1 Seini se indan tepad te menge bowad-bowad i Esau, doma ngadan din si Edom. 2 Nengognan si Esau te telo bayi mig-ogpà kidoen te Canaan, si Ada batà i Elon tege Heti, si Oholibama batà i Anas aw apò i Sibeon tege Hebi, 3 aw si Basimat batà i Ismael aw etebay i Nebaiot. 4 Si Elifas se batà i Esau timebaw diyà ki Ada. Si Reuel se batà din timebaw diyà ki Basimat. 5 Doen heman batà din timebaw diyà ki Oholibama si Jeus, si Jalam, aw si Coras. Yan se menge batà i Esau timebaw doton te Canaan.

6 Impetaking i Esau se kedita te esawa din, menge batà din, aw menge sakop din, aw inibing dan se kedita te ayam-ayam din aw kedakel te kedònan din inabat din doton te Canaan, aw nesayo dan lekat te kedowa din si Jacob. Minalin dan doton te sebad tanà mediyò lekat kidoen. 7 Minalin si Esau so kenà botong se tanà inogpaan dan si Jacob. Pelaban medita se ayam-ayam dan aw gayed dan megsebad. 8 Yan se doun te mig-ogpà si Esau doton te bontod kidoen te Edumea.

9 Seini se menge bowad-bowad i Esau kemonaan te menge tege Edumea. 10 Doen batà din meama si Elifas timebaw diyà ki Ada, aw si Reuel timebaw diyà ki Basimat. 11 Se menge batà meama i Elifas, yan si Teman, si Omar, si Sefo, si Gatam, aw si Kenas. 12 Doen heman doma esawa i Elifas si Timna, aw tinebawan sikandin i Amalec. Esawa i Esau si Ada se apò bayi te kedita dan. 13 Se menge batà meama i Reuel, yan si Nahat, si Seras, si Samas, aw si Misas. Esawa i Esau si Basimat se apò bayi te kedita dan.

14 Se menge batà meama i Esau timebaw diyà ki Oholibama batà i Anas aw apò i Sibeon, yan si Jeus, si Jalam, aw si Coras.

15 Seini se ngadan te menge bowad-bowad i Esau neinang datò. Se menge batà i Elifas penganay batà i Esau neinang datò, yan si Teman, si Omar, si Sefo, si Kenas, 16 si Coras, si Gatam, aw si Amalec. Yan se menge batà i Elifas tege Edumea neinang datò, aw si Ada se apò bayi te kedita dan. 17 Se menge batà i Reuel batà i Esau neinang datò, yan si Nahat, si Seras, si Samas, aw si Misas. Yan se menge batà i Reuel tege Edumea neinang datò, aw si Basimat se apò bayi te kedita dan. 18 Se menge batà i Esau timebaw diyà ki Oholibama neinang datò, yan si Jeus, si Jalam, aw si Coras. Yan se menge batà te esawa i Esau si Oholibama batà i Anas neinang datò. 19 Yan se menge bowad-bowad i Esau, doma ngadan din si Edom, neinang menge datò.

20 Seini se ngadan te menge batà meama i Seir tege Hori, aw mig-ogpà dan doton te Edumea. Si Lotan, si Sobal, si Sibeon, si Anas, 21 si Dison, si Eser, aw si Disan. Se menge batà i Seir, yan se menge datò te tege Hori mig-ogpà doton te Edumea.

22 Se menge batà meama i Lotan, yan si Hori aw si Heman. Si Timna se etebay i Lotan.

23 Se menge batà meama i Sobal, yan si Alban, si Manahat, si Ebal, si Sefo, aw si Onam.

24 Se menge batà meama i Sibeon, yan si Aias aw si Anas. Si Anas se kimità te selep meinit doton te kebigtilan te pegpeloyaw din te menge asno te amay din.

25 Se menge batà i Anas, yan se meama si Dison, aw bayi si Oholibama.

26 Se menge batà meama i Dison, yan si Hemdan, si Esban, si Etran, aw si Seran.

27 Se menge batà meama i Eser, yan si Bilhan, si Saaban, aw si Acan.

28 Se menge batà meama i Disan, yan si Os aw si Aran.

29 Se menge datò te menge tege Hori, yan si Lotan, si Sobal, si Sibeon, si Anas, 30 si Dison, si Eser, aw si Disan. Yan se menge datò te tegsebad-sebad pongan te tege Hori mig-ogpà doton te Seir.

31-39 Seini se ngadan te menge selotan migpetibos-tibosay te peglowan dan doton te Edumea te wedad pa selotan limowan diyà te menge bowad-bowad i Israel.

40 Seini se ngadan te menge bowad-bowad i Esau neinang datò kidoen te tegsebad-sebad pongan dan aw ogpeanan dan. Si Timna, si Albas, si Jetet, 41 si Oholibama, si Elas, si Pinon, 42 si Kenas, si Teman, si Mibsar, 43 si Magdiel, aw si Iram. Yan se menge datò te tegsebad-sebad ogpeanan kidoen te Edumea. Si Edom (doma ngadan din si Esau) se kemonaan te kedita te tege Edumea.