1 Nayan, dalem te peglowan i Cesar Augusto doton te Roma, doen impunù din te keilangan megpelista se kedita te otaw nesakop te gobirno te Roma. 2 Yan se tagnà pegpelista te ngadan, aw ininang iyan dalem te peggobirnador i Cirenio kidoen te Sirya. 3 Migsiolì se kedita te otaw doton te lonsod te kandan kemonaan amon megpelista dan te ngadan.

4 Nayan, se selotan gebii si David, yan se kemonaan i Jose, aw yan se doun te nesayo si Jose lekat te Nasarit sakop te probinsya te Galiliya aw dimoton te probinsya te Judiya taman te lonsod te Bitlihim, so yan se lonsod tinikedowan i David. 5 Yan se dinotonan te didowa dan si Maria amon megpelista si Jose. Mebedes den se salà din si Maria. 6 Dalem pa te kidoen dan te Bitlihim, dimateng se aldaw te pegtebaw te batà din. 7 Yan timebaw se penganay batà din meama. Linempingan din se batà, aw impeibat din diyà te kènanan te ayam-ayam kidoen te kelokob, so wedad keombaan dan doton te balay eg-ogpaan te mepanaw.

8 Nayan, medapag te lonsod te Bitlihim, doen menge telediyaga migpolaw se egtonggò te menge ayam-ayam karniro doton te tanà doen sagbet. 9 Pegketà migpekità se anghil insogò te Pengolo diyà kandan, aw doen minanyag diyà kandan lekat te Pengolo. Ontò dan nelemitan. 10 Meneng minikagi se anghil, “Ikà niyo egkelemitan. Na, doen den ikegiyen ko diyà kenyo aw ontò ini mèpiya, so mekebegay te keluba diyà te kedita niyo. 11 Doen timebaw gina seini kidoen te Bitlihim. Sikandin se Pengolo si Cristo megpelowà kenyo. 12 Seini se pengilala amon ketegahan niyo te benal se inikagi ko kenyo. Kitaen niyo se batà linempingan aw impeibat kidoen te kènanan te ayam-ayam.”

13 Pegketà kinità dan se ontò medita anghil lekat te langit timaking kandin. Dimuyun dan te Timanem, kagi dan, 14 “Iduyun tadon den se Timanem doton diatas te langit. Begayan din te kelinaw te pedowan se otaw egkelubahan din dini te tanà.”

15 Peg-olì te menge anghil doton te langit, gayed migpebelaw-belaway se telediyaga, kagi dan, “Domoton kidon den te Bitlihim amon kitaen tadon se neinang seini, sìyan impetaga-taga te Pengolo diyà kenitadon.”

16 Penga niyan, mig-ayas dan doton aw kimità dan ki Maria aw si Jose, aw kinità dan heman se batà impeibat kidoen te kènanan te ayam-ayam. 17 Pegkità dan kandan, in-indan dan se inikagi te anghil tepad te batà sìyan. 18 Nepela se kedita te otaw dimineg te in-indan te menge telediyaga. 19 Meneng si Maria, insawol din se kedita te kagi dan diyà te pedowan din, aw gayed mig-aneng-aneng kenyan. 20 Penga niyan, minolì se telediyaga, aw gayed dan induyun se Timanem tandà te kedita te dinineg aw kinità dan, so netoman den se inikagi te anghil kandan.

21 Pegdateng te ikewalo te aldaw lekat te pegtebaw din, tinolì sikandin aw iningedanan ki Jesus, so yan se ngadan inikagi te anghil te wedà pa peglaman se inay din.

22 Dimateng se aldaw, dimoton si Jose aw si Maria te Jerusalem amon tomolò dan te punù ingkeliwat i Moises tepad te bayi kaling egtebawan. Inibing dan heman se batà si Jesus amon ibegay sikandin diyà te Pengolo, 23 so doen punù impekeliwat te Pengolo te keilangan ibegay diyà te Timanem se batà meama tagnà tomebaw. 24 Dimoton dan te dakel simbahan amon memegay dan te ibowang diyà te Timanem, so timolò dan te punù impekeliwat te Pengolo te keilangan ibegay se didowa tokmo aw kenà didowa selepati dedeitek pa.

