1 Doen otaw ngadan din si Nicodemo. Sikandin se sebad diyà te menge kelengkawan te menge Judiyo, aw migpelenged sikandin te menge Parisiyo. 2 Dimoton sikandin ki Jesus te delem, aw minikagi, “Sir, netegahan day den te insogò ka te Timanem amon megtoladà kenami, so wedad otaw mekebatog meg-inang te kepelahan iling te ininang no den singed aw doen tolos ibegay te Timanem kandin.”

3 Minikagi si Jesus, “Eneng-enengi se kagi ko kamno. Aw eked todà tebaw se otaw, eked sikandin kesakop diyà te peglowan te Timanem.”

4 Minikagi si Nicodemo, “Meneng eked kepakay aw tomebaw se obanen, so eked pekelikò doton te getek te inay din amon todà tomebaw.”

5 Minikagi si Jesus, “Eneng-enengi se kagi ko kamno. Aw eked tebaw se otaw pineokit te wayeg aw pineokit heman te Espiritu Santo, eked sikandin kesakop diyà te peglowan te Timanem. 6 Se tomebaw olò diyà te otaw, otaw heman iyan. Meneng se tomebaw pineokit te Espiritu Santo, yan se otaw ogpaan te Espiritu Santo. 7 Ikà egkepela diyà te inikagi ko kamno te keilangan todà kaw tomebaw. 8 Egkedog se kelamag egpesalo pengkey kenan. Meneng pengkey egdinegen no se logo-logo niyan, eked no ketegahi aw kenan iyan lekat aw kenan pesalo. Iling heman kenyan se pegtebaw te otaw pineokit te Espiritu Santo.”

9 Mig-insà si Nicodemo, “Menonen se peg-inang kenyan?”

10 Timaba si Jesus, “Nepela a, so pengkey sikona se meistro te menge bowad-bowad i Israel, meneng wedà no pa iyan kelebeti. 11 Eneng-enengi se kagi ko kamno. Eg-ikegiyen day se netegahan day, aw ipeg-indan day se benal kinità day, meneng wedà kaw pemenal te inikagi day. 12 Aw eked kaw pemenal te in-indan ko tepad te meinang dini te tanà, eked kaw heman pemenal aw meg-indan a kenyo tepad te meinang doton te langit. 13 Wedad palos otaw nenayit doton te langit, meneng olò siak Timanem Migpekeotaw se timenà lekat te langit.

14 “Gebii te pegkegelà te menge Judiyo lekat te pegtongkà te menge memokan kidoen te kebigtilan, ininang i Moises se memokan lekat te galang, aw insawol din iyan kidoen te kayo intollok amon eked kematay se otaw tomengteng kenyan. Iling heman kenyan, siak Timanem Migpekeotaw se isawol kidoen te kayo itollok. 15 Meinang iyan amon kebegayan te kaling pedowan wedad temanan se kedita te otaw memenal kanak.”

16 Ontò nedekelan te Timanem te pedowan se kedita te otaw, aw yan se doun te insogò din se Batà din temisa amon eked pelumuni se kedita te otaw memenal kandin, meneng begayan dan te kaling pedowan wedad temanan. 17 Insogò te Timanem se Batà din dini te keneyonan kenà amon ipelumun din se otaw, meneng insogò din amon megpelowà te otaw.

18 Aw memenal se otaw diyà te Batà te Timanem, eked dan pelumuni te Timanem. Meneng aw eked dan pemenal, netegahan den te metoman dan ipelumun, so wedà dan pemenal diyà te Batà te Timanem temisa. 19 Seini se doun te ipelumun dan. Pegdateng te iningedanan Lowa dini te keneyonan, neibeg dan te kengitngitan aw kimulu dan te kelowahan, so medaet se eg-inangen dan. 20 Se otaw eg-inang te medaet, yan se eked keibeg te kelowahan, aw megpekediyò dan kidoen te kelowahan amon eked ketegahi se inang din medaet. 21 Meneng se otaw egtaking te kebenalan, yan se megpedapag diyà te kelowahan, amon ketegahan te eg-inangen din se ibeg te Timanem.

22 Penga niyan, dimoton si Jesus aw menge tinoledaan din te probinsya te Judiya. Mig-ogpà dan kidoen aw migbonyag. 23-24 Migbonyag heman si Juan Memonyagay so wedà pa kelebosowi. Migbonyag sikandin kidoen te Inon medapag te Salim, so dakel se wayeg kidoen. Dimoton se menge otaw kandin aw binonyagan din dan.

25 Doen menge tinoledaan i Juan aw sebad Judiyo migpedindilay tepad te pegpelinis. 26 Dimoton dan ki Juan aw minikagi, “Sir, se doma no kedengan doton dipag te Jordan, sìyan in-indan no, yan se egpemonyag den ekon heman, aw medita den se otaw limengà te pegtaking dan kamno aw timaking den dan diyà kandin.”

27 Minikagi si Juan, “Wedad mebatog te otaw singed aw isogò sikandin te Timanem. 28 Netegahan niyo den te minikagi a te kenà ko se Misiyas megpelowà kenyo. Meneng insogò a amon megpetagad a te pegdateng din. 29 Se meama peipiden, yan se tekingan te bayi. Meneng se sigalak te meama peipiden, yan se megtagad kandin aw menenalan heman kandin, aw meluba se pedowan din te pegdineg din te kagi te sigalak din peipiden. Iling a heman kenyan, so nesikop den se keluba te pedowan ko te pegdineg ko te medita se otaw egtaking ki Jesus. 30 Keilangan megkedakel se dengeg i Jesus, aw metostos se kanak dengeg.”

31 Se insogò dini lekat te langit, yan se ontò melangkaw diyà te kedita. Meneng se otaw dini te tanà, yan se otaw lekat dini te tanà, aw lekat heman te tanà se ipegtoladà din. Meneng se insogò dini lekat te langit, yan se ontò melangkaw diyà te kedita. 32 Eg-indan sikandin te benal kinità din aw dinineg din kidoen te langit, meneng pilabok se egpenenalan te kagi din. 33 Meneng se otaw memenal te kagi din, yan se otaw megpetaga-taga te benal se kagi te Timanem. 34 Eg-ikagi se insogò te Timanem te kagi lekat te Timanem, so tigkan imbegay te Timanem se Espiritu Santo diyà kandin. 35 Ontò dakel se pedowan te Timanem Amay diyà te Batà din, aw insalig din diyà kandin se peglowan diyà te kedita. 36 Se otaw memenal diyà te Batà te Timanem, yan se otaw doen kaling pedowan wedad temanan. Meneng se otaw eked tolò te kagi te Batà te Timanem, yan se otaw eked begayi te kaling pedowan, meneng detengan dan te pelumun te Timanem te wedad temanan.