1 Nayan, peglaklak te pila aldaw, minolì si Jesus doton te Kapirnaom. Doen menge otaw dimineg te mig-ogpà sikandin diyà te balay kidoen. 2 Yan medita se otaw netipon doton didalem te balay igsà wedà pekeombà se menge otaw pengkey doton te lowà te balay medapag te lelebangan. Dalem te pegtoladà i Jesus kandan te kagi te Timanem, 3 dimateng se epat otaw neningga te otaw kenà egpekeiwal. 4 Wedà dan pekedapag diyà ki Jesus so ontò medita se otaw netipon. Yan nenayit dan doton te atep te balay sìyan, so pantal se atep niyan. Inowang dan se atep kidoen diatas i Jesus, aw intonton dan se otaw kenà egpekeiwal sipat inibatan din. 5 Pegkità i Jesus te ontò dan simalig diyà kandin, minikagi sikandin diyà te otaw kenà egpekeiwal, “Elew, pigwedad den se salà nikaw.”

6 Nayan, doen menge menenoladà te punù ingkeliwat i Moises nenenoo kidoen, aw mig-aneng-aneng dan, 7 “Eked kepakay se inikagi din sìyan. Migtompuyus sikandin te Timanem, so wedad mekebatog megwedad te salà meneng olò Timanem.”

8 Nayan, netegahan i Jesus aw eden se aneng-aneng dan, aw yan minikagi sikandin, “Nengà lay egdowa-dowa se aneng-aneng niyo? 9 Mola megpelingo-lingo se otaw megwedad te salà. Meneng eked pekebatog se otaw megpegolì te otaw kenà egpekeiwal singed aw doen tolos te Timanem diyà kandin. 10 Meneng so Timanem a Migpekeotaw, ipekità ko den kenyo te mekebatog a megwedad te salà te otaw dini te tanà.”

Penga niyan, minikagi si Jesus diyà te otaw kenà egpekeiwal, 11 “Enaw ka. Loloni se inibatan no, aw olì ka den.”

12 Yan minenaw sikandin, aw inibing din se inibatan din, aw tinengtengan sikandin te menge otaw se minolì. Yan se doun te nepela se kedita dan, aw induyun dan se Timanem. Migpebelaw-belaway dan, “Wedad palos kinità tadon iling kenyan.”

13 Pegkesayo i Jesus lekat te balay, todà sikandin dimoton te kilid te lanaw. Netipon se kedita te otaw diyà kandin, aw migtoladà sikandin kandan. 14 Pegkesayo i Jesus lekat kidoen, doen iskribinti si Levi batà i Alfeo nenenoo kidoen te opisina din. Pegkità i Jesus kandin, minikagi sikandin, “Taking ka kanak.”

Yan timindeg si Levi, aw timaking sikandin ki Jesus.

15 Penga niyan, kimaen si Jesus kidoen te balay i Levi, aw medita heman se menge iskribinti aw doma otaw nelegeb te salà kimaen doma i Jesus aw menge tinoledaan din, so medita se otaw iling kenyan timaking ki Jesus. 16 Doen heman kidoen menge menenoladà te punù ingkeliwat i Moises sakop te menge Parisiyo. Pegkità dan te kimaen si Jesus doma te menge iskribinti aw doma otaw nelegeb te salà, minikagi dan diyà te menge tinoledaan i Jesus, “Medaet iyan, so egpengaen sikandin doma te medaet otaw, menge iskribinti aw doma otaw nelegeb te salà.”

17 Meneng pegdineg i Jesus te inikagi dan, minikagi sikandin, “Kenà otaw wedad mesakit se bolongen te doktor, meneng otaw doen mesakit se bolongen din. Insogò a dini kenà amon tewalen ko se otaw eg-aneng-aneng te metòlid se eg-inangen dan, meneng insogò a dini amon tewalen ko se otaw mekesesalà.”

18 Nayan, egpowasa se menge tinoledaan i Juan, aw egpowasa heman se menge Parisiyo. Doen menge otaw dimoton ki Jesus aw minikagi dan, “Melikit egpowasa se menge tinoledaan i Juan, aw egpowasa heman se menge tinoledaan te Parisiyo. Nengà lay kenà egpowasa se kamno menge tinoledaan?”

19 Minikagi si Jesus, “Aw doen peipid, eked kepuluk se menge sigalak te meama peipiden dalem te kidoen pa sikandin. 20 Meneng doen aldaw domateng aw meabat lekat kandan se meama peipiden, aw yan se aldaw megpowasa dan so mepuluk dan.”

21 Mig-indan heman si Jesus te tegdeyanan tepad te kaling itoladà din, kagi din, “Eked kepakay aw tompalan se tapay penenaktun te kaling tila wedà pa bugsaki, so komotot se kaling tila aw itompal diyà te tapay, aw meinang labi pa dakel se lisì te saol. 22 Aw meg-inang heman se otaw te bino, eked din soli se temek te paras diyà te solanan ininang lekat te kindal te kambing tapay linanit, so aw megbohak se temek, megbeto se solanan tapay linanit, aw eleg kebàtan se bino aw solanan niyan. Yan keilangan isawol se temek inangen bino diyà te solanan kaling linanit.”

23 Nayan, Sebado se aldaw te peg-etod te menge Judiyo. Pegkesebado, minokit si Jesus aw menge tinoledaan din kidoen te kilid te pawà te trigo agpet den geniyen. Peg-okit dan kidoen, kimetel se menge tinoledaan din te oway te trigo, aw kinaen dan, so binallos dan. 24 Meneng minikagi se menge Parisiyo diyà ki Jesus, “Tay law. Mig-inang se menge tinoledaan no te salà, so doen punù ingkeliwat i Moises te keilangan eked kidon pegterbaho te aldaw te peg-etod.”

25 Minikagi si Jesus, “Kenà medaet se ininang dan. Nelibelan niyo den besi aw eden se insolat kidoen te kagi te Timanem tepad te ininang i David gebii dalem te si Abiatar se ontò pengolo te simbahan. So binallos si David aw menge sondalo timaking kandin, aw wedad palos kànen dan, 26 yan minawop sikandin diyà te balay te Timanem, aw kinaen din se pan imbegay diyà te Timanem. Yan heman se impekaen din te menge doma din. Pengkey doen punù ingkeliwat i Moises te mepakay olò iyan kànen te menge pengolo te simbahan, meneng kenà medaet se ininang i David.”

27 Minikagi heman si Jesus, “Migpunù se Timanem te doen aldaw te peg-etod kenà amon doen kelimahan te otaw, meneng amon doen kèpiyaan te otaw. 28 So siak se Timanem Migpekeotaw, mepakay aw siak se mikagi aw eden se mepakay inangen pengkey aldaw te peg-etod.”