25 Nayan, doen sebad tege Jerusalem si Simeon. Eg-inang sikandin te metòlid, aw egtolò heman te Timanem. Gayed sikandin egpeliman te megpelowà se Timanem te menge bowad-bowad i Israel. Eg-ogpaan sikandin te Espiritu Santo, 26 aw impetaga-taga te Espiritu Santo kandin te eked sikandin kematay singed aw onà din kitaen se Misiyas isogò te Pengolo. 27 Inibing te Espiritu Santo si Simeon doton te dakel simbahan kidoen te Jerusalem. Aldaw sìyan, inibing heman si Jesus te amay aw inay din doton te dakel simbahan amon tomolò dan te punù ingkeliwat i Moises tepad te deitek batà. 28 Pegkità i Simeon kandan, inabat din se batà aw inolid din. Penga niyan, dimuyun sikandin te Timanem, kagi din, 29 “Pengolo ko, mepakay den diyà kanak aw meg-etod a aw matay a den, so netoman den se pakang no kanak, 30 so ontò a den kimità te insogò no megpelowà kenami. 31 Sikandin se ipekità no diyà te kedita te otaw. 32 Sikandin se mekelowa te kengitngit kidoen te pedowan te kedita te otaw kenà Judiyo, aw sikandin se megpetaga-taga diyà kenami menge bowad-bowad i Israel pinemallì no te ontò ka melangkaw.”

33 Nayan, se amay aw inay te batà, ontò dan nepela te inikagi i Simeon tepad te batà dan si Jesus. 34 Migtawal-tawal si Simeon te ketebangan dan te Timanem, aw minikagi sikandin diyà te inay te batà si Maria, “Na, meinang se batà seini pengilala kitaen te medita bowad-bowad i Israel. Aw komità dan kandin, medita se otaw komulu kandin aw ipelumun dan, meneng medita se doma otaw somalig diyà kandin aw mekelowà dan lekat te pelumun, 35 so ipetaga-taga din aw eden se aneng-aneng te kedita te otaw. Pengkey sikona, Maria, ontò ka kelimahan, so iling te dogsengen se posong nikaw.”

36-37 Doen heman bayi egkeliwat te kagi te Timanem kidoen te dakel simbahan ngadan din si Ana. Si Panuel se ngadan te amay din, sakop te pongan iningedanan Aser, so si Aser se kemonaan dan. Nengognan si Ana te pito se omay, aw penga niyan nebalo. Ontò den lokes, so kewelowan teg epat se omay din. Egdoton sikandin te dakel simbahan, so egsimba sikandin te aldaw aw delem, aw migpowasa, aw migtawal-tawal. 38 Dalem pa te minikagi si Simeon diyà ki Maria, dimateng si Ana kidoen kandan, aw migpesiontong diyà te Timanem. Mig-indan heman sikandin tepad te batà diyà te kedita te otaw egpeliman te megpelowà se Timanem te menge Judiyo.

39 Nayan, pegtoman i Jose aw si Maria te kedita te punù te Pengolo ingkeliwat i Moises tepad te batà kaling timebaw, minolì dan doton te lonsod te Nasarit kidoen te probinsya te Galiliya. 40 Timilles se batà, aw migketesan, aw migkebiyasa, so egtebangan sikandin te Timanem.

41 Nayan, kelikit te omay, gayed egdoton se amay aw inay i Jesus te Jerusalem amon tomanod dan te Pista te Pegpelowà. 42 Sagwa sempolò teg dowa se omay i Jesus, nemista dan doton te Jerusalem, so yan se gayed dan eg-inangen. 43 Pegkepenga te pista, minolì dan, meneng mig-ogpà pa si Jesus kidoen te Jerusalem. Meneng wedà iyan ketegahi te amay aw inay din, 44 so eden dan aw timaking sikandin te menge doma dan kidoen te dalan. Minipanaw dan lamig meapon. Pegkeapon, nengemahà dan kandin kidoen te menge kedomaan dan aw menge doma otaw minipanaw. 45 Meneng wedà dan kitai. Penga niyan, limikò dan doton te Jerusalem amon mengemahà dan kandin. 46 Te iketelo te aldaw, kinità dan sikandin kidoen te dakel simbahan doton te Jerusalem. Dimoma sikandin te menge menenoladà, aw nenenalan sikandin diyà kandan aw mig-insà heman diyà kandan. 47 Nepela se kedita te otaw dimineg te inikagi din, so ontò biyasa, aw mèpiya heman se intaba din. 48 Pegkità te amay aw inay din kandin, ontò dan nepela. Minikagi se inay din, “Atò, eked kepakay se ininang no diyà kenami, so ontò kay netetana, aw nengemahà kay kamno.”

49 Minikagi si Jesus, “Nepela a so pinengemahà a niyo. Nepela a so wedà niyo ketegahi te keilangan dini a te balay te Amay ko.”

50 Meneng wedà dan kelebeti se kedegdagan te inikagi din diyà kandan.

51 Penga niyan, timaking si Jesus kandan aw minolì doton te Nasarit, aw timolò te amay aw inay din. Si Maria, insawol din se kedita niyan diyà te pedowan din aw mig-aneng-aneng kenyan. 52 Timilles si Jesus aw migkebiyasa. Labi pa nelubahan te Timanem aw otaw.