1 Menge kedowa ko, mèpiya aw pilabok se otaw meibeg meinang menenoladà, so netegahan niyo te kenà meagka se pegtoladà te kagi te Timanem. Simpana medaet se eg-inangen day egtoladà, labi pa mebegat se pelumun te Timanem kenami. 2 Melikit se kedita tadon eg-inang te medaet aw eg-ikagi te medaet. Meneng aw wedad palos medaet ikegiyen te otaw, biyasa sikandin egpengibing te kandin pegkeotawun, aw eked peg-inang te salà. 3 Pengkey eden se kedakel te kodà, meneng meibing iyan te otaw pineokit te deitek kakang isawol diyà te bahà. 4 Na, eneng-enengi niyo heman se bapor. Pengkey ontò iyan dakel, aw pengkey mebandes se kelamag, meneng pineokit te deitek bensalan, mepakay iyan meibing te otaw pengkey kenan se ibeg din peselowan. 5 Iling heman kenyan se dilà te otaw, so pengkey deitek iyan diyà te lawa tadon, meneng dakel se meinang pineokit te dilà tadon. Eneng-enengi niyo ini. Pengkey medita se kayo doton te kegolangan, meneng mesonog se kedakel niyan te deitek baga. 6 Iling heman te apoy se kagi tadon, so aw eked iyan imendayi, ontò iyan mekedaet kenitadon. Aw medaet se kagi tadon, yan se mekedaet te kenitadon pegkeotawun, aw yan se mekesamok te kenitadon aneng-aneng dalem te peg-ogpà tadon dini te keneyonan. Kilot se eglekatan te medaet kagi.

7 Doen medita kemolò te menenanap aw manok pigkagnek te otaw, pengkey menge menenanap eg-ogpà diyà te tanà aw dagat. 8 Meneng wedad palos otaw mekesagkà te dilà te otaw, so gayed egpeketagad se dilà mikagi te medaet, iling te memokan gayed egpeketagad tomongkà. 9 Pineokit te dilà tadon, mekeduyun kidon te Timanem Amay. Meneng pineokit heman te dilà tadon, meketindaet kidon te doma otaw, pengkey ininang te Timanem iling kandin. 10 Lekat te sebad bahà lomowà se kagi mèpiya aw medaet. Menge kedowa ko, eked inì kepakay inangen. Keilangan ontò mèpiya se kagi tadon eked sengedi te medaet, 11 so kenà egtebol se wayeg mèpiya aw mepait lekat te sebad selep. 12 Wedad heman kayo igira egpongo te olibo. Wedad heman belagen te paras egpongo te igira. Wedad heman wayeg seloken diyà te dagat.

13 Aw doen otaw kidoen kenyo biyasa egtoladà, mèpiya aw ipekità din iyan pineokit te mèpiya inang din. Aw metinuud sikandin, yan ketegahan te ontò sikandin biyasa. 14 Meneng aw eg-ingà aw egpelangkaw-langkaw diyà te doma otaw, eked kepakay aw mikagi te biyasa, so migkebolalaw sikandin. 15 Kolang se kebiyasa te otaw iling kenyan, so kenà iyan lekat te Timanem, meneng lekat iyan te medaet ibeg te otaw dini te keneyonan egtaking te menge bosaw. 16 Pengkey sinu se eg-ingà aw megpelangkaw-langkaw diyà te doma, yan se otaw egsamok aw eg-inang te medita kemolò te medaet. 17 Meneng se otaw doen kebiyasa lekat te Timanem, yan se otaw kenà eg-inang te medaet, kenà egsamok, gayed mèpiya se pedowan din, kenà metugul, gayed egkeido aw egpenabang te doma, kenà egdowa-dowa, meneng melobos se pedowan din. 18 Mèpiya se detengan te otaw gayed eg-inang te kelinaw.