1 Nayan, doen todà bitil doton te Canaan. Kenà iyan onawa te bitil neokitan i Abraham. Dimoton si Isaac te tanà i Abimelec, selotan te menge tege Filisti doton te lonsod te Gerara. 2 Yan se dinotonan din, so tapay migpekità se Timanem diyà ki Isaac, aw migpunù sikandin, “Ikà egdoton te Ehipto. Peg-ogpà ka doton te tanà tedoan ko kamno. 3 Peg-ogpà ka dini, aw yan megtabang a kamno, aw mèpiya se ibegay ko diyà kamno. Ibegay ko se kedakel te tanà seini diyà kamno aw diyà te menge bowad-bowad nikaw, so tomanen ko se impakang ko diyà te amay no si Abraham. 4 Inangen ko ontò medita se bowad-bowad nikaw, iling te kedita te menge bitoen doton te langit. Ibegay ko diyà kandan se kedakel te tanà seini. Mèpiya se ibegay ko diyà te kedita te otaw te keneyonan pineokit te bowad-bowad nikaw. 5 Inangen ko iyan so timolò si Abraham kanak. Timolò sikandin te kedita te impunù aw intoladà ko diyà kandin.”

6 Yan mig-ogpà si Isaac doton te Gerara. 7 Peg-insà te menge meama kidoen tepad te esawa din, minikagi sikandin, “Etebay ko sikandin.”

Wedà sikandin ikagi te teleesawa dan, so nelemitan sikandin. Mig-aneng-aneng sikandin te imetayan sikandin te menge meama kidoen amon egawen dan si Rebecca, so ontò mèpiya se bawa din.

8 Pegkenamay-namay te peg-ogpà i Isaac kidoen te Gerara, dimelowang si Abimelec selotan te menge tege Filisti, aw kinità din si Isaac aw si Rebecca migpekelesay. 9 Yan impeangay din si Isaac, aw minikagi sikandin, “Esawa no kedì sikandin. Nengà lay minikagi ka te telekedowa kaw?”

Timaba sikandin, “So mig-aneng-aneng a te imetayan a aw mikagi a te esawa ko sikandin.”

10 Minikagi si Abimelec, “Medaet se ininang no diyà kenami, so simpana leyokan te sakop ko se esawa nikaw, detengan kay te pelumun te Timanem pineokit kamno.”

11 Penga niyan, migpunù si Abimelec diyà te kedita te sakop din, “Aw doen otaw meg-inang te medaet diyà te otaw seini aw esawa din, yan se imetayan.”

12 Te omay sìyan, nenanem si Isaac kidoen, aw minongo iyan te ginatos. Dakel se ginani din so mèpiya se imbegay te Timanem diyà kandin. 13 Gayed nedogangan se keyemanan din lamig ontò sikandin migkeyaman. 14 Ontò medita se karniro din, baka, aw allang din, aw yan se doun te miningà se menge tege Filisti kandin. 15 Yan se doun te binonbonan dan se kedita te sokian tapay binengbangan te menge sineligan te amay din si Abraham te wedà pa sikandin kematay.

16 Penga niyan, minikagi si Abimelec diyà ki Isaac, “Kesayo ka den lekat dini kenami, so neinang ka den beling labi magsen diyà kenami.”

17 Yan nesayo si Isaac, aw minalin doton te baog te Gerara, aw mig-ogpà sikandin kidoen. 18 Todà din impebangbang se menge sokian tapay impebangbang te amay din, so binonbonan iyan te menge tege Filisti penga te pegkematay i Abraham. Iningedanan i Isaac se menge sokian onawa te in-ingadan te amay din kenyan.

19 Nemangbang se menge sineligan i Isaac te kaling sokian doton te baog, aw doen wayeg niyan timebol. 20 Meneng migpedindilay se menge telediyaga tege Gerara aw menge telediyaga i Isaac, aw minikagi se menge tege Gerara, “Kenami se wayeg sìyan.”

Yan se doun te iningedanan i Isaac se sokian sìyan Esek (kelebadan niyan, dindil), so migpedindilay dan kidoen.

21 Penga niyan, nemangbang heman se menge sineligan din te doma sokian. Meneng migbolaw heman se tege Gerara tepad kenyan, aw yan iningedanan din se sokian sìyan Sitna (kelebadan niyan, keopal).

22 Minalin sikandin lekat kidoen, aw migpebangbang sikandin te sokian doton. Wedad migbolaw tepad kenyan, aw yan iningedanan din iyan Rehobut (kelebadan niyan, keombaan), so minikagi sikandin, “Doen den keombaan imbegay te Timanem diyà kenitadon, aw mèpiya den se peg-ogpà tadon dini.”

23 Dimeleg si Isaac lekat kidoen aw dimoton sikandin te Berseba. 24 Pegkedelem niyan, migpekità se Timanem diyà kandin, aw minikagi sikandin, “Siaken se Timanem egseligan te amay no si Abraham. Ikà egkelemitan, so egdomaan ta. Mèpiya se ibegay ko diyà kamno, aw inangen ko ontò medita se bowad-bowad nikaw, so yan se impakang ko diyà ki Abraham gayed timolò kanak.”

25 Mig-inang si Isaac te sonoganan te ayam-ayam ibegay diyà te Timanem, aw migsimba sikandin te Timanem kidoen. Mig-ogpà si Isaac kidoen, aw nemangbang se menge sineligan din te sokian.

26 Nayan, limaoy si Abimelec ki Isaac. Dimateng sikandin lekat te Gerara sipat te teleglawong din si Ahusa aw pengolo te menge sondalo din si Picol. 27 Minikagi si Isaac, “Kedengan neopal kaw diyà kanak, aw impekesayo a niyo. Yan nengà lay dimini kaw den kanak?”

28 Timaba dan, “Dimini kay so netegahan day den te gayed ka egtebangan te Timanem. Yan mig-aneng-aneng kay te mèpiya aw megpesepaay kidon. Ibeg day megpakang ka diyà kenami 29 te eked ka pegpeeleg kenami, iling te wedà kay palos pegpeeleg kamno. Mèpiya se ininang day diyà kamno, aw melinaw se pedowan tadon te pegkesayo nikaw. Netegahan day den te mèpiya se ipegbegay te Timanem diyà kamno.”

30 Impeinang i Isaac se dakel kànen, aw kimaen dan aw mininem dan. 31 Pegkeiselem niyan, migpesepaay dan. Penga niyan, impekesayo dan i Isaac te melinaw se pedowan te kedita dan.

32 Dalem te aldaw sìyan, dimateng se menge sineligan i Isaac, aw mig-indan dan diyà kandin tepad te sokian binengbangan dan. Minikagi dan, “Neapet day den se wayeg!”

33 Iningedanan i Isaac se sokian sìyan Seba, aw lamig songkani iningedanan se lonsod kidoen Berseba (kelebadan niyan, sokian te pakang).

34 Peg-apet te kepatan se omay i Esau, pinengognan din si Judita batà i Beeri tege Heti. Pinengognan din heman si Basimat batà i Elon tege Heti heman. 35 Medaet se peg-ogpà i Isaac aw si Rebecca tandà te eg-inangen te didowa ogangan dan sìyan.