1 Nayan, minokit si Jesus kidoen te lonsod te Jeriko. 2 Doen tege Jeriko ngadan din si Sakeo. Sikandin se pengolo te kedita te iskribinti aw ontò meyaman. 3 Ibeg din tomengteng ki Jesus, meneng wedà din kebatog, so medita se otaw netipon, aw ontò sikandin mebabà otaw. 4 Na, kimagnan sikandin doton te monà kidoen te dalan okitan i Jesus, aw nenayit diyà te dakel kayo amon komità ki Jesus. 5 Pegdateng i Jesus doton te kayo pinenitan i Sakeo, limengag sikandin aw minikagi, “Sakeo, ayas ka tenà, so keilangan meg-ogpà a kidoen te balay no te aldaw seini.”

6 Ayas timenà si Sakeo, aw inibing din si Jesus doton te balay din, aw migsagman kandin, aw neluba se pedowan din. 7 Meneng simila se kedita te otaw kimità kenyan, kagi dan, “Medaet iyan, so midegà sikandin kidoen te balay te otaw nelegeb te salà.”

8 Migpedapag si Sakeo diyà ki Jesus aw minikagi, “Pengolo, seini se inangen ko. Ibegay ko se ketengà te kedònan ko diyà te menge otaw nelimahan. Aw migleges a te otaw memegay kanak te kwarta, yan se lintapan ko te mekeepat.”

9 Minikagi si Jesus, “Aldaw seini, mekelowà ka den lekat te salà, so nemenal ka den kanak iling te pegpemenal i Abraham gebii. 10 Dimini a te tanà Timanem Migpekeotaw amon tewalen ko se otaw nelegeb te salà, aw ipelowà ko dan.”

11 Gayed egpenenalan se kedita te otaw diyà ki Jesus, aw mig-indan sikandin te tegdeyanan, so medapag den sikandin te Jerusalem, aw eden dan aw agpet den megtebò se Timanem lomowan diyà kandan. 12 Yan se doun te minikagi sikandin, “Doen melangkaw otaw dimoton te mediyò ogpeanan amon inangen sikandin selotan te lonsod din, aw penga niyan molì amon lomowan. 13 Te wedà pa kesayo, tinawal din se sempolò sineligan din, aw imbegay din diyà kandan se kwarta, sebad gatos diyà te teg sebad-sebad kandan. Minikagi sikandin, ‘Seini se kwarta gemiten niyo te pegnigosyo dalem te iyogan ko.’ 14 Nayan, se doma otaw eg-ogpà kidoen te lonsod sìyan, wedà dan keibeg aw meinang sikandin selotan lomowan diyà kandan. Penga te pegkesayo din, doen otaw insogò dan mikagi diyà te gobirno te eked dan keibeg aw otaw sìyan se lomowan diyà kandan. 15 Meneng gayed sikandin neinang selotan. Peg-olì din, impeangay din se sempolò sineligan din, sìyan binegayan din te kwarta, so ibeg din ketegahan aw pila se kedakel te gamad dan. 16 Dimateng se tagnà aw minikagi, ‘Sir, se sebad gatos imbegay no diyà kanak, neinang iyan sebad melalan.’ 17 Minikagi se selotan, ‘Mèpiya se ininang nikaw. Pengkey deitek se imbegay ko diyà kamno, meneng keseligan ka, aw yan se doun te inangen ta den gobirnador lomowan diyà te sempolò lonsod.’ 18 Dimateng se ikedowa sineligan aw minikagi, ‘Sir, se sebad gatos imbegay no diyà kanak, neinang iyan lima gatos.’ 19 Minikagi se selotan, ‘Inangen ta den gobirnador lomowan diyà te lima lonsod.’ 20 Penga niyan, doen sineligan dimateng aw minikagi, ‘Sir, iolì ko den diyà kamno se sebad gatos imbegay no diyà kanak, so intagò ko iyan diyà te kelobaw aw in-eles ko. 21 Wedà ko iyan gemiti, so nelemitan a kamno, so mebolot ka otaw. Eg-ebaten no se wedà no kepegodi, aw eglegeniyen no se intanem te doma otaw.’ 22 Minikagi se selotan, ‘Ontò medaet se ininang nikaw. Pineokit te inikagi no sìyan, impetaga-taga no den te keilangan ipelumun ta. Minikagi ka te ontò a mebolot, so eg-ebaten ko se wedà ko kepegodi, aw eglegeniyen ko se intanem te doma otaw. Aw netegahan no iyan, 23 keilangan ipebeles no peden se kwarta ko diyà te doma otaw amon iolì iyan diyà kanak te peg-olì ko sipat batà niyan.’ 24 Penga niyan, minikagi se selotan diyà te menge doma otaw kidoen, ‘Ebati niyo se sebad gatos imbegay ko diyà kandin, aw begayi niyo iyan diyà te otaw doen sebad melalan.’ 25 Meneng minikagi dan, ‘Pengolo, eked iyan kepakay, so tapay den doen sebad melalan diyà kandin.’ 26 Timaba se selotan, ‘Penenalan kaw te kagi ko. Se otaw egkeseligan, yan se begayan ko te labi pa dakel. Meneng se otaw kenà egkeseligan, yan se ebatan ko te imbegay ko diyà kandin. 27 Meneng labi pa medaet se pelumun ko diyà te menge poon ko, sìyan wedà keibeg te peglowan ko diyà kandan. Ibingi niyo dan dini kanak, aw imetayi niyo se kedita dan.’ ”

28 Penga te peg-ikagi i Jesus kenyan, nekeonà sikandin te doma otaw pesalo doton te Jerusalem. 29 Pegkedapag din kidoen te lonsod te Bitpahi aw Bitanya doton te ongan te bontod te Olibo, insogò din se dowa tinoledaan din, 30 kagi din, “Onà kaw doton te lonsod sida peselowan tadon. Aw domateng kaw, ketelaan niyo se nati te kodà. Iniketan iyan, meneng wedà iyan lumun kesekayi te otaw. Lebadi niyo, aw ibingi niyo dini. 31 Aw doen otaw meg-insà kenyo te nengà lay linebad niyo iyan, ikegihi niyo te keilangan sekayan iyan te Pengolo niyo.”

32 Nesayo se didowa dan insogò din, aw netelaan dan iyan iling te inikagi din diyà kandan. 33 Peglebad dan te lobid in-iket te nati, mig-insà se tig-apò, “Nengà lay linebad niyo iyan?”

34 Timaba dan, “Keilangan sekayan iyan te Pengolo day.”

35 Penga niyan, inibing dan se nati doton ki Jesus. Menge saol dan se in-ampal dan diyà te getan te nati, aw impesakay dan si Jesus. 36 Pegsakay din, inladlad te menge doma otaw se saol dan doton te dalan peselowan din, so yan se ketanem dan aw segmanen dan se otaw meinang selotan.

37 Pegkedapag i Jesus te lonsod te Jerusalem, te wedà pa topang te bontod te Olibo, migtebò se kedita te otaw timaking kandin dimuyun te Timanem te dakel se kagi dan. Ontò dan neluba aw migpesiontong dan diyà te Timanem so medita se kepelahan ininang i Jesus tapay dan kinità. 38 Migpegais dan, “Iduyun se Selotan seini insogò te Pengolo tadon Timanem. Begayan kidon din te kelinaw te pedowan lekat te langit. Iduyun den se Timanem.”

39 Doen heman menge Parisiyo timaking ki Jesus, aw minikagi dan diyà kandin, “Sir, segdahi se peg-ikagi dan kenyan.”

40 Meneng minikagi si Jesus, “Penenalan kaw kanak. Simpana mepenek se menge otaw seini, metoman somelilin kandan se menge bato megpegais aw domuyun kanak.”

41 Pegkedapag i Jesus te lonsod te Jerusalem, kinità din iyan aw migkelag tandà te keido din te otaw eg-ogpà kidoen. 42 Minikagi sikandin, “Mekelelayò kaw tege Jerusalem. Ibeg ko peden mekeabat kaw den te kelinaw te pedowan. Meneng wedà niyo kitai se keokit niyan. 43 Metoman kaw pa kelimahan, so lomibed se menge sondalo te poon niyo kidoen te lonsod niyo, aw ontò dan megbangan kenyo amon eked kaw palos pekelowà. 44 Imetayan kaw dan, aw ontò dan heman pegbàtan se kedakel te lonsod niyo aw gobalen dan heman se kedita te balay niyo. Yan se metoman domateng diyà kenyo so wedà niyo ketegahi te seini se aldaw te pegpelowà te Timanem kenyo.”

45 Pegdateng i Jesus doton te Jerusalem, dimoton sikandin te dakel simbahan, aw impekadas din se kedita te otaw egpemeligyà te ayam-ayam kidoen te dowangen niyan. 46 Minikagi sikandin, “Doen kagi te Timanem impesolat din gebii,

47 Migtoladà si Jesus kidoen te dakel simbahan te Jerusalem te kelikit te aldaw. Meneng se kedita te pengolo te simbahan, aw menenoladà te punù ingkeliwat i Moises, aw menge dakel otaw, miglalang dan te imetayan dan si Jesus. 48 Meneng wedà dan peketoman, so ontò egpenenalan se kedita te otaw diyà kandin.