1 Meneng pegkeiselem te Linggo, limapos se menge bayi nengibing te metinadeg integilan dan, aw dimoton dan te linebengan ki Jesus. 2 Pegdateng dan doton, kinità dan se lebeng neowang, so tapay den nekelid se dakel bato insampeng. 3 Peg-awop dan diyà te lebeng, kinità dan te wedad den lawa i Jesus kidoen. 4 Migkebulung dan aw eden se neinang. Penga niyan, kinità dan se didowa anghil kidoen, aw ontò mepotì se penenaktun dan. 5 Timikelong se menge bayi, so ontò dan nelemitan. Minikagi se menge anghil, “Ikà niyo egpengemahà te otaw neantay lekat te nematay dini te lebenganan. 6 Wedad sikandin dini, so neantay den lekat te nematay. Eneng-enengi niyo se inikagi din diyà kenyo kedengan dalem te pegtoladà din kidoen te Galiliya. 7 Inikegiyan kaw din te keilangan ibegay sikandin Timanem Migpekeotaw diyà te belad te menge otaw nelegeb te salà amon imetayan dan sikandin ilansang diyà te kros, aw penga niyan, meantay sikandin lekat te nematay te iketelo te aldaw.”

8 Yan neeneng-enengan dan te yan se inikagi i Jesus diyà kandan. 9 Penga niyan, minolì dan, aw mig-indan dan te kedakel niyan diyà te sempolò tegusà tinoledaan i Jesus aw diyà te menge doma dan kidoen. 10 Se menge bayi sìyan, yan si Maria tege Magdala, si Juana, si Maria inay i Santiago, aw menge bayi doma dan. Peg-indan dan kenyan diyà te menge sogounun i Cristo, 11 wedà dan pemenal te neantay den si Jesus, so eden dan aw kenà benal se inikagi dan. 12 Meneng kimagnan si Pedro pesalo doton te lebeng. Pegdateng din doton, simelib sikandin aw timengteng doton didalem. Kinità din olò se sapot tapay inggakes diyà te lawa, meneng wedad lawa kinità din. Penga niyan, minolì sikandin gayed mig-aneng-aneng tepad te neinang, so nepela sikandin.

13 Te aldaw sìyan, doen didowa tinoledaan i Jesus minipanaw pesalo doton te Imaos, sebad lonsod menge sempolò tegusà kilomitro lekat te Jerusalem. 14 Gayed dan migpebelaw-belaway tepad te kedita te neinang ki Jesus. 15 Dalem pa te pegpebelaw-belaway dan, migpedapag si Jesus aw migdoma kandan. 16 Pengkey kinità dan sikandin, meneng wedà dan kilala kandin. 17 Peg-ipanaw dan, minikagi si Jesus, “Eden lay se egbelaw-belewayen niyo gina?”

Simagked se didowa dan aw ontò nelidò se pedowan dan. 18 Penga niyan, timaba se sebad si Cleopas, kagi din, “Tay law, elew. Nepela a, so pengkey gimemaw ka doton te Jerusalem, meneng wedà ka kedì ketaga-taga aw eden se neinang kidoen te menge aldaw seini.”

19 Minikagi sikandin, “Eden lay se neinang kidoen?”

Minikagi dan, “Doen telekeliwat te kagi te Timanem ngadan din si Jesus tege Nasarit. Insogò sikandin te Timanem, aw ontò mèpiya se ininang din aw inikagi din kinità te kedita te otaw. 20 Meneng se menge pengolo te simbahan aw menge obanen te Judiyo, impedakep dan sikandin te gobirno, aw penga niyan inimetayan dan sikandin inlansang diyà te kros. 21 Tapay kay migpeliman te sikandin se megpelowà te menge bowad-bowad i Israel. Meneng inimetayan dan sikandin te netelowan pa. 22 Meneng pengkey nematay sikandin, nepela kay, so doen menge kedomaan day bayi limapos doton te lebeng din gina iselem, 23 meneng wedad lawa din kinità dan kidoen. Peg-olì dan, mig-indan dan diyà kenami te doen menge anghil migpekità diyà kandan, aw minikagi dan ekon heman te neantay den si Jesus lekat te nematay. 24 Doen menge doma day dimoton heman te lebeng din, aw kinità dan te benal se in-indan te menge bayi. Meneng wedà dan kitai si Jesus.”

25 Penga niyan, minikagi si Jesus, “Tay law. Nepela a kenyo, so wedà kaw pa pemenal te kedita te inikagi te menge telekeliwat te kagi te Timanem gebii. 26 Nepela a so wedà niyo ketegahi te eked lowan se Misiyas singed aw onà sikandin imetayan iling te neinang den seini.”

27 Penga niyan, miglebad-lebad si Jesus diyà kandan te kedita te insolat kidoen te kagi te Timanem tepad te pegkeotawun din, lekat te insolat i Moises aw kidoen te insolat te kedita te telekeliwat te kagi te Timanem gebii.

28 Pegkedapag dan doton te lonsod dinotonan te didowa tinoledaan sìyan, domeleg peden si Jesus. 29 Meneng ontò dan sikandin tinemengan, kagi dan, “Idegà ka den dini kenami, so ontò den meapon aw agpet den delem.”

Penga niyan, timaking si Jesus kandan. 30 Peg-iyambong dan, inabat din se pan, aw migpesiontong sikandin diyà te Timanem, aw binelà-belà din, aw imbegay din diyà kandan. 31 Penga niyan, kinilala den dan te sikandin si Jesus. Meneng pegketà, migkewedad sikandin kidoen. 32 Migpebelaw-belaway dan, “Yan kedì se doun te neantag se pedowan ta te peg-ikagi din diyà kenita kidoen te dalan, aw peglebad-lebad din te kagi te Timanem diyà kenita.”

33 Penga niyan, nesayo dan aw limikò dan doton te Jerusalem. Pegdateng dan doton, tapay netipon se sempolò tegusà tinoledaan i Jesus aw menge doma dan. 34 Minikagi se otaw tapay netipon, “Ontò benal neantay se Pengolo lekat te nematay, so migpekità sikandin diyà ki Simon.”

35 Penga niyan, mig-indan se didowa dan kaling dimateng tepad te neinang kandan kidoen te dalan, aw pegkilala dan kandin te pegbelà-belà din te pan.

36 Dalem pa te peg-indan dan te kinità dan, dimateng si Jesus timindeg kidoen te tengà-tengà dan. Minikagi sikandin, “Ibeg ko melinaw se pedowan niyo.”

37 Meneng nelemitan dan, so eden dan aw along din. 38 Minikagi si Jesus, “Ikà niyo egkebulung. Ikà niyo heman egdowa-dowa. 39 Tengtengi niyo se menge palì diyà te belad ko aw benis ko. Ontò siak. Pemaed kaw kanak amon ontò kaw metaga-taga te kenà a olò along. Wedad lawa te along, meneng seini kitaen niyo den te doen lawa ko.”

40 Penga niyan, impekità din kandan se belad din aw benis din. 41 Neluba dan, meneng iling te wedà dan pemenal te ontò sikandin. So nepela dan pa, mig-insà si Jesus, “Doen lay kànen dini?”

42 Yan nemegay dan kandin te ikan sinognowan. 43 Kininawà din iyan aw kinaen din dalem te timengteng dan kandin.

44 Penga niyan, minikagi si Jesus, “Pegdoma ko kenyo kedengan te wedà a pa kematay, seini se inikagi ko diyà kenyo, te keilangan metoman se kedita te kagi insolat tepad kanak kidoen te punù ingkeliwat i Moises, aw insolat te menge telekeliwat te kagi te Timanem, aw kidoen heman te libro te Delangan.”

45 Penga niyan, migtabang si Jesus kandan amon mekelabet dan te kedegdagan te kagi te Timanem insolat gebii.

46 Minikagi heman sikandin, “Seini se kagi te Timanem tapay insolat, te keilangan imetayan se Misiyas, aw meantay sikandin lekat te nematay te iketelo te aldaw, aw netoman den iyan. 47 Doen heman kagi te Timanem insolat te keilangan megtoladà kaw diyà te kedita te otaw te keneyonan te pegwedaden te Timanem se salà dan aw megselsel dan aw memenal dan kanak. Keilangan megtebò kaw megtoladà kenyan dini te Jerusalem. 48 Sikiyo se otaw kimità te kedita niyan, aw meg-indan kaw den diyà te doma otaw. 49 Isogò ko diyà kenyo se Espiritu Santo tapay impakang te Amay ko. Meneng peg-ogpà kaw dini te Jerusalem lamig kinewaen niyo se Espiritu Santo domateng diyà kenyo lekat te langit.”

50 Penga niyan, timaking dan ki Jesus, aw nesayo dan lekat te Jerusalem, aw dimoton dan dapag te Bitanya. Pegdateng dan doton, timakyaw si Jesus te belad din, aw migtawal-tawal sikandin te tebangan dan te Timanem. 51 Dalem pa te pegtawal-tawal din, timanan sikandin kandan aw neengat doton te langit. 52 Penga niyan, migsimba dan kandin, aw minolì dan doton te Jerusalem, aw ontò neluba se pedowan dan. 53 Melikit dan egdoton te dakel simbahan te Jerusalem aw egduyun dan te Timanem kidoen.