1 Nayan, minikagi se Timanem diyà ki Noe, “Awop ka diyà te arka sipat te kedita diyà te pamilya nikaw, so diyà te kedita te otaw dini lanto te tanà, olò sikona se kinità ko eg-inang te metòlid. 2-3 Pengibing ka te sebad meama aw sebad bayi lekat te tegsebad-sebad kemolò te ayam-ayam aw menenanap eked kepakay sonogen aw ibegay diyà kanak, meneng pengibing ka te pito meama aw pito bayi lekat te tegsebad-sebad kemolò te ayam-ayam aw manok mepakay sonogen aw ibegay diyà kanak. Peg-inang ka kenyan amon todà megbowad-bowad se kedita te kemolò dini lanto te tanà. 4 Na, pito seini, ipetedak ko se odan, aw eked iyan kedit singed aw kepatan se aldaw aw kepatan se delem amon bàtan ko se kedita ininang ko doen pedowan dini lanto te tanà.”

5 Timolò si Noe te kedita te impunù te Timanem diyà kandin. 6 Enem gatos se omay i Noe te pegkelinep te tanà te wayeg. 7 Minawop sikandin diyà te arka sipat te esawa din, menge batà din, aw menge esawa dan, amon eked dan kegelà aw melinep se tanà te wayeg. 8-9 Netipon se sebad meama aw sebad bayi lekat te tegsebad-sebad kemolò te menge ayam-ayam, menenanap, aw manok pengkey mepakay sonogen aw eked kepakay sonogen. Dimoton se kedita niyan ki Noe, aw minawop dan diyà te arka, iling te impunù te Timanem diyà ki Noe. 10 Penga te pito se aldaw, migtebò nelinep se tanà te wayeg.

11 Peg-apet te enem gatos se omay i Noe, te pitsa sempolò teg pito te ikedowa te bolan te omay sìyan, neowang se kedita te selep doton didalem te dagat, aw neowang heman se kedita te linekatan te odan doton te langit. 12 Penga niyan, minodan te kepatan se aldaw aw kepatan se delem.

13 Te wedà pa kelinep se tanà, tapay minawop si Noe diyà te arka sipat te esawa din, menge batà din si Sem, si Ham, aw si Japet, aw menge esawa dan. 14 Minawop heman se kedita te kemolò te menge ayam-ayam aw menenanap, dakel aw deitek, aw kedita te kemolò te manok. 15-16 Doen meama aw bayi diyà te tegsebad-sebad kemolò doen pedowan dimoton ki Noe, aw minawop dan diyà te arka, iling te impunù te Timanem diyà ki Noe. Penga niyan, tinakep te Timanem se lelebangan te arka.

17 Gayed minodan te kepatan se aldaw aw kepatan se delem. Gayed migkedalem se wayeg lamig limepaw se arka. 18 Gayed timilles se wayeg diyà te lanto te tanà, aw miglepaw-lepaw se arka diyà te lanto te wayeg. 19 Gayed timilles se wayeg diyà te lanto te tanà lamig nelinep te wayeg se kedita te melangkaw bontod. 20 Timilles se wayeg lamig pito mitro se kedalem te wayeg limowan diyà te toktok te menge bontod. 21 Yan nelemes se kedita diyà te lanto te tanà, pengkey manok, ayam-ayam, menenanap, aw otaw. 22 Nematay se kedita doen pedowan dini lanto te tanà. 23 Inigelà te Timanem se kedita te otaw, ayam-ayam, menenanap, aw manok. Olò si Noe se nesamà, sipat te menge doma din kidoen didalem te arka.

24 Sebad gatos keliman se aldaw se kenamay te pegkelinep te tanà te wayeg.