1 Sìyan didowa memanit nekeonà, yan se anghil. Pegkemeapon, dimateng dan doton te Sodoma. Kidoen si Lot nenenoo medapag te lelebangan diyà te melangkaw kotà nekelibed te lonsod sìyan. Pegkità din kandan, timindeg sikandin aw simongon kandan. Limongken sikandin lamig minapet se olo din diyà te tanà, 2 aw minikagi sikandin, “Sir, apit kaw den doton te balay ko. Peonawi niyo se benis niyo, aw idegà kaw dini, aw yan mekedeleg kaw kealdaw te iselem.”

Meneng minikagi dan, “Eked kay, so midegà kay dini te plasa.”

3 Meneng gayed dan pig-ibing i Lot lamig timaking dan kandin doton te balay din. Impeinang i Lot se pan aw menge doma mèpiya kànen, aw kimaen dan.

4 Te wedà dan pa ibat te delem, nelibedan se balay te kedita te meama tege Sodoma. Netipon se kedita dan, pengkey telaki aw temoay. 5 Timawal dan diyà ki Lot, kagi dan, “Kenan lay se didowa meama dimateng gina dini kamno te meapon? Pelowai dan diyà kenami amon lomayok kay diyà kandan.”

6 Limowà si Lot te balay din aw tinakep din se lelebangan. 7 Minikagi sikandin, “Menge sigalak ko, eked iyan kepakay. Ikà niyo eg-inang te medaet sìyan. 8 Meneng doen beling dowa batà ko laga wedà pa palos leyoki. Ipelowà ko den dan, aw mepakay kaw meg-inang diyà kandan te pengkey eden se ibeg niyo. Meneng ikà niyo egpeeleg te didowa meama sìyan, so migmemanit dan diyà kanak, aw yan keilangan ipaten ko dan.”

9 Meneng minikagi dan, “Ikà egsagda kenami. Pengkey kenà ka tege dini, meneng mikagi ka peden diyà kenami aw eden se mepakay day inangen. Aw aneng-aneng no medaet se inangen day diyà kandan, labi pa medaet se inangen day diyà kamno.”

Sinegseg dan si Lot, aw migpedapag dan diyà te tetakep amon bàtan dan iyan. 10 Meneng inowang te didowa anghil se tetakep, aw ginakgak dan si Lot doton didalem te balay, aw tinakep dan se lelebangan. 11 Penga niyan, pineokit te tolos dan, ininang dan bota se kedita te otaw medapag te lelebangan, amon eked dan kità te lelebangan.

12 Minikagi se didowa anghil diyà ki Lot, “Aw doen menge kedomaan no dini, menge batà nikaw, ogangan nikaw, aw menge doma sakop nikaw mig-ogpà dini te lonsod seini, petekingi dan, aw kesayo kaw den, 13 so pegbàtan day den se lonsod seini. Dinineg te Timanem se insila kandan tepad te medaet eg-inangen dan, aw yan insogò kay din dini amon megbaet kay te kedita.”

14 Yan nesayo si Lot aw dimoton sikandin te salà te dowa batà din bayi, aw minikagi sikandin, “Ayas kaw den kesayo lekat dini, so pegbàtan den te Timanem se lonsod seini.”

Meneng eden dan aw kebawol din iyan.

15 Pegkeiselem niyan, ginallat te anghil si Lot, kagi dan, “Kegaen ka den. Petekingi den se esawa no aw dowa batà no laga, aw kadas kaw den amon eked kaw kesàbi te pegbaet te Timanem te lonsod seini.”

16 Meneng gayed pa sikandin mig-alà-alà. Penga niyan, so neidowan dan te Timanem, minawid se didowa anghil te belad i Lot aw belad te esawa din, aw didowa batà dan, aw inibing dan doton te lowà te lonsod. 17 Penga niyan, minikagi se anghil, “Kadas kaw den. Ikà niyo eglengag. Ikà niyo egsagked dini te baog. Meneng kadas kaw den doton te menge bontod amon eked kaw kegelà.”

18 Meneng minikagi si Lot, “Sir, eked a. 19 Pengkey ontò mèpiya se tabang niyo kanak, aw impelowà a niyo lekat te kededàtan, meneng kesàban a den te peg-igelà, aw matay a te eked a pa dateng doton te bontod. 20 Na, doen lonsod sida mebatog ko epetan so medapag iyan, aw deitek iyan ogpeanan. Pekedasi a bag doton. Ontò iyan deitek ogpeanan. Eked a kematay kidoen.”

21 Timaba se anghil, “Mepakay iyan. Mepakay diyà kanak se pinemoyò nikaw. Eked a pegbaet te lonsod sida. 22 Meneng kegaen kaw den kadas, so wedad meinang ko singed aw domateng kaw doton.”

Iningedanan se lonsod sìyan Soar (kelebadan niyan, deitek), so minikagi si Lot te deitek iyan.

23 Pegdateng i Lot doton te Soar, limibtak den se aldaw. 24 Tigkan indagdag te Timanem se esopri limegdeg lekat te langit doton te lonsod te Sodoma aw Gomora. 25 Pineokit kenyan, nebàtan se dowa lonsod sìyan aw kedita te doma ogpeanan kidoen te baog sìyan. Negelà se kedita te otaw mig-ogpà kidoen, aw nebàtan se kedita te tinemunun kidoen. 26 Meneng limingì se esawa i Lot te lonsod tinenanan dan, aw yan nebaloy sikandin asin.

27 Pegkeiselem niyan, limapos si Abraham doton te pemebongan pinemoyoan din diyà te Timanem. 28 Migpeatap-atap sikandin doton te Sodoma aw Gomora, aw doton te kebelad te baog sìyan, aw kinità din se ebel minolbo lekat te tanà, iling te ebel te dakel pogon. 29 Meneng pegbaet te Timanem te menge lonsod kidoen te baog sìyan inogpaan i Lot, mig-aneng-aneng se Timanem tepad ki Abraham, aw yan impelowà din si Lot amon eked sikandin kegelà sipat te menge doma otaw.

30 Nayan, so nelemitan si Lot meg-ogpà doton te Soar, minalin sikandin sipat te didowa batà din bayi doton te bontod, aw mig-ogpà dan doton te ilib. 31 Doen aldaw minikagi se batà din kakay diyà te adi din, “Migketemoay den se amay ta, aw wedad palos meama dini te keneyonan mengognan kenita amon megbatà ki. 32 Na, mèpiya aw lesingen ta sikandin, aw yan lomayok ki diyà kandin amon megbatà ki pineokit kandin.”

33 Pegkedelem niyan, linasing dan se amay dan, aw limayok se kakay diyà kandin. Meneng wedà peg-aneng-aneng si Lot kenyan, so ontò sikandin nelasing.

34 Pegkeiselem niyan, minikagi se kakay diyà te adi din, “Siak se limayok diyà ki Amà tidelem. Na, mèpiya aw todà ta sikandin lesingen kwani delem, aw sikona se lomayok diyà kandin amon didowa ki se megbatà pineokit kandin.”

35 Pegkedelem niyan, linasing dan heman se amay dan, aw limayok se adi diyà kandin. Wedà heman sikandin peg-aneng-aneng kenyan, so ontò sikandin nelasing. 36 Yan miglaman se didowa batà i Lot pineokit kandin. 37 Doen batà meama timebaw diyà te kakay, aw iningedanan din ki Moab (kelebadan niyan, lekat te amay). Neinang sikandin kemonaan te kedita te otaw diyà te pongan te Moab songkani. 38 Doen heman batà meama timebaw diyà te adi, aw iningedanan din ki Ben-ami (kelebadan niyan, batà te kemonaan). Neinang sikandin kemonaan te kedita te otaw diyà te pongan te Amoni songkani.