1-2 Nayan, si Amrafel se selotan doton te Sinar, si Arioc se selotan doton te Elasar, si Cadorlahomor se selotan doton te Elam, aw si Tadal se selotan doton te Goyim. Dalem te pegkeselotan dan, migsebad se epat dan migbolaw diyà te doma lima selotan seini, si Bara selotan te Sodoma, si Birsa selotan te Gomora, si Sinab selotan te Adma, si Semeber selotan te Seboyim, aw sìyan selotan te Bela doma ngadan niyan Soar. 3 Migsebad se lima selotan sìyan, aw netipon se kedita te sondalo dan doton medapag te baog te Sidim neinang den songkani Lanaw te Asin. 4 Tapay sinakop i Cadorlahomor se lima selotan sìyan dalem te sempolò teg dowa se omay. Meneng pegdateng te ikesempolò teg telo te omay, minato dan kandin.

5 Pegdateng te ikesempolò teg epat te omay, limompak si Cadorlahomor aw menge doma selotan migsebad diyà kandin. Dinaeg dan se kedita te tege Repai doton te Astarot-carnaim. Dinaeg dan heman se menge tege Susi doton te Ham, aw menge tege Emi doton te kepetagan te Kiriataim. 6 Dinaeg dan heman se kedita te menge tege Hori doton te bontod inogpaan dan doton te Seir, aw pig-alaw dan taman te lonsod te Elparan medapag te kebigtilan. 7 Penga niyan, limikò dan doton te lonsod te Cades (Enmispat se doma ngadan niyan). Dinaeg dan heman se kedita te otaw mig-ogpà doton te tanà te menge Amalek, aw dinaeg dan se menge Amori mig-ogpà doton te Hasason Tamar.

8 Penga niyan, migpetagad se menge selotan te Sodoma, Gomora, Adma, Seboyim, aw Bela te menge sondalo dan. Dimoton dan te baog te Sidim amon mato dan 9 te menge sondalo te epat selotan kidoen, si Cadorlahomor selotan te Elam, si Tadal selotan te Goyim, si Amrafel selotan te Sinar, aw si Arioc selotan te Elasar. Lima se selotan migbolaw te epat selotan. 10 Medita se baog-baog kidoen doen koliko te aspalto ontò melemiket. Pegkedaeg te selotan te Sodoma aw selotan te Gomora, kimadas se menge sondalo dan, aw doen nepolotan kandan kidoen te menge baog-baog sìyan, aw kimadas se menge doma sondalo doton te menge bontod. 11 Penga niyan, mig-agaw se epat selotan te kedakel te kedònan aw kànen kidoen te lonsod te Sodoma aw Gomora, aw nesayo dan. 12 Dinakep dan heman se anak i Abram si Lot, aw inagaw dan se kedònan din, so mig-ogpà sikandin doton te Sodoma.

13 Doen sebad otaw nekelowà mig-indan te kedita niyan diyà ki Abram se Hebreo. Dalem niyan, mig-ogpà si Abram doton medapag te menge olayan i Mamre tege Amori. Gayed egpedepitay si Abram, si Mamre, aw menge kedowa i Mamre, si Escol aw si Aner. 14 Pegketaga-taga i Abram te nedakep se anak din, tinipon din se kedita te sineligan din biyasa eglegamit te kekamang, telo gatos sempolò teg walo se kedita dan, aw mig-alaw dan te epat selotan sìyan taman te lonsod te Dan. 15 Pegkedelem niyan, impeebong-ebong i Abram se menge sineligan din kidoen, aw limompak dan kandan, aw dimaeg dan kandan. Pig-alaw dan i Abram taman te lonsod te Hoba digsel te Damasko. 16 Neabat i Abram se kedakel te kedònan neagaw dan. Impelowà din heman se anak din si Lot, aw in-olì din diyà ki Lot se kedakel te kedònan neagaw lekat kandin. Impelowà din heman se kedita te bayi aw menge doma otaw nedakep.

17 Peg-olì i Abram lekat te pegdaeg din ki Cadorlahomor aw menge doma selotan, simongon se selotan te Sodoma kandin doton te Baog te Sabec (iningedanan heman iyan Baog te Selotan).

18 Penga niyan, sinongon heman si Abram te selotan te Salem si Melkisedec. Sikandin heman se telekagon te Timanem Melangkaw. Inibing din se pan aw bino doton ki Abram. 19 Migtawal-tawal sikandin amon mèpiya se ibegay te Timanem diyà ki Abram. Minikagi sikandin, “Mèpiya se ibegay diyà kamno lekat te Timanem Melangkaw, sìyan mig-inang te langit aw keneyonan. 20 Iduyun se Timanem Melangkaw, so tinebangan ka din te pegdaeg no te menge poon nikaw.”

Penga niyan, nemegay si Abram diyà kandin te ikesempolò ketengà te kedita neabat din lekat te epat selotan dinaeg din.

21 Minikagi se selotan te Sodoma diyà ki Abram, “Kamno den se kedakel te kedònan day neabat no lekat te epat selotan mig-agaw kenyan lekat kenami. Olò menge sakop ko se iolì no diyà kanak.”

22 Meneng minikagi si Abram diyà te selotan te Sodoma, “Megsapà a den diyà te Timanem Melangkaw, sìyan mig-inang te langit aw keneyonan. 23 Megpakang a den te wedad palos kedònan no eked ko olii diyà kamno, pengkey sebad sinolib, aw pengkey sebad liston te sepatos. Wedad eked ko olii, so eked a keibeg aw mikagi ka te migkeyaman a pineokit kamno. 24 Wedad palos ebaten ko, meneng se kinaen te menge sineligan ko, yan olò se eked ko olii. Keilangan doen heman talad te menge otaw dimapit kanak, si Aner, si Escol, aw si Mamre.”