 Pegpemaed i Pablo kandan, dimateng se Espiritu Santo diyà kandan, aw nekeikagi dan te medita kemolò kagi te doma otaw, aw kimeliwat dan heman te kagi te Timanem. 7 Sempolò teg dowa se otaw nemenal. 8 Dalem te telo se bolan, gayed egdoton si Pablo te simbahan te Judiyo. Wedà sikandin pegketalaw te pegtoladà din kandan tepad te peglowan te Timanem. 9 Meneng doen menge otaw kimulu te pegpemenal. Medaet se inikagi dan tepad te kagi te Timanem intoladà din diyà te otaw netipon. Penga niyan, nesayo si Pablo lekat te simbahan, aw inibing din se menge otaw egpemenal doton te iskwilahan pigmeistrohan i Tirano. Migtoladà si Pablo kandan kidoen te kelikit te aldaw 10 lamig te dowa se omay. Yan netegahan te kedita te otaw kidoen te Asya se kagi te Pengolo. Netegahan iyan te menge otaw Judiyo aw menge otaw kenà Judiyo.

11 Egtabang se Timanem ki Pablo, aw ininang din se kepelahan, 12 so pengkey kelobaw aw penenaktun din ipeg-ated dan doton te otaw doen mesakit, amon kegolian se otaw sìyan doen mesakit, aw amon mekelowà se bosaw lekat te doma otaw.

13 Doen menge Judiyo lomelegeb eg-ikagi te doen tolos dan megpelowà te bosaw lekat te otaw. Minikagi dan diyà te bosaw, “Lowà ka pineokit ki Jesus, sìyan intoladà i Pablo.”

14 Se migtelaman kenyan, yan se pito batà te ontò pengolo te simbahan te Judiyo si Esceva. 15 Meneng minikagi se bosaw diyà kandan, “Netegahan ko si Jesus aw si Pablo. Meneng sikiyo, eked ko toloi.”

16 Penga niyan, pinengayaw dan te otaw dinetengan te bosaw, aw dinaeg se kedita dan. Yan kimadas dan kidoen nelingkasan te penenaktun aw nepelian dan. 17 Nedengeg iyan doton te Efeso, aw netegahan iyan te kedita te Judiyo aw otaw kenà Judiyo. Nepela se kedita dan, aw induyun dan se ngadan te Pengolo si Jesus. 18 Migselsel heman se menge otaw kaling nemenal. Wedà dan boloni se medaet ininang dan. 19 Doen heman menge otaw biyasa egdelikmata nemegay te libro dan te delikmata, aw migsonog dan kenyan kinità te kedita te otaw. Binilang dan se keelagà te kedita te libro sinonog, dagpò niyan keliman melalan se kwarta dan. 20 Nedengeg se kagi te Pengolo intoladà, aw medita se otaw nemenal.

21 Penga niyan, ibeg i Pablo domoton te Jerusalem mokit te Masidonya aw Gresya. Minikagi sikandin, “Penga te peggemaw ko doton te Jerusalem, keilangan domeleg a doton te Roma.”

22 Insogò din se dowa otaw migtabang kandin si Timoteo aw si Erasto domoton te Masidonya, meneng nenamay-namay mig-ogpà pa si Pablo kidoen te probinsya te Asya.

23 Dalem te peg-ogpà din doton te Efeso, doen dakel samok tepad te pegtoladà din te kagi te Timanem. 24 Doen sebad otaw si Demetrio biyasa egtoang te selapì. Medita se otaw migterbaho kandin, so mig-inang dan te kekitaan iling te kedakel te kepolan impesopo te simbahan egtewal-tewalan dan diyà te sebad inotaw ngadan din si Diana. Yan se ipegpemeligyà dan, aw dakel se kwarta neabat dan. 25 Migtipon si Demetrio te otaw migterbaho kandin aw doma otaw egtoang kenyan. Minikagi si Demetrio diyà kandan, “Netegahan niyo te dakel se kwarta egkeabat tadon pineokit te eg-inangen tadon seini. 26 Meneng kinità niyo den besi si Pablo, aw dinineg niyo heman se inikagi din. Wedad son din kekemowan te inotaw eg-inangen te otaw, so kenà ekon timanem. Medita se otaw nenenalan kandin, pengkey dini te Efeso aw doton heman te kedita te doma lonsod te Asya. 27 Medaet iyan, so wedad nael otaw mayad te eg-inangen tadon. Medaet heman so wedad den megsagman te simbahan te melangkaw inotaw tadon si Diana. Sikandin se egsimbahen te kedita te otaw dini te Asya aw doton te kebelad te keneyonan. Ontò medaet aw eked dan pegtawal-tawal kandin.”

28 Pegdineg dan te kagi din, ontò dan neopal aw migbelobansag dan, kagi dan, “Iduyun si Diana te Efeso.”

29 Nesamok se kedita te otaw eg-ogpà kidoen. Inewidan dan se otaw timaking ki Pablo lekat te Masidonya si Gayo aw si Aristarco. Intolod dan doton te tiponanan te otaw. 30 Ibeg peden i Pablo domeleg doton amon mikagi diyà te otaw netipon, meneng sinagda te menge otaw egpemenal. 31 Doen menge doma otaw melangkaw sigalak din migpunù kandin te eked sikandin doton amon eked heman elegi.

32 Dalem niyan, dakel se samok te kedita te otaw netipon. Wedà peg-onawa se kagi imbelobansag dan. Pilabok se otaw netaga-taga te nengà netipon dan. 33 Impetindeg te menge Judiyo se doma dan si Alejandro doton te monà. Penga niyan, intakyaw din se belad din amon mepenek dan, so ibeg din mikagi diyà te otaw netipon. 34 Meneng pegketaga-taga dan te Judiyo sikandin, labi dan migbelobansag te dowa oras, kagi dan, “Mebohay si Diana te Efeso.”

35 Penga niyan, sinagda te konsiyal se otaw netipon. Pegkepenek dan, minikagi sikandin, “Menge sakop te Efeso, netaga-taga se kedita te otaw te sikitadon tege Efeso se egtonggò te simbahan te melangkaw timanem tadon si Diana nedagdag lekat te langit. 36 Wedad otaw mekeikagi te kebolalaw iyan. Yan kepenek kaw. Ikà niyo egkebook. 37 Wedad palos salà te didowa otaw sìyan inibing niyo dini, so wedad palos tinakaw dan lekat te simbahan. Wedà dan heman pegtompuyus te inotaw tadon. 38 Simpana doen salà dan ki Demetrio aw menge doma din, keilangan meg-indan dan diyà te howis te aldaw te peg-osay amon megpebelaw-belaway dan kidoen. 39 Meneng aw doen pa doma ibeg niyo, pegtagad kaw te aldaw te pegtipon, so yan se punù te gobirno. 40 Detengan kidon besi te keopal te gobirno tandà te pegsamok tadon te aldaw seini, so wedad itaba tadon kenyan.”

41 Penga niyan, impeolì din se kedita te otaw netipon.