1 Wedà kidon den keallang te punù ingkeliwat i Moises, so impelowà kidon den i Cristo lekat kidoen. Ikà niyo egkelibel kenyan. Ikà niyo heman todà egpeallang.

2 Penenelani niyo se kagi ko seini. Simpana punù ingkeliwat i Moises se seligan niyo amon meg-aneng-aneng se Timanem te metòlid kaw, wedad ontong te pegpemenal niyo ki Cristo. 3 Ibeg ko, ontò niyo ini eneng-enengen. Pengkey sinu se somalig te punù ingkeliwat i Moises amon meg-aneng-aneng se Timanem te metòlid sikandin, kenà olò punù tepad te pegtolì se toloen din, meneng keilangan toloen din se kedita te punù ingkeliwat i Moises.

4 Na, sikiyo meibeg eneng-enengen te Timanem te metòlid kaw pineokit te pegtolò niyo te punù sìyan, timinàyog kaw den ki Cristo aw nebensihan niyo den se tabang te Timanem. 5 Meneng aw si Jesus se seligan tadon, tebangan kidon te Espiritu Santo aw pelimanan tadon se aldaw te metoman kidon eneng-enengen te Timanem te metòlid kidon, 6 Diyà te menge otaw nemenal den ki Cristo, wedad elet diyà te otaw tinolì aw otaw wedà tolii. Onawa iyan diyà te Timanem. Meneng ibeg te Timanem, ipekità tadon te benal se pegpemenal tadon pineokit te dakel pedowan tadon.

7 Kedengan, ontò kaw egtaking te kebenalan, meneng seini, nepela a so limengà kaw den. 8 Kenà Timanem se migsagda te pegtaking niyo te kebenalan. 9 Peg-ahà kaw amon eked kaw ketini te toladà dan kenà metòlid, so iling kenyan se ikegiyen tadon, “Pengkey deitek olò se yist, meneng lomebag se kedakel te arina.” 10 Aneng-aneng ko, memenal kaw te kagi ko kenyo seini, so telekedowa kidon den pineokit te Pengolo tadon. Meneng pengkey sinu se megbulung te aneng-aneng niyo, yan se otaw ipelumun te Timanem. 11 Migkebolalaw dan so minikagi dan te egtoladà a te keilangan tolien kidon aw tomolò te punù ingkeliwat i Moises amon meg-aneng-aneng se Timanem te metòlid kidon. Meneng kenà iyan benal. Simpana yan se ipegtoladà ko, eked a den pemilangi te menge Judiyo, aw eked a dan heman kebensihi te pegtoladà ko tepad te pegkematay i Cristo doton te kros. 12 Ibeg ko peden, megpetepò heman se menge otaw egsamok kenyo, sìyan egtoladà te keilangan tomolò kaw te punù ingkeliwat i Moises.

13 Menge kedowa ko, tinawal kaw te Timanem amon ipelowà kaw din lekat te pegtolò niyo te punù sìyan. Pengkey wedà kaw den keallang kenyan, meneng ikà niyo den eg-aneng-aneng te mepakay aw tomaking kaw te medaet ibeg te pedowan niyo. Meneng pedekelay kaw te pedowan, aw petebangay kaw. 14 Netibok se kedita te punù ingkeliwat i Moises diyà te sebad punù seini, “Kedekeli niyo se doma otaw te pedowan iling te peg-aneng-aneng niyo te kenyo pegkeotawun.” 15 Meneng aw megpedindilay aw megbolaw kaw, pekeahà kaw amon eked kebàti se pegsebad te pedowan niyo tomaking ki Jesu Cristo.

16 Seini se punù ko kenyo. Toloi niyo se Espiritu Santo, amon eked niyo ketolò se medaet ibeg te pedowan niyo. 17 Eked pegsebad se medaet ibeg niyo aw ibeg te Espiritu Santo. Yan se doun te egdowa-dowa se aneng-aneng niyo, aw yan doen belabag te ibeg niyo inangen. 18 Meneng aw Espiritu Santo se tekingan niyo, eked kaw den keallang te punù ingkeliwat i Moises.

19 Netegahan tadon man den se eg-inangen te otaw egtolò te medaet ibeg te pedowan dan. Iling kani se eg-inangen dan. Eglayok te kenà kandan esawa, egkapoy, wedad yàyà metibayi, 20 egsimba te kenà benal timanem, egpengenito, egpeopalay, egdindil, eg-ingà, mesayo egkeopal, demeten, egpeitongay dan, egpekontrahay dan, 21 egkeibeg te kedònan te doma otaw, metiinem, eg-inang te pengkey eden se ibeg dan inangen, aw doma pa medaet inang iling kani. Sinagda ko sikiyo kedengan, meneng todà a megsagda kenyo seini. Se menge otaw eg-inang te medaet iling kenyan, yan se eked pekeakop diyà te peglowan te Timanem.

22 Meneng se otaw egbeyà-beyaan te Espiritu Santo, seini se eg-inangen din. Egkedekelan din se doma otaw te pedowan, ontò egkeluba, doen kelinaw te pedowan din, egpeketayod te kelimahan, mèpiya se eg-inangen din, egkebowasag sikandin diyà te doma otaw, aw egkeseligan sikandin, 23 aw mèpiya se pedowan din, aw egpeketameng te ibeg te pedowan din. Wedad palos punù ingkeliwat i Moises te eked kepakay se peg-inang te mèpiya iling kenyan. 24 Se menge otaw migpesakop diyà ki Cristo, yan se mig-eked te pegtolò te medaet ibeg te pedowan. 25 Se Espiritu Santo, yan se nemegay kenitadon te pedowan wedad temanan, aw keilangan ontò kidon tomolò kandin. 26 Keilangan eked kidon pegpelangkaw-langkaw, eked kidon pegpetompuyusay, aw eked kidon pegpeingaay.