1 Na, sikiyo menge otaw doen allang, keilangan metòlid se pegpengibing niyo kandan, so netegahan niyo te doen heman Pengolo niyo doton te langit.

2 Se kedita niyo, keilangan gayed kaw megtawal-tawal. Ikà niyo eglengà te pegtawal-tawal, aw keilangan megpesiontong kaw diyà te Timanem. 3 Pegtawal-tawal kaw heman tepad kenami, amon doen aldaw ibegay te Timanem kenami te pegtoladà day te kagi din, sìyan kebenalan tepad ki Cristo wedà din petega-tegahi gebii. Kineleboso a pa seini tandà te pegtoladà ko te kebenalan sìyan. 4 Pegtawal-tawal kaw heman te tebangan a te Timanem te pegtoladà ko kenyan, so keilangan mebangal se ipegtoladà ko.

5 Keilangan mèpiya se eg-inangen niyo diyà te menge doma otaw kenà egpemenal. Peg-indan kaw kandan tepad ki Cristo te pengkey eden eldawi. 6 Keilangan mèpiya se eg-ikegiyen niyo diyà te kedita te otaw amon meibeg dan menenalan te kagi niyo. Pegpeketagad kaw amon meketaba kaw te kedita te otaw doen insà kenyo.

7 Aw domateng doton kenyo se kedowa tadon te pegpemenal si Tikico, sikandin se meg-indan kenyo tepad te keogpà ko dini. Egkeseligan sikandin egtoladà, aw egkedekelan tadon sikandin te pedowan. Sikandin se doma ko eg-inang te ibeg te Pengolo tadon. 8 Isogò ko sikandin doton kenyo, amon entagen din se pedowan niyo pineokit te peg-indan din kenyo tepad te keogpà day. 9 Isogò ko heman se kedowa tadon te pegpemenal si Onesimo tomaking kandin. Egkeseligan heman sikandin aw egkedekelan tadon te pedowan. Sikandin se tege doton kenyo. Didowa dan se meg-indan kenyo aw eden se eg-inangen day dini.

10 Kineleboso heman doma ko si Aristarco, aw ibeg din ketegahan niyo te eg-aneng-aneng sikandin kenyo. Onawa heman kenyan se kagi i Marcos, sìyan kedowa i Bernabe. Aw domateng sikandin doton kenyo, pegsagman kaw kandin iling te tapay impunù ko kenyo. 11 Si Josue, se doma ngadan din si Justo, ibeg din heman ketegahan niyo te dakel se pedowan din kenyo. Diyà te kedita te menge Judiyo egpemenal, seini olò telo se egtelaban te pegtoladà ko tepad te peglowan te Timanem. Ontò migkagsen se pedowan ko tandà te tabang dan.

12 Minikagi heman si Epapras sebad heman sakop te probinsya niyo te dakel se pedowan din kenyo. Gayed sikandin egtolò te ibeg i Jesu Cristo. Egtawal-tawal sikandin aw ontò egpemoyò diyà te Timanem te melobos se pegpemenal niyo. Ibeg din ontò kaw metaga-taga te kedita te ibeg te Timanem diyà kenyo. 13 Kinità ko te ontò sikandin measeb amon tebangan kaw aw menge otaw tege Layodisiya aw tege Hiropolis. 14 Se doktor si Lucas egkedekelan tadon te pedowan, aw si Demas, ibeg dan metaga-taga kaw te eg-aneng-aneng dan heman kenyo.

15 Keliwati niyo se kagi ko doton te tege Layodisiya egpemenal, aw doton heman ki Ninfa aw kedita te otaw egtipon kidoen te balay din amon megsimba, so eg-aneng-aneng a kandan. 16 Aw mepenga se pegbasa niyo te solat ko seini, peibingi niyo iyan doton te Layodisiya amon besahen dan heman doton. Pegbasa kaw heman te solat ko kandan. 17 Keliwati niyo heman se kagi ko diyà ki Arkipo te keilangan ipengahen din se terbaho insogò te Pengolo tadon kandin.

18 Siak si Pablo se simolat te temanan te solat ko kenyo seini. Ikà niyo egkelibel te kineleboso a pa.

Ibeg ko tebangan kaw te Timanem